მე ჩემს მეუღლესთან ერთად საკმაო ფინანსური რესურსი მაქვს დაგროვილი და შექმნილი ჩემს წინა ცხოვრებაში, შესაბამისად ვერავინ, ვერასოდეს ვერც ერთ მაგალითს ვერ მოიყვანს, რომ მე რაღაც 2012 წლის შემდეგ შევიძინე, – ამის შესახებ საქართველოს პრემიერ-მინისტრმა გიორგი გახარიამ, ჟურნალისტებს, ქონებრივი დეკლარაციის შესახებ დასმული კითხვის საპასუხოდ განუცხადა.
როგორც მთავრობის მეთაურმა აღნიშნა, მას საქართველოში 2012 წლის შემდეგ, ერთი ავტომანქანის გარდა, უძრავ-მოძრავი ქონება არ შეუძენია:
„ჩემს დეკლარაციაში ყველაფერი არის დეტალურად, თქვენ შეგიძლიათ ბევრი სპეკულაციები მოიყვანოთ, მაგრამ ამის უკან არაფერი არ არის. თუ ვინმეს, რაიმე კონკრეტული ფაქტი გაქვთ, მოიტანეთ. რეალურად, ეს ყველაფერი ჭორაობაა.
ოპოზიცია ახლა ბევრ რაღაცას ამბობს. სამწუხაროდ, შევედით საარჩევნო ციკლში და სხვა საერთოდ არაფერი შინაარსობრივი პოლიტიკური რომ არ არის, ახლა ამას მოსდევენ.
მე საქართველოში 2012 წლის შემდეგ არანაირი უძრავ-მოძრავი ქონება არ შემიძენია, ერთადერთი მანქანის გარდა, რომელიც ჩემს მეუღლეს შევუძინე. ერთი რამ მინდა გითხრათ, მე, ჩემს მეუღლესთან ერთად, საკმაო ფინანსური რესურსი მაქვს დაგროვილი და შექმნილი ჩემს წინა ცხოვრებაში, შესაბამისად ვერავინ, ვერასოდეს ვერც ერთ მაგალითს ვერ მოიყვანს, რომ მე რაღაც 2012 წლის შემდეგ შევიძინე. ასევე, მაგალითად ჩემმა მშობლებმა გაასხვისეს რაღაც უძრავი ქონება კახეთში, იქ სხვა ადამიანი იყო შემძენი.
უხერხულია, როცა იყიდი, ეს არის პრობლემა, როცა გაყიდი მერე ის ხდება პრობლემა. სადმე რაიმე კანონდარღვევა თუ არის მოიტანეთ ფაქტები“, – განაცხადა გიორგი გახარიამ.
