გიორგი შაქარაშვილის ბიძა, ადვოკატი მირიან ნიკოლაძე ექსპერტიზის დასკვნის გასაჯაროვების შემდეგ, გიორგი შაქარაშვილის ოჯახის პოზიციას გვამცნობს და აღნიშნავს, რომ მათი მოლოდინი გიორგის გარდაცვალების ვერსიაზე გამართლდა, რის გამოც ოჯახი დამნაშავეების დასჯას კატეგორიულად მოითხოვს:
„ექსპერტიზის დასკვნას ოჯახი ძალიან დიდხანს ელოდა, რადგან სწორედ ამ დასკვნის საფუძველზე უნდა დაგვეფიქსირებინა ჩვენი პოზიცია, თუ რამდენად რეალური იყო ოჯახის ვერსია გიორგის განზრახ მკვლელობის ფაქტთან დაკავშირებით.
ექსპერტიზის ამ დასკვნით, ცალსახად არის დადასტურებული, რომ გიორგი შაქარაშვილი მოკლეს. მოკლეს ჩვენი შვილი და შემდეგ მდინარე არაგვში გადააგდეს. დაახლოებით 12 სახის დაზიანება, ბავშვს მიყენებული აქვს სიცოცხლის პერიოდში. ეს უტყუარად ადასტურებს იმას, რომ ბავშვის მიმართ ფიზიკურ ძალადობას ქონდა ადგილი, რასაც შემდგომში მოჰყვა გიორგის მდინარეში გადაგდება.
შეუძლებელია, რომ ის დაზიანებები, რომლებიც ექსპერტიზის დასკვნაშია აღწერილი, ადამიანს თუნდაც იმ ფერდობზე ჩაგორებით, თუნდაც სირბილის ან წაქცევის დროს მიადგეს. ეს არის წარმოუდგენელი.
დღეიდან ოჯახს ექნება კატეგორიული პოზიცია საქართველოს გენერალური პროკურატურისა და შინაგან საქმეთა სამინისტროს მიმართ, რომ ყველა დამნაშავე უნდა მიეცეს სისხლის სამართლის პასუხისგებაში დამამძიმებელ გარემოებაში განზრახ მკვლელობის გამო.
ჩვენ ვითხოვთ კონკრეტული დამნაშავეების დასჯას საქართველოს სისხლის სამართლის კოდექსის 109 მუხლით.
ველოდებით, როდის იქნება წარდგენილი კონკრეტული ბრალდებები და როდის დაისჯებიან დამნაშავეები გიორგის მკვლელობისთვის,“ – აცხადებს მირიან ნიკოლაძე.
ავტორი
ეკა ქაჩლიშვილი
