ხელისუფლების მიერ დაანონსებულ 1 ივლისს ფრენების გახსნასთან დაკავშირებულ საკითხს ეხმაურება პარტია „ახალი საქართველოს“ თავმჯდომარე გიორგი ვაშაძე და აცხადებს, რომ დაპირება, რომელიც მთავრობამ ფრენების აღდგენის თვალსაზრისით მისცა საზოგადოებას ტყუილი აღმოჩნდა, ოპოზიციონერი ლიდერის განმარტებით ეკონომიკა განადგურებულია და მოსახლეობა შიმშილისთვის არის განწირული:
„1 ივლისია და კიდევ ერთი ცრუ დაპირება, რომელიც მოგვცა გიორგი გახარიამ და მთავრობამ, რომ დღეიდან დაიწყებოდა საერთაშორისო ფრენები, არ შესრულდა. ევროკავშირმა 15 უსაფრთხო ქვეყნების სიაში შეგვიყვანა, როგორც ევროკავშირის ასოცირებული წევრი, რომელიც საკუთარ მოქალაქეებს აძლევს შესაძლებლობას, რომ გაფრინდეს ტურისტულად, ბიზნესისათვის და ამასობაში საქართველოს მთავრობა გვეუბნება, რომ კიდევ ერთი თვე საქართველო არ ხსნის საზღვრებს.
მსურს გახარიას მივმართო და ვკითხო: რას გვერჩით შიმშილით გინდათ ამოგვხოცოთ?! ქვეყანა არის უმძიმეს ვითარებაში, ეკონომიკური თვალსაზრისით, ხალხი მშიერია ტურისტული სექტორი ფაქტობრივად განადგურებულია, აღარ გვაქვს ეკონომიკა, საზაფხულო სეზონი ფაქტობრივად ჩააგდეთ.
“Wizz Air” განცხადებას ავრცელებს, რომ საქართველოდან გადის. “Wizz Air”, რომელიც ყველაზე იაფიანი ავიაკომპანიაა, რომელმაც ქუთაისის აეროპორტი ისე მოქოქა, რომ ფაქტიურად შემოსავლის ერთადერთი წყარო იყო ქუთაისისთვის, იმერეთისთვის, დასავლეთ საქართველოსთვის.
ხომ გააკეთეთ დაპირება?! – ჩვენ წარმოგიდგინეთ ალგორითმი იმ ეპიდუსაფრთხოების სტანდარტების, რომლითაც შეიძლებოდა ქვეყანაში ხალხის შემოყვანა. ე.წ კოვიდპასპორტი როგორ უნდა გაცემულიყო ტურისტებზე და თქვენ რამდენიმე დღით ადრე გვეუბნებით, რომ საზღვრებს არ ხსნით.
ადამიანებმა ბილეთები იყიდეს, რომ საქართველოში ჩამოსულიყვნენ, რამდენ ემიგრანტს ჩამოსვლა და დაბრუნება სურდა საქართველოში, ყველა ამ ადამიანმა ფული დაკარგა.
ფაქტია, რომ ნდობა ხელისუფლების მიმართ ძალიან დაბალია. “Wizz Air” რატომ გადის ქვეყნიდან იცით? – იმიტომ, რომ არ სჯერათ, თქვენ ერთ თვეში მაინც თუ გახსნით საზღვრებს. თქვენი მიზანი ის ხომ არ არის შემთხვევით, რომ არჩევნებზე დამკვირვებლები ვერ ჩამოფრინდნენ საქართველოში? და ამ მიზანს გსურთ შესწიროთ ქვეყნის ეკონომიკა?! და შიმშილისათვის გასწიროთ მოქალაქეები?!“ – განაცხადა გიორგი ვაშაძემ.
შეგახსენებთ, რომ მთავრობის მიერ მომზადებული ტურიზმის ანტიკრიზისული გეგმის შესაბამისად ტურიზმის ამოქმედების მე-3 ეტაპზე განსაზღვრული იყო ფრენების აღდგენაც.
ავტორი
თამთა ასლანიშვილი