“გვეამაყება, რომ პარტნიორების მხრიდან ჩვენს ქვეყანას ასეთი მაღალი ნდობა აქვს – არჩილ თალაკვაძე

პარლამენტის თავმჯდომარის, არჩილ თალაკვაძის განცხადებით საქართველოს მთავრობის მიერ გლობალური პანდემიის დრო გადადგმულმა ნაბიჯებმა ცხადყო, რომ ქვეყანას შეუძლია კრიზისების ეფექტურად მართვა. მისივე განცხადებით საქართველო ამ დრომდე “მწვანე ზონაში” რჩება, რაც უსაფრთხო გარემოს გულისხმობს:

„საქართველომ გლობალური პანდემიის პერიოდში დაამტკიცა, რომ შეუძლია საფრთხეების მართვა და არის უსაფრთხო ქვეყანა. ამ მომენტისთვის საქართველო რჩება მწვანე ზონაში, გლობალური პანდემიის პირობებში და ჩვენ მაქსიმალურს ვაკეთებთ იმისთვის, რომ პანდემიის პერიოდი მინიმალური ზიანით გავიაროთ“,- ამის შესახებ არჩილ თალაკვაძემ ბიუროს სხდომაზე განაცხადა.

იგი გაეროს მსოფლიო ტურიზმის ორგანიზაციის აღმასრულებელი საბჭოს სხდომასაც გამოეხმაურა, რომელსაც, ისტორიაში პირველად, საქართველო მასპინძლობს. მისი განცხადებით საქართველოსადმი ასეთი დამოკიდებულება სწორმა და კოორდინირებულად განხორციელებულმა პროცესებმა გამოიწვია.

,,პირველ რიგში, ჩვენი საზრუნავი არის ჩვენი მოქალაქეების ჯანმრთელობა და უსაფრთხოება და ასევე, ძალიან მნიშვნელოვანი ამოცანა არის ეკონომიკის სტაბილიზაცია და მისი აღდგენა, რისთვისაც უწყვეტ რეჟიმში ვმუშაობთ. სწორედ ამიტომ, ძალიან დიდი მნიშვნელობა აქვს ტურიზმის მსოფლიო ორგანიზაციის აღმასრულებელი საბჭოს სხდომის ჩატარებას საქართველოში“,- განაცხადა არჩილ თალაკვაძემ.

ინფორმაციას პარლამენტის პრესსამსახური ავრცელებს