შინაგან საქმეთა სამინისტრო თერჯოლის რაიონში მომხდარ ფაქტთან დაკავშირებით განცხადებას ავრცელებს. როგორც უწყების განცხადებიდან იკვეთება, ოჯახში კონფლიქტთან დაკავშირებით მიმართვა 2010 წელს განხორციელდა და შესაბამისი რეაგირებაც მოხდა, მაგრამ სამართლებრივი პასუხისმგებლობა არცერთი პირის მიმართ არ დამდგარა. შსს-ს 2014 წელსაც მიმართეს, ბრალდებულსა და სიძეს შორის სიტყვიერი დაპირისპირების თაობაზე და პოლიციის მხრიდან შესაბამისი ზომები გატარდა:
„მაღალი საზოგადოებრივი ინტერესიდან გამომდინარე, გვსურს საზოგადოებას მივაწოდოთ დამატებით ინფორმაცია თერჯოლის რაიონში მომხდარ ფაქტთან დაკავშირებით.
შინაგან საქმეთა სამინისტროში, აღნიშნულ ოჯახში არასრულწლოვნის მიმართ ძალადობის თაობაზე განცხადება, ან შეტყობინება არ შემოსულა. შესაბამისად, პოლიციის მიერ ოჯახის არც ერთი წევრის მიმართ შემაკავებელი ორდერი გამოცემული არ ყოფილა.
აღნიშნულ ოჯახში კონფლიქტთან დაკავშირებით მომართვა 2010 წელს ფიქსირდება, რაზეც მოხდა შესაბამისი რეაგირება, თუმცა სამართლებრივი პასუხისმგებლობა არცერთი პირის მიმართ არ დამდგარა.
გარდა ამისა, 2014 წელს, ადგილი ჰქონდა ბრალდებულს და მის სიძეს შორის სიტყვიერ დაპირისპირებას, რაზეც პოლიციის მხრიდან გატარდა შესაბამისი ზომები.
კიდევ ერთხელ ხაზგასმით გვინდა აღვნიშნოთ, რომ შინაგან საქმეთა სამინისტროსთვის პრიორიტეტია ოჯახში ძალადობის წინააღმდეგ ეფექტიანი ბრძოლა და მსხვერპლის ინტერესებზე მორგებული გამოძიების უზრუნველყოფა. გრძელდება მოძალადეთა მიმართ მკაცრი სისხლის სამართლის პოლიტიკის გატარება“, – ნათქვამია შინაგან საქმეთა სამინისტროს განცხადებაში.
ავტორი
მარიკა ხორავა
