“დოკუმენტი არის არა მხოლოდ საქართველოსთვის თავისმომჭრელი, არამედ იგი ძალიან ბევრს ამბობს თვითონ საქართველოს საგარეო პოლიტიკური ტრაექტორიის შესახებ” – გიორგი კანდელაკი

სახელმწიფო უსაფრთხოების სამსახურსა და ბელარუსის ,,КГБ“-ს შორის გაფორმებული შეთანხმების ძალაში შესვლის შემდეგ სუს-მა პირველი განცხადება გაავრცელა. აღნიშნულ საკითხთან დაკავშირებით მწვავე კომენტარი გაკეთდა ,,ევროპულ საქართველოში“ გამართულ საგანგებო ბრიფინგზე, სადაც გენერალური მდივნის მოადგილემ გიორგი კანდელაკმა განაცხადა, რომ ამგვარი ნაბიჯი საქართველოსთვის არ არის მიზანშეწონილი, როცა რუსეთის გავლენა ბელარუსზე და განსაკუთრებით უსაფრთხოების სფეროში, საკმაოდ ნათელია:

,,დოკუმენტი არის არა მხოლოდ უბრალოდ სამარცხვინო, საქართველოსთვის თავისმომჭრელი მაშინ, როცა თავისუფალმა სამყარომ დააწესა ახალი სანქციები ბელარუსის რეჟიმის წინააღმდეგ, არამედ ასევე ეს დოკუმენტი ძალიან ბევრს ამბობს თვითონ საქართველოს საგარეო პოლიტიკური ტრაექტორიის შესახებ.

განსაკუთრებით ბოლო 1 წლის განმავლობაში, რაც ბელარუსში გაყალბებული საპრეზიდენტო არჩევნების შემდეგ გაძლიერდა რეპრესიები და უპრეცედენტოდ გაიზარდა რუსეთის გავლენა, ფაქტობრივად სრულ კონტროლს ახორციელებს დღეს რუსეთის მთავრობა, განსაკუთრებით უსაფრთხოების სფეროში“, – განაცხადა გიორგი კანდელაკმა.

ავტორი
ნინი ხიჯაკაძე