როგორც “ლეიბორისტული პარტიის” თავმჯდომარემ, შალვა ნათელაშვილმა ბრიფინგზე განაცხადა, მან მიიღო წერილი, რომლის მიხედვითაც თუ ხვალ საღამოს 6 სთ-მდე არ შეავსებს ქონებრივ დეკლარაციას, მის წინააღმდეგ ს.ს. საქმე აღიძვრება. ლეიბორისტების ლიდერი აცხადებს, რომ არ ეშინია და არც პარლამენტში შესვლას აპირებს:
“არ გაიშვას თქვენი შეშინებული! ვინც შეგიშინებიათ ისევ ის შეაშინეთ! ოპოზიცია არ შევა პარლამენტში, იმისთვის, რომ ოლიგარქ ივანიშვილს მმართველობა გავუხანგრძლივოთ!
ძალიან მალე დაიწყება საპროტესტო მასობრივი ტალღა, რეჟიმს უახლოვდება საერთაშორისო იზოლაციის რეალური საფრთხე, რაც შეიწირავს ივანიშვილის მიერ ჩვენგან მოპარულ მილიარდებს და იმ მილიარდებს დააბრუნებს აქ იმ ხალხთან, ვისაც წაართვეს.
რეჟიმი აგონიაშია, ეს ეტყობა მათ ეპისტოლარულ ჟანრსაც, ეს ეტყობა იმ რეპრესიებსაც, რომლის განხორციელებასაც აპირებენ მაგრამ ვერ განახორციელებენ. ყველა ხომ ვერ დაგვიჭერენ? ყველა ოპოზიციონერს, ჟურნალისტს, სამოქალაქო წინააღმდეგობის მონაწილეს, საპროტესტოდ განწყობილ საქართველოს 70%-ს, ეს ხომ გამორიცხულია?
რაც უფრო ღრმად შევლენ რეპრესიების ჭაობში, უფრო ღრმად ჩაეფლობიან ისე, რომ ვერანაირი თანამედროვე ტექნიკა ვერ ამოიყვანს,” – აცხადებს შალვა ნათელაშვილი.
