“მთავარი არხის” ჟურნალისტი, ეკა კვესიტაძე სოციალურ ქსელში სალომე სამადაშვილის წინააღმდეგ გამოთქმულ მწვავე, ნეგატიურ კომენტარებს ეხმიანება მიუღებლად მიიჩნევს პოლიტიკოსის მიმართ ასეთ დამოკიდებულებას და თანადგომას უცხადებს მას:
“თავზარდამცემია ის კომენტარები, რომელსაც სალომე სამადაშვილის მისამართით ვკითხულობ. რა მნიშვნელობა აქვს ზიზღი საიდან მოდის, ნაცურია ის თუ ქოცური. ზიზღი ზიზღია, ის გვანადგურებს, გვკლავს, ადამიანურ სახეს გვიკარგავს, ბარბაროსებად გვაქცევს და ნორმალურ საზოგადოებად ჩამოყალიბების შანს გვართმევს. ჩვენ კი სწორედ იმისთვის ვიბრძვით, რომ ნორმალური საზოგადოება გავხდეთ, სადაც ერთმანეთთან ცივილურ დისკუსიას შევძლებთ, სადაც არ შეგვზიზღდება ერთმანეთი მხოლოდ იმის გამო, რომ განსხვავებული პოლიტიკური თუ იდეოლოგიური პოზიცია გვაქვს და რაც მთავარია, სადაც თავისუფლად შევძლებთ საკუთარი აზრის გამოხატვას და იმის შიში არ გვექნება, რომ ამ აზრის გამო ვირტუალური ქვებით ჩავიქოლებით.
წლებია ამ სივრცეში ამ უკიდურესად საშიში ტენდენციას ვაკვირდებით, შეშინებულ პოლიტიკოსებს, რომლებიც ამ ზიზღის შიშმა მძევლებად აქცია. მე მძულს ეს შიში, რადგან ის გაიძულებს საკუთარ თავს უღალატო. ამიტომ თანადგომა ყველას, ვინც ამ შიშის დაძლევას ახერხებს და პირველ რიგში, ჩემი თანადგომა Salome Samadashvili-ს, რომელიც ყოველთვის უშიშრად იცავდა თავის პოზიციას და არასდროს არ უღალატია თავის თავისთვის,” წერს ფეისბუქის პირად გვერდზე ეკა კვესიტაძე.
