უკვე მეორე დღეა ქვეყანაში ვირუსით ინფიცირებულთა რაოდენობა მატულობს, რაც არ შეიჩნეოდა წინა დღეებისა და კვირების განმავლობაში. 31 აგვისტოს დადასტურდა 18, ხოლო 1 სექტემბერს – 23 ახალი კორონავირუსის შემთხვევა.
საქართველოში, ბოლო 24 საათში კორონავირუსით ინფიცირების 23 ახალი შემთხვევა გამოვლინდა და ჯამში, დადასტურებული შემთხვევების რაოდენობა, 1 510-მდე გაიზარდა.
ბოლო დღე-ღამეში გაზრდილია გამოჯანმრთელებულთა რაოდენობაც, ბოლო მონაცემებით ვირუსისგან განკურნებულია 1253 პაციენტი.
ახალ შემთხვევებთან დაკავშირებით განცხადება გააკეთა თბილისის ინფექციური საავადმყოფოს სამედიცინო დირექტორმა, მარინა ეზუგბაიამ, რომელმაც აღნიშნა, რომ 23 შემთხვევიდან ერთ შემთხვევაზე არ არის ცნობილი ინფიცირების პირველ წყარო.
“23 შემთხვევის განაწილება ასეთი გახლავთ: 14 პაციენტის ინფიცირების წყარო არის კონტაქტი ინფიცირებულებთან, 8 შემთხვევა გახლავთ შემოტანილი, აქედან 5 არის სატვირთო ავტომობილის მძღოლი. მხოლოდ ერთ შემთხვევაზე გრძელდება ეპიდ-კვლევა,” – განაცხადა მარინა ეზუგბაიამ.
ბოლო მონაცემებით საქართველოში:
კორონავირუსით ინფიცირებულია – 1 510 ადამიანი;
გამოჯანმრთელებულია – 1 253;
მათ შორის გარდაცვლილია – 19;
კარანტინის რეჟიმში რჩება – 6 059 ადამიანი.
სტაციონარში მეთვალყურეობის ქვეშ – 239 პირი, მათ შორის საქართველოში სამკურნალოდ გადმოყვანილია – 41 პაციენტი.
ავტორი
მახო ზავრაშვილი
