პრაქტიკოსი მასწავლებლებისთვის, რომლებმაც განსაზღვრულ ვადებში ვერ გაიარეს რეგისტრაცია კომპეტენციის დასადასტურებელ გამოცდაზე, აუცილებელი დახმარების გაწევის შესახებ საუბრობს “სტრატეგია აღმაშენებლის” გუნდის განათლების მიმართულების ხელმძღვანელი, ნანა ტოხვაძე და განათლების სამინისტროს შესაბამისი ნაბიჯების გადადგმისკენ მოუწოდებს:
“დახმარება სჭირდებათ პრაქტიკოს მასწავლებლებს, რომლებმაც განსაზღვრულ ვადებში ვერ გაიარეს რეგისტრაცია კომპეტენციის დასადასტურებელ გამოცდაზე. ახალი სქემის მიხედვით, კომპეტენციის არდადასტურების შემთხვევაში, 2021 სასწავლო წლიდან სკოლები უნდა დატოვონ, ხოლო ისინი, ვინც საშემოდგომო გამოცდისთვის რეგისტრაცია ვერ ან არ გაიარა, სამსახურიდან 2020 სასწავლო წლის დასაწყისისთვის გათავისუფლდებიან.
ჩვენი ინფორმაციით, რეგისტრაციის მიღმა დარჩენილია 1500 -ზე მეტი პრაქტიკოსი მასწავლებელი, რომლებისთვისაც პანდემია შემაფერხებელი მიზეზი აღმოჩნდა.
მივმართავთ განათლების სამინისტროს, გაითვალისწინოს ობიექტურად შექმნილი ვითარება და გვერდზე გადადოს დისკრიმინაციული მიდგომა პრაქტიკოსი მასწავლებლების მიმართ,” – აცხადებს ნანა ტოხვაძე.
