17 მაისს, “ქართული ოცნების” პოლიტსაბჭოს სხდომაზე, ადგილობრივი თვითმმართველობის არჩევნებსა და შარლ მიშელის დოკუმენტზე იმსჯელეს. ამის შესახებ განცხადება ჟურნალისტებისა და საზოგადოებისთვის პარლამენტის ფრაქცია “ქართული ოცნების” თავმჯდომარემ, მამუკა მდინარაძემ გააკეთა:
“შარლ მიშელის დოკუმენტის ყველა პუნქტი იქნება ზედმიწევნით შესრულებული. მართველ გუნდს ამის მზაობა აქვს.
მეორე საკითხი, რაც პოლიტსაბჭოს სხდომაზე ასევე დეტალურად გავიარეთ, იყო ის გეგმა, რაც “ქართულ ოცნებას” სჭირდება წინასაარჩევნო კამპანიისათვის, მერების და სხვა კანდიდატების ასარჩევად, მათ შორის, რა წესით უნდა ჩატარდეს შერჩევა საკრებულოს მაჟორიტარული თუ პროპორციული სიის წარმომადგენლებისა რაიონებში“, – განაცხადა მამუკა მდინარაძემ.
პოლიტსაბჭოს სხდომას პარტიის გენერალური მდივანი, კახა კალაძე არ დასწრებია. მამუკა მდინარაძის განმარტებით ამის მიზეზი თბილისის მერის სხვა დაგეგმილ ღონისძიებებში აქტიური ჩართულობაა:
“თბილისის მერი არის პარტიის გენერალური მდივანი და ამ ეგიდით დღეს ორი სხვადასხვა შეხვედრა ჩატარდა და ასევე ემზადება – ხვალ პრეზენტაცია აქვს. გარკვეულ მიმდინარე საკითხებზე, როგორც თბილისის მერს, მას აქვს კონკრეტული ღონისძიებები და ამიტომ დღეს საღამოს ვერ მოახერხა დასწრება, ამიტომ აქედან ჩვენ ვერ შევქმნით რაიმე ისეთს, რაც თქვენ გაინტერესებთ ხოლმე“, – აღნიშნა მამუკა მდინარაძემ.
