საქართველოს პრემიერ-მინისტრმა, გიორგი გახარიამ რუსეთის საგარეო საქმეთა მინისტრის სერგეი ლავროვის განცხადებას უპასუხა და აღნიშნა, რომ რუსეთის ფედერციასთან ფრენები საქართველოს არ შეუწყვეტია. გიორგი გახარიამ, ასევე განაცხადა, რომ ფრენების აღდგენა რუსეთის ფედერაციაზე და ეპიდემიოლოგიურ მდგომარეობაზეა დამოკიდებული:
„რუსეთის ფედერაციასთან ფრენები საქართველოს არ შეუწყვეტია, ფრენების აღდგენა დამოკიდებულია რუსეთის ფედერაციასა და, რა თქმა უნდა, ეპიდემიოლოგიურ მდგომარეობაზე, როგორც რუსეთის ფედერაციაში, ისე – საქართველოში“, – განაცხადა გიორგი გახარიამ.
რუსეთის საგარეო საქმეთა მინისტრმა, სერგეი ლავროვმა საქართველოსთან ურთიერთობასა და მიმოსვლის აღდგენაზე კომენტარი გაზეთ „Труд“-თან ინტერვიუში გააკეთა:
„ვიმედოვნებ, რომ საქართველოსა და რუსეთს შორის ავიამიმოსვლა ახლო მომავალში აღდგება. ყურადღებით ვაკვირდებით თავად საქართველოში მიმდინარე მოვლენებს და ველოდებით საერთო სანიტარულ-ეპიდემიოლოგიური ვითარების ნორმალიზებას რეგიონსა და მსოფლიოში, რათა მოხდეს მიმოსვლის აღდგენა.
რუსეთი ყოველთვის უფრთხილდებოდა ქართველებთან მეგობრულ ურთიერთობას, რომელიც ასწლეულებს ითვლის. დარწმუნებულები ვართ, რომ ჩვენ შორის არსებულ გაუგებრობას მალე მოეღება ბოლო და ურთიერთობის აღდგენა ორივე მხარის ინტერესებში იქნება,“ – განაცხადა სერგეი ლავროვმა.
ავტორი
ეკა ქაჩლიშვილი
