საქართველოს სტრატეგიული პარტნიორი ქვეყნების მხარდაჭერის თაობაზე საუბრობს პოლიტიკური პლატფორმა “სტრატეგია აღმაშენებლის” თავმჯდომარე გიორგი ვაშაძე. ოპოზიციონერი ლიდერი აღნიშნავს, რომ საერთაშორისო მეგობრების მაღალი ინტერესი და ჩართულობა ნაკარნახევია ხელისუფლების მხარდასაჭერად, არამედ საქართველოს წარმატებისა და დახმარების სურვილით:
“მართლაც უპრეცედენტოა ჩვენი მეგობრების მხარდაჭერა ევროპიდან და აშშ-დან, ამას მიუთითებს ევროსაბჭოს მინისტერიალსა და ამერიკის სენატში გუშინდელი მოსმენები საქართველოს საკითხზე, სადაც კიდევ ერთხელ დადასტურდა, რომ ამერიკის სენატი, ამერიკის მთავრობა მხარს უჭერს არა რომელიმე პოლიტიკურ პარტიას, არამედ საქართველოს და მის მოქალაქეებს.
შესაბამისად, ვერ ვხვდები რა უხარია “ქართულ ოცნებას” მაშინ, როდესაც საქართველოს დამოუკიდებლობის ისტორიაში არ გვქონია მსგავსი ნეგატიური გზავნილები ქვეყანაში მიმდინარე პოლიტიკურ მოვლენებთან დაკავშირებით.
სენატორები საუბრობდნენ, რომ თუ დემოკრატიამ არ იმუშავა, საქართველო დაკარგავს ევროატლანტიკური წევრობის შანსს. ასევე საუბარი იყო იმაზე, რომ იზრდება ოლიგარქიული გავლენა მართლმსაჯულების სისტემასა და პოლიტიკაზე და მელიას დაჭერა უკან გადადგმული ნაბიჯია დემოკრატიისთვის.
მნიშვნელოვანია ჩვენი მეგობრების მითითება იმის შესახებ, რომ ლეგიტიმურობის ზღვარზე ჩატარებული არჩევნების პრაქტიკა მიუღებელია დემოკრატიული სამყაროსთვის და ოპოზიციური პარტიის ლიდერები ციხეში არ უნდა ისხდნენ.
მთავარი გზავნილია, რომ მმართველ პარტიას, “ქართულ ოცნებას” აკისრია განსაკუთრებული პასუხისმგებლობა ქვეყანა გამოიყვანოს პოლიტიკური კრიზისიდან, რადგან ეს კრიზისი აზიანებს სახელმწიფოს, ხალხს და ემსახურება რუსეთის ინტერესებს.
ჩვენი საერთაშორისო მეგობრების მაღალი ინტერესი და ჩართულობა ნაკარნახევია არა “ქართული ოცნების” მხარდაჭერით, როგორც ხელისუფლება ცდილობს რომ გაასაღოს, არამედ საქართველოს წარმატებისა და დახმარების სურვილით“, – აცხადებს გიორგი ვაშაძე.
ინფორმაციას “სტრატეგია აღმაშენებლის” საზოგადოებასთან ურთიერთობის სამსახური ავრცელებს
