“ავტორიტარიზმის შესაკავებლად მნიშვნელოვანია ნებისმიერი რამ, რაც ხელისუფლებას აიძულებს რაღაც დათმოს” – აღნიშნავს სოციალურ ქსელში გამოქვეყნებულ პოსტში არასამთავრობო ორგანიზაცია „საქართველოს დემოკრატიული ინიციატივის“ გამგეობის წევრი, თბილისის თავისუფალი უნივერსიტეტის ასისტენტ-პროფესორი გიორგი მშვენიერაძე:
“ავტორიტარიზმის შესაკავებლად მნიშვნელოვანია ნებისმიერი რამ, რაც ხელისუფლებას აიძულებს რაღაც დათმოს. მიშელის შეთანხმება ასეთ შესაძლებლობებს ფაქტია რომ მოიცავს. ამიტომ, მოსაზრებები, რომ მას აზრი არ აქვს, ოცნება მაინც არაფერს შეასრულებს, ამით არაფერი შეიცვლება ან ოცნება დარჩა გამარჯვებული, ვფიქრობ გაზვიადებულია.
ცხადია, არ ვთვლი, რომ ამ შეთანხმებას შეუძლია ქვეყანაში დემოკრატიის სწრაფად დამკვიდრება, მაგრამ ის შესაძლოა იყოს ერთი აგური ჩვენთან უკვე ჩამოყალიბებული ავტორიტარიზმის შესაკავებლად, იყოს ამ პროცესში ბრძოლის მნიშვნელოვანი ინსტრუმენტი.
ამიტომ, მსგავსი პროცესებისადმი ნიჰილიზმის თესვა არაფრისმომცემია, განსაკუთრებით მაშინ, როცა არსებული რეალობის შესაცველად საზოგადოებისათვის არსებითი აქამდე ვერაფერი შეგვითავაზებია, გარდა გაბრაზებისა და “მორალურად მართლად” დარჩენისა.
ამ ბრძოლაში აუცილებელია გავიაზროთ, სად და როგორ დამარცხებულან ავტორიტარული რეჟიმები და რატომ ვერ დამარცხებულან იქ, სადაც “მორალურად მართლად” ყოფნა იყო მასთან ბრძოლის ერთადერთი გზა. არც არაორგანიზებული და უგეგმო გაბრაზებაა საკმარისი ამ ყველაფრის მისაღწევად. სამწუხაროდ, სავსეა მსოფლიო “მორალურად მართალი” დევნილებითა და ძალაუფლების მეპატრონე დიქტატორებითა და ავტორიტარებით,” – წერს ფეისბუქის პირად გვერდზე გიორგი მშვენიერაძე.
