“ერთიანი ნაციონალური მოძრაობის თავმჯდომარემ”, მომხრეებთან ერთად, ქუთაისში ბრიფინგი გამართა. გრიგოლ ვაშაძემ 2019 წლის 20 ივნისის მოვლენები გაიხსენა და აღნიშნა, რომ ხელისუფლებამ თავისუფლებისმოყვარე ახალგაზრდების დასჯით დიდი შეცდომა დაუშვა:
„შარშან, ზუსტად ამ დღეს, 12 საათიდან 4 საათამდე ვცდილობდით პარლამენტში შესვლას და რომელიმე წევრთან – კობახიძესთან, ვოლსკისთან ან თალაკვაძესთან შეხვედრას, რათა თავიდან აგვეცილებინა ის, რაც შემდეგ მოხდა.
რუსთაველის პროსპექტზე შეიკრიბა სპონტანური, სტიქიური საპროტესტო აქცია, რასაც ხელისუფლებამ დროულად არ მიაქცია ყურადღება და შემდგომ კანონმდებლობის სრული დარღვევით დაარბია, რამაც ახალგაზრდების ჯანმრთელობა შეიწირა. შეცდომა ის იყო, რომ ხელისუფლებამ ვერ გაითავისა ერთი რამ, მოქალაქეებისა და ხელისუფლების დაპირისპირება ყოველთვის მოქალაქეების გამარჯვებით სრულდება,“ – განაცხადა გრიგოლ ვაშაძემ.
შეგახსენებთ, თბილისში 2019 წლის 20 ივნისს საქართველოს პარლამენტის შენობის წინ გამართული საპროტესტო აქცია სამართალდამცველებმა გვიან ღამით დაშალეს, რის შედეგადაც 240 მოქალაქე კლინიკებში გადაიყვანეს. დაშავებულებიდან ორმა თვალი დაკარგა. დაშავებულთაგან იყო 80 პოლიციელებიც. დაზიანებები მიიღო, ასევე, 30-ზე მეტმა ჟურნალისტმა.
ლიკა დევდარიანი
სააგენტო “პარალელის”
რეგიონალური კორესპონდენტი