მასობრივი ინტოქსიკაცია გორში, მოწამლულია ათეულობით ადამიანი – მოწამვლის მიზეზი ჯერ ისევ უცნობია

34

ე.წ. კომბინატის დასახლებიდან მოწამვლის ნიშნებით კლინიკებში გუშინ 50-მდე ბავშვი გადაიყვანეს. დღეის მდგომარეობით, სამედიცინო დაწესებულებაში გადაყვანილთა რიცხვი რამდენიმე ათეულით არის გაზრდილი. მოსახლეობა ინტოქსიკაციის მიზეზად წყალს ასახელებს, თუმცა, წყალმომარაგების კომპანია უარყოფს ამ ბრალდებას და ოფიციალურ განცხადებას ავრცელებს აღნიშნულ საკითხთან დაკავშირებით:

“გაფართოებული ლაბორატორიული კვლევის შედეგებით გორში სასმელი წყალი დადგენილ ნორმებს აკმაყოფილებს.

წყალმომარაგების კომპანიამ ქალაქ გორში, წყლის მიკრობიოლოგიური მაჩვენებლებით გაფართოებული კვლევა დაასრულა, რომლის შედეგების მიხედვითაც გორში სასმელი წყალი სრულად აკმაყოფილებს წყლის ტექნიკური რეგლამენტით დადგენილ ნორმებს.

წყლის სინჯები კომპანიის ლაბორატორიის მიერ კომბინატის დასახლების რამდენიმე ქუჩაზე იქნა აღებული.

გორში არსებული წყლის სათავე ნაგებობა და საქლორატოროს მიმდებარე ტერიტორია, საიდანაც ხდება ქალაქის დიდი ნაწილის წყალმომარაგება, შემოსაზღვრული და სტანდარტების შესაბამისად არის დაცული. ასევე, აღნიშნულ ტერიოტრიაზე მოწყობილი წყლის ჭები დახურულია. შესაბამისად, სათავე ნაგებობა და საქლორატორო ობიექტების შიდა და გარე პერიმეტრები მკაცრად კონტროლდება.

გარდა ამისა კომპანია ქალაქში, ყოველდღიურ რეჟიმში ახორციელებს წყლის სინჯების აღებას სხვადასხვა ლოკაციიდან.

გასულ დღეებში ჩატარებული სინჯების მონიტორინგის შედეგების მიხედვით სასმელი წყალი დადგენილ ნორმებს სრულად აკმაყოფილებდა“.

კომენტარს გორში მომხდარ ფაქტთან დაკავშირებით აკეთებს შიდა ქართლის სახელმწიფო რწმუნებულის მოვალეობის შემსრულებელი სიმონ გულედანი:

„ჩვენ, დღეს გვქონდა კომუნიკაცია პირველადი ანალიზის შედეგებთან დაკავშირებით წყალმომარაგების კომპანიასთან. პაციენტები შემოსული არიან კომბინატის დასახლებიდან, ასევე, ქალაქის სხვადასხვა უბნებიდან და სოფლებიდან, სადაც არ ხდება ოპერირება წყალმომარაგების კომპანიის მიერ, ამიტომ ინტოქსიკაცია წყლით არ დასტურდება“, – ამბობს სიმონ გულედანი.

კრიტიკული მედიცინის დეპარტამენტის ხელმძღვანელის ინფორმაციით, ამ ეტაპზე სამედიცინო დაწესებულებაში 26 პაციენტია მოთავსებული.

“პაციენტთა ნაწილი გაეწერა უკვე, ნაწილი სტაბილურ მდგომარეობაშია, ზოგიერთი შემოემატა და ამ დროისთვის, 26 პაციენტია სტაციონარში. არის სხვადასხვა დიაგნოზებიც, მაგრამ  ძირითადად გადაუდებელი დახმარების განყოფილებაში ანალოგიური სიმპტომები და ჩივილებია”, – განაცხადა გორის კლინიკა „იავნანას“ კრიტიკული მედიცინის დეპარტამენტის ხელმძღვანელმა, ნია ლაზარაძემ.

შეგახსენებთ, რომ ამჟამად, სტაციონარში 26 პაციენტია მოთავსებული. არიან გამოჯანმრთელებულები, ნაწილი გაწერილია და ბინაზე განაგრძობს მკურნალობას. სულ სამედიცინო დაწესებულებას 100-ზე მეტმა ადამიანმა მიმართა, მათ შორის უმრავლესობა ბავშვია. როგორც ლაბორატორიული კვლევის შედეგებით გახდა ცნობილი, სასმელი წყალი ძირითადი ინტოქსიკაციის მიზეზი არ არის. პარალელურ რეჟიმში აგრძელებს მუშაობას სურსათის ეროვნული სააგენტოც. არის, თუ არა ეს შემთხვევა ენტეროვირუსის გავრცელება, ამას უკვე ჯანდაცვის სამინისტრო დაადასტურებს.

ავტორი
ანა მოდებაძე

კომენტარები