“ერთიანი ნაციონალური მოძრაობის” ერთ-ერთმა ლიდერმა, სალომე სამადაშვილმა აშშ-ს მიერ გამოქვეყნებულ დოკუმენტზე მმართველი გუნდის შეფასებები გააკრიტიკა და აღნიშნა, რომ ხელისუფლებამ მოქალაქეებს მოატყუა, როდესაც უთხრა, რომ სტრატეგიული პარტნიორის განცხადება საგანგაშო ხასიათს არ ატარებს და შეშფოთების მიზეზი არ არსებობს. მმართველი გუნდის ოპონენტი, აღნიშნავს, რომ შტატები აქტიურად დააკვირდება 2020 წლის არჩევნებს საქართველოში:
“ჩვენ გვსურს გამოვეხმაუროთ გუშინ გამოქვეყნებულ ამერიკის კონგრესის წარმომადგენელთა პალატის მიერ დამტკიცებულ თავდაცვის ავტორიზაციის აქტის საბოლოო დოკუმენტის ვერსიას. მსურს განვაცხადო, რომ კიდევ ერთხელ და ძალიან ურცხვად მოატყუა საზოგადოება “ქართულმა ოცნებამ”, როდესაც განაცხადა, რომ ამ აქტში არ არის გამოხატული არანაირი შეშფოთება ქვეყანაში არსებულ ვითარებასთან დაკავშირებით, რაც შეეხება კანონის უზენაესობასა და დემოკრატიას.
მსურს ხაზგასმით ვთქვა, რომ ჩვენი დიპლომატიური ურთიერთობების ისტორიაში პირველად, გუშინ გამოქვეყნებულ დოკუმენტში შავით თეთრზე წერია, რომ ამერიკის შეერთებული შტატები ეხმარება საქართველოს საკუთარი სუვერენიტეტის გამტკიცებასა და მათ შორის, თავდაცვის სფეროში შესაძლებლობების განვითარებაში, მაგრამ ამის პარალელურად ითხოვს, რომ უახლოესი 180 დღის განმავლობაში სახელწიფო დეპარტამენტმა წარადგინოს ანგარიში ქვეყანაში არსებულ ვითარებასთან დაკავშირებით, რაც შეეხება ადამიანის უფლებებსა და დემოკრატიას.
ეს გზავნილი ნიშნავს იმას, რომ ამერიკის შეერთებული შტატები მოახლოებულ არჩევნებს დააკვირდება ისეთი ყურადღებით, როგორითაც არ დაკვირვებია არცერთ არჩევნებს დღემდე და პასუხისმგებლობა არჩევნების გაყალბებაზე, არჩევნებში უკანონო ქმედებებზე დაეკისრება ყველა იმ ადამიანს ვინც ამაში მიიღებს მონაწილეობას,” – განაცხადა სალომე სამადაშვილმა.
შეგახსენებთ, რომ ამერიკის შეერთებული შტატების კონგრესის წარმომადგენელთა პალატამ აშშ-ს თავდაცვის ავტორიზაციის აქტში შესწორება შეიტანა და პირველად საქართველო-ამერიკის ურთიერთობის ისტორიაში, ქვეყნის ყველაზე მნიშვნელოვანმა პარტნიორმა გარკვეულ პირობები დააწესა.
ავტორი
მახო ზავრაშვილი
