სამოქალაქო აქტივისტები აპროტესტებენ ამნისტიის კანონს, რომლის მიხედვითაც ამნისტია გავრცელდება იმ სამართალდამცავებზეც, რომლებმაც 2019 წლის 20-21 ივნისს ძალადობრივი მიდგომები გამოიყენეს მოქალაქეების მიმართ. საქართველოს ახალგაზრდა იურისტთა ასოციაციის თავმჯდომარე, ნიკოლოზ სიმონიშვილი განმარტავს, რომ მსგავსი ტიპის დანაშაულზე ამნისტიის გავრცელება ეწინააღმდეგება ადამიანის უფლებათა ევროპულ და წამების წინააღმდეგ გაეროს კონვენციებს:
„როდესაც ჩვენ ვსაუბრობთ იმაზე, რომ შეიძლება ამნისტიის ქვეშ მოექცნენ სამართალდამცავები, რომლებმაც მნიშვნელოვანი დარღვევები ჩაიდინეს 20-21 ივნისის ღამეს, აქ, რა თქმა უნდა, აუცილებლად უნდა გავიხსენოთ გაეროს კონვენცია წამების წინააღმდეგ, ასევე ადამიანის უფლებათა ევროპული კონვენცია, რომელიც მიგვითითებს იმაზე, რომ მსგავსი ტიპის დანაშაულზე ამნისტიის გამოყენება არის დაუშვებელი.
ეს ამნისტიის კანონი უნდა გავრცელდეს მხოლოდ იმ პირებზე, რომელთა მიმართებითაც დასაშვებია ამნისტიის გამოყენება ჩვენი ეროვნული კანონმდებლობისა და საერთაშორისო სტანდარტების შესაბამისად“, – განაცხადა ნიკოლოზ სიმონიშვილმა.
ავტორი
ნატალი ბაკურაძე
