“ქართული ოცნების” თავმჯდომარე, ირაკლი კობახიძე ეხმიანება ევროპული საბჭოს თავჯდომარის, შარლ მიშელის მიერ შემოთავაზებულ დოკუმენტზე ოპოზიციის ნაწილის მხრიდან ხელმოწერის ფაქტს და აღნიშნავს, რომ ეს ხელს შეუწყობს ქართული პოლიტიკის განთავისუფლებას პოლარიზაციისა და რადიკალიზმისგან:
“მნიშვნელოვანია, რომ ოპოზიციური პარტიების უმრავლესობამ მოაწერა ხელი ამ დოკუმენტს. კიდევ ერთელ გამოაჩინა თავისი სახე რამდენიმე პოლიტიკურმა პარტიამ – “ნაციონალურმა მოძრაობამ”, “ევროპულმა საქართველომ”, “ლეიბორისტულმა პარტიამ”. ამით კიდევ ერთხელ აჩვენეს მათ საკუთარი ორიენტირი, მათ შორის საკუთარი საგარეო პოლიტიკური ორიენტირი.
რაც შეეხება “ქართულ ოცნებას”, მან იმოქმედა თავისი პასუხისმგებლობით, როგორც საზოგადოების, ასევე საერთაშორისო პარტნიორების წინაშე.
შეთანხმება თავისთავად არის მნიშვნელოვანი, შედეგი კი უნდა იყოს ქართული პოლიტიკის განთავისუფლება პოლარიზაციისა და ქართული რადიკალიზმისგან. ძალიან მნიშვნელოვანია, რომ შეთანხმება სათანადოდ აღსრულდეს და პირველივე პლენარულ სხდომას უნდა დაესწროს ოპოზიციის ის ნაწილი, რომელიც შეუერთდა ამ დოკუმენტს.
ევროკავშირისთვის რომ საქართველო არის პრიორიტეტი, ამის გამოხატულებაა შარლ მიშელის ვიზიტი საქართველოში და ეს ქმნის ძალიან კარგ საფუძველს იმისათვის, რომ ჩვენ 2024 წელს ძალიან თამამად წარვადგინოთ განაცხადი ევროკავშირში საქართველოს გაწევრიანებაზე“, – განაცხადა ირაკლი კობახიძემ.
ავტორი
სალომე მჭედლიძე
