სახალხო დამცველმა ნინო ლომჯარიამ პარლამენტში 2020 წლის ანგარიში წარადგინა და განაცხადა, რომ განსაკუთრებული ყურადღება დაეთმობა ბავშვთა მიმართ ძალადობას, არაფორმალურ მმართველობას პენიტენციურ დაწესებულებებში და არასათნადო მოპყრობას პოლიციის მხირადან პატიმრებზე:
„ბავშვები დღესდღეობით არიან ერთ-ერთი ყველაზე მოწყვლადი ჯგუფები, რომელთა უფლებები სახელმწიფოს მხრიდან ხშირად, ძალიან სისტემურად ირღვევა. ჩვენ ვისაუბრებთ სიღარიბეზე, როგორც ბავშვის ოჯახიდან გამოყვანის საფუძველზე; დიდი ზომის ინსტიტუციებზე; ბავშვთა მიმართ ძალადობაზე და იმაზე, რომ სახელმწიფოში არ არსებობს ძალადობის მსხვერპლი ბავშვების რეაბილიტაციის სერვისები.
შარშან იყო გაზრდილი წინა წლებთან შედარებით ადმინისტრაციული წესით დაკავებულ პირთა მიმართ არასათანადო მოპყრობა, ანუ სხეულის დაზიანება პოლიციის მხრიდან და ხშირ შემთხვევაში, ამას ადგილი აქვს პოლიციის ავტომანქანებში.
პატიმრები ხშირად დაუსაბუთებლად არიან განთავსებული სამარტოო საკნებსა თუ დეესკალაციის ოთახში ხანგრძლივი ვადით და ეს უტოლდება არასათანადო მოპყრობას.
ციხეში არსებული არაფორმალური მართველობის კუთხით პოზიტიურისკენ არაფერი შეცვლილა. იმისათვის, რომ ჩვენ კიდევ მეტი მტკიცებულება წარმოგვედგინა ამ სისტემის ციხეში არსებობის თაობაზე, დამატებით შევისწავლეთ რვა სისხლის სამართლის საქმე, სადაც პატიმრები საუბრობდნენ სწორედ არაფორმალური მმართველობის, ასე ვთქვათ, კრიმინალური ავტორიტეტების და მათთან კავშირში მყოფი ადმინისტრაციის მხირად ჩადენილ სავარაუდო დანაშაულებრივ სქემებზე.
მიუხედავად ამ მტკიცებულებებისა ვნახეთ, რომ გამოძიება არ ინტერესდებოდა მთელი რიგი ფაქტების გადამოწმებით და შესაბამის პირთა პასუხისმგებლობა უმრავლეს შემთხვევაში არ დამდგარა ან დადგა, მაგრამ ძალიან მსუბუქი ფორმით“,- აცხადებს ნინო ლომჯარია.
