კახი კავსაძე გარდაიცვალა

„ნეტავი, იქ თეატრი არის?“

თანამედროვეობის ერთ-ერთი უდიდესი ქართველი მსახიობი, კახი კავსაძე 86 წლის ასაკში გარდაიცვალა. მსახიობს 2020 წლის 28 ნოემბერს კორონავირუსი დაუდასტურდა, რამაც დაამძიმა მისი ჯანმრთელობის მდგომარეობა. ის ბოლო ორი თვის განმავლობაში პირველ საუნივერსიტეტო კლინიკაში მკურნალობდა.

1959 წელს კახი კავსაძემ დაამთავრა შოთა რუსთაველის სახელობის თეატრალური ინსტიტუტის სამსახიობო ფაკულტეტი და ამ დროიდან მოყოლებული რუსთაველის სახელობის აკადემიური თეატრის მსახიობია. მას არაერთი დასამახსოვრებელი როლი აქვს შესრულებული, როგორიცაა: ადამი (“ღვთაებრივი კომედია”), თავადი კოწია (“გუშინდელნი”), დევდარიანი (“საბრალდებო დასკვნა”), ილიკო (“მე, ბებია, ილიკო და ილარიონო”), სიმონ ჩაჩავა (“კავკასიური ცარცის წრე”), ლორდ ჰასტინგსი (“რიჩარდ III”), კენტი (“მეფე ლირი”), რასპუტინი (“კვაჭი კვაჭანტირაძე”), ბატონი დევი (“მერე რა, რომ სველია სველი იასამანი”).

გარდა თეატრისა, უდიდესი წვლილი შეიტანა ქართული კინოს განვითარებაშიც. მსახიობი 70-ზე მეტ მხატვრულ, დოკუმენტურ, მოკლე და სრულმეტრაჟიან ფილმშია გადაღებული, რომელთა გრძელი სიიდან ყველასთვის ცნობილია: „ნატვრის ხე“, „ღვინის ქურდები“, “ვერის უბნის მელოდიები“, „სიყვარული ყველას უნდა“, „ნერგები“, „მარტოხელა მონადირე“, „მაცი ხვიტია“ და სხვა მრავალი.

თავისი მრავალფეროვანი შემოქმედებითი ცხოვრების მანძილზე კახი კავსაძე გახდა არაერთი ჯილდოსა და პრემიის მფლობელი:
• 1976: საქართველოს სსრ დამსახურებული არტისტი
• 1981: საქართველოს სსრ სახალხო არტისტი
• 2001: იპოლიტე ხვიჩიას სახელობის პრიზი ,,იპო”
• 2008: რუსთაველის თეატრის წინ გაიხსნა კახი კავსაძის ,,ვარსკვლავი’’.
• 2009: კოტე მარჯანიშვილის სახელობის სახელმწიფო პრემიის ლაურეატი
• 2010: შოთა რუსთაველის სახელობის სახელმწიფო პრემიის ლაურეატი

ავტორი
ნატალი ბაკურაძე

საინფორმაციო სააგენტო “პარალელი” ღრმა მწუხარებას გამოთქვამს გენიალური ქართველი მსახიობის, კახი კავსაძის გარდაცვალების გამო და უსამძიმრებს მის ახლობლებს, სრულიად საქართველოს…