დღეს გამართული მთავრობის სხდომის წინ, დაგეგმილ ღირსების მარშთან დაკავშირებით საზოგადოებისათვის სპეციალური განცხადება გააკეთა პრემიერ-მინისტრმა ირაკლი ღარიბაშვილმა. მთავრობის მეთაურს მიზანშეუწონლად მიაჩნია რუსთაველის გამზირზე თბილისის პრაიდის მსვლელობა:
“მინდა შევეხო დღევანდელი აქციის საკითხს და გამოვხატო ჩემი პოზიცია.
ჩვენი სახელმწიფო იცავს ყველა მოქალაქის უფლებას, ჩვენ მათ არ განვასხვავებთ რაიმე ნიშნით, ამისთვის ყველაფერი გავაკეთეთ – მივიღეთ ანტიდისკრიმინაციული კანონი, ასევე, ჩემი ინიციატივით, “ქართულმა ოცნებამ” განახორციელა კონსტიტუციაში ქორწინების დეფინიციის განსაზღვრა და ამით ეს საკითხი დარეგულირდა.
ჩვენ გვაქვს მრავალსაუკუნოვანი ისტორია, როგორც ერთ-ერთი უძველესი ერი, სადაც არცერთ წარმომადგენელს რაიმე ნიშნით არ ჰქონია პრობლემა.
მე მინდა ვთქვა, რომ დღესაც, იმ ადამიანებს, რომლებიც აპროტესტებენ და გამოხატავენ საკუთარ პოზიციას, სურთ გარკვეული მარშების ჩატარება, ეს მათი უფლებაა, ამას ვიღებთ როგორც მოცემულობას, ამისთვის სახელმწიფომ ყველაფერი უზრუნველყო გუშინაც და გუშინწინაც ჩაატარეს უსაფრთხოდ. მაგრამ, დღეს დაანონსებული მარშის ჩატარება მიმაჩნია მიზანშეუწონლად. დღევანდელი აქცია სამოქალაქო დაპირისპირების საფრთხეს შეიცავს.
მოგეხსენებათ, რომ მოსახლეობის უმრავლესობისთვის აქციის ჩატარება არის მიუღებელი და სესაბამისად მიმაჩნია, რომ აღნიშნული აქცია არ უნდა ჩატარდეს რუსთაველის გამზირზე. შინაგან საქმეთა სამინისტრო მუდმივ კონტაქტზეა პრაიდის ორგანიზატორებთან, მათ განემარტათ, რომ დაანონსებული აქცია შეიცავს გარკვეულ საფრთხეები და მიეცათ ალტერნატიული ლოკაციების შერჩევის შესაძლებლობა. მე მიმდა მივმართო მათ, რომ მოვუწოდებ გაითვალისწინონ ჩვენი მოწოდება.
ზოგადად ასეთი ტიპის აქციები და ღონისძიებები, მე ვფიქრობ, ხელს უწობს უმცირესობების წარმომადგენლების დისკრიმინაციას, როდესაც ზედმეტად ხდება აპელირება და ხაზგასმა მათ განსხვავებულობაზე მიმაჩნია, რომ სწორედ ეს არის დისკრიმინაცია.
ასევე მინდა აღვნიშნო, რომ დღევანდელი აქციის ორგანიზატორების უკან სამწუხაროდ დგანან ისევ რევანშისტული რადიკალური ჯგუფები, კერძოდ რადიკალური ოპოზიცია სააკაშვილის მეთაურობით. ისინი არიან ჩართულები, სრული პასუხისმგებლობით ვაცხადებ, ისინი უკეთებენ ორგანიზებას აღნიშნულ მარშს და ამ აქციებს. რა თქმა უნდა, სწორედ, მათი მიზანია ჩვენ ქვეყანაში სამოქალაქო არეულობისა და ქაოსის შემოტანა, რაც არ განხორციელდება და ამას არ დავუშვებთ. ეს მინდოდა მოსახლეობისთვის მეთქვა და დანმემარტა. როგორც ჩვენ ხალხს, ჩვენ მოსახლეობას სურს ისე იქნება ყველაფერი ჩვენს ქვეყანაში“, – განაცხადა ირაკლი ღარიბაშვილმა.
