“ევროპული საქართველოს” ლიდერის გიგი უგულავას მიერ სოციალურ ქსელში გავრცელებულ ვიდეომიმართვასთან დაკავშირებით “ნაციონალური მოძრაობის” და მათი მხარდამჭერების მხრიდან დაფიქსირებულ ნეგატიურ პოზიციასთან მიმართებაში სააგენტო “პარალელთან” კომენტარი გააკეთა ვიდეომიმართვის ავტორმა. ოპოზიციონერი ლიდერი აღნიშნავს, რომ მხოლოდ ივანიშვილი არის მთავარი ბოროტება, თუმცა მოსახლეობამ დიდ არჩევნებამდე უნდა გაიგოს სიმართლე, ჩვენს ამომრჩევლებს ფარისევლობა არ უნდა ვაკადროთ:
,,მე ერთადერთი, რაც მამოძრავებდა და მამოძრავებს, არის სიმართლე, მხოლოდ სიმართლე და არაფერი სიმართლის გარდა. მიუხედავად ნეგატიური გამოხმაურებებისა ჩემს ვიდეო მიმართვაზე, ვერც ერთმა ვერ უარყო, რომ საუბარი იყო მხოლოდ სიმართლეზე.
მე ძალიან ბევრი მეგობარი მყავს ,,ენმ“-ში, მათ პატივს ვცემ და პატრიოტიზმში ეჭვიც არ მეპარება. თვითონაც განიცდიან იმას, რაც იმ პარტიაში ხდება. თუმცა, სამწუხაროა, რომ ხმას არ იღებენ და რეაგირებისგან თავს იკავებენ.
ეს განცხადება აუცილებლად იმიტომ ჩავთვალე, რომ ხალხმა უნდა იცოდეს 31 ოქტომბერს არის დიდი არჩევნები და ჩვენმა საზოგადოებამ აუცილებელია გაიგოს სრული სიმართლე.
ისანში ოპოზიციის საერთო კანდიდატი იყო გიორგი ვაშაძე და უცბად დადგა ხატია დეკანოიძე, რაც ნამდვილად არასწორი საქციელი იყო. რეგიონებში ანალოგიურად წუხს ხალხი აღნიშნულ საკითხზე და მათ უნდა იცოდნენ პასუხი, თუ რატომ მოხდა ასე.
მე არც საპოლემიკო მაქვს მათთან. მხოლოდ ივანიშვილი არის მთავარი ბოროტება. დარწმუნებული ვარ ამ არჩევნების შემდეგ ივანიშვილს გავისტუმრებთ, მაგრამ სიმართლე ყოველთვის ყველამ უნდა იცოდეს. თითოეული არჩევანი უნდა იყოს გაცნობიერებული და ჩვენ ფარისევლობა არ უნდა ვაკადროთ ჩვენს ამომრჩევლებს“, – განაცხადა გიგი უგულავამ.
ავტორი
ნინი ხიჯაკაძე
