„სტრატეგია აღმაშენებლის“ სოციალური მიმართულების ხელმძღვანელი, თეონა ჭალიძე სოციალურ ქსელში უფასო სასადილოებით სარგებლობის მსურველთა სიების ფოტოებს ასაჯაროვებს და თბილისის მერიას მიმართავს. როგორც ოპოზიციური პარტიის წარმომადგენელი აღნიშნავს, დღითიდღე მძიმდება ათასობით ადამიანის მდგომარეობა, რომლებზეც მერია არ ზრუნავს:
„რატომ მალავს მერია უფასო სასადილოებით სარგებლობის მსურველთა რაოდენობას?!
პასუხი მარტივია: იმის ნაცვლად, რომ კიდევ უფრო გაღარიბებულ მოქალაქეებზე იზრუნონ, მალავენ საჯარო ინფორმაციას და ჰგონიათ, პრობლემა გადაჭრეს.
ფაქტია, ათასობით ადამიანის მდგომარეობა კიდევ უფრო მეტად დამძიმდა და იზრდება იმ ოჯახების რაოდენობა, რომლებიც ყოველდღიურ საარსებო საკვებს სასადილოებში ითხოვენ და რიგში დგანან. მომლოდინეთა რაოდენობა საგრძნობლადაა გაზრდილი და იმის ნაცვლად, რომ კალაძემ ხალხის მოთხოვნა დააკმაყოფილოს და მოქალაქეების შიმშილს ებრძოლოს, ძვირადღირებული ნაგვის ურნების ყურებით ტკბება.
ცნობისთვის, ამჟამად უფასო სასადილოებს 41 500-მდე ბენეფიციარი ჰყავს. მეორე საკითხია საჭმლის ხარისხი ამ სასადილოებში, მაგრამ რაცაა, უკიდურეს გაჭირვებაში მყოფ ადამიანებს ისიც კი სანატრელი გაუხდათ,“ – წერს თეონა ჭალიძე.
ავტორი
ეკა ქაჩლიშვილი
