წვრილმან ხულიგნობასა და პოლიციელებისადმი დაუმორჩილებლობაზე ჯარიმები იზრდება. კანონპროექტი დღეს, პლენარულ სხდომაზე, მეორე მოსმენით უნდა მიიღონ. სამოქალაქო აქტივისტები ხელისუფლების ამ ნაბიჯში მოქალაქეებისათვის მშვიდობიანი შეკრებებისა და გამოხატვის თავისუფლების შეზღუდვის მცდელობას ხედავენ. ამის შესახებ განცხადებას საქართველოს სახალხო დამცველის მოადგილე, გიორგი ბურჯანაძე აკეთებს:
„ეს ორი მუხლი – 166-ე და 173-ე გამოყენებული არის შეკრება-მანიფესტაციის არაერთი შემთხვევის უკანონო შეზღუდვისთვის. მოსამართლეების მხრიდან არ ხდება ჯეროვნად იმის დასაბუთება, თუ რამდენად ჰქონდა ადგილი შეკრება-მანიფესტაციების დროს გარკვეულ წვრილმან ხულიგნობას ან პოლიციისათვის წინააღმდეგობის გაწევას, და ეს ბუნდოვანება, ბუნებრივია, განაპირობებს იმას, რომ, ნებისმიერ შემთხვევაში, შეკრება-მანიფესტაციის შეზღუდვა მოხდა კანონისა და კონსტიტუციის საწინააღმდეგოდ.
ამ პირობებში, ბუნებრივია, რისკები ძალიან მაღალია, ხოლო სანქციის გამკაცრება, იმ დროს, როდესაც ბუნდოვანება და განუჭვრეტელობა ისევ ისეთი რჩება, ბუნებრივია, უფრო მეტი საფრთხის წინაშე აყენებს ნებისმიერ ადამიანს, ნებისმიერ მოქალაქეს.
ცუდი არის ის, რომ ამ გაზრდილი ადმინისტრაციული დაკავების ვადის კანონიერების შემოწმების ვალდებულება არ აქვთ იმ მოსამართლეებს, რომლებიც იხილავენ ადმინისტრაციული სამართალდარღვევის საქმეებს“, – აცხადებს გიორგი ბურჯანაძე.
