10 ოქტომბერს 6 საათზე მოძრაობა „სირცხვილიას“ ინიციატივით პარლამენტის წინ გაიმართა აქცია, სადაც სამოქალაქო აქტივისტები და პოლიტიკური სპექტრის წარმომადგენლები „კარტოგრაფების საქმეზე“ ბრალდებულების პატიმრობიდან გათავისუფლებას ითხოვდნენ.
შეგახსენებთ, რომ ივერი მელაშვილი და ნატალია ილიჩოვა 7 ოქტომბერს დააკავეს. სასამართლომ მათ 8 ოქტომბერს წინასწარი პატიმრობა შეუფარდა. ამ თემაზე საინფორმაციო სააგენტო „პარალელთან“ კომენტარი გააკეთეს მოძრაობა „სირცხვილიას“ აქტივისტებმა, აქციის ორგანიზატორებმა.
„აქციის მიზანი არის ის, რომ გავათავისუფლოთ დაკავებულები, რომლებიც უკანონოდ სხედან, ბიძინა ივანიშვილის – ოლიგარქის და კრემლის პატიმრობაში. რუსეთს კარგად აქვს საუკუნეების მანძილზე შესწავლილი ქართველი ხალხის ფსიქოლოგია, ზუსტად იციან რა წერტილში უნდა დაარტყან, „ქართული ოცნება“ კი გახლავთ მისი ერთ-ერთი ფილიალი, რომელიც აქტიურად აჟღერებს ემოციონალურ მესიჯებს, რაც ქართველების ფსიქოლოგიაზე იმოქმედებს. შესაბამისად 20 დღით ადრე გამოყენებულ იქნა ისეთი თემა, რომელიც გარკვეულ ნაწილზე იმოქმედებდა.
ეს არის შეთითხნილი ბრალდება და სრულიად უსაფუძვლოდ ჰყავთ ორი პროფესიონალი ადამიანი ციხეში გამოკეტილი. ჩვენი ბრძოლა გაგრძელდება იქამდე, სანამ ეს ორი ადამიანი არ იქნება დახსნილი და 31 ოქტომბერს ქართველი ხალხიც გასცემს პასუხს საარჩევნო ბიულეტინით ბიძინა ივანიშვილსა და კრემლს.
ვფიქრობ, რომ ერთი ადამიანის პროტესტსაც კი აქვს შედეგი, ამიტომ თითოეული მოქალაქის როლი მნიშვნელოვანია, ერთი ხმაც კი სამომავლოდ გადამწყვეტია. ბიძინა ივანიშვილს სურს დააშინოს პროფესიონალები, მეცნიერები და ის ნაწილი, რომელიც ქვეყანაში ქმნის რაღაც ღირებულს, რათა მათ იცხოვრონ შიშში და ტერორში, ზუსტად ეს იყო საბჭოთა კავშირი, პროფესიონალ ადამიანებს კლავდნენ ან ასახლებდნენ და ცდილობდნენ საზოგადოება დაეზომბირებინათ“. – აცხადებს სამოქალაქო აქტივისტი ანა ჭარხალაშვილი.
„ჩვენ ვფიქრობთ,რომ ეს არის ერთის მხრივ ძალიან დიდი უსამართლობა, როცა ადამიანებს რაღაც პოლიტიკური საფუძვლებისა და ბინძური თამაშების გამო აკავებენ. ძალიან დიდი ეჭვია, რომ ეს ადამიანები რეალურად არ არიან დამნაშავეები, რადგან რასაც ედავებიან, ის შედეგი არ დამდგარა საერთოდ. საქმე იმაშია, რომ „ქართულ ოცნებას“ ახლა აწყობს უბრალოდ რუსეთიდან რელსების გადატანა აზერბაიჯანზე, რომელიც ომშია ჩართული და საომარი მდგომარეობა აქვს, მას ჩვენთვის არ ცალია, ახალი ფრონტის გახსნა არაფერში აწყობს და ისედაც გასაყოფი არაფერი გვაქვს. შესაძლებელია, რომ ეს ტერიტორია აღარც იყოს სადავო.
„ქართული ოცნების“ მიერ დაშვებული შეცდომები თუ შეგნებულად გადადგმული ნაბიჯები ნათელს ფენს ყველაფერს, ეს ყველაფერი დიდი ხანი მზადდებოდა, რათა წინა საარჩევნოდ აეფეთქებინათ თემა, თითქოს ვიღაც ადამიანების დახმარებით ხელისუფლებამ გაყიდა საქართველოს ტერიტორია. იმედია, რომ ჩვენ ხელისუფლებას თუ არა, აზერბაიჯანის ხელისუფლებას მაინც ეყოფა გონიერება თუნდაც ომის პერიოდში, რომ არ წამოეგოს ბიძინას ამ იაფფასიან ტრიუკს და ჩვენ როგორც კარგმა და ტკბილმა მეზობლებმა ისევ გავაგრძელოთ მშვიდად ცხოვრება“, – აცხადებს გიგა მაქარაშვილი.
ავტორი
ნუცა ჯოხაძე
