პოლიტიკური პლატფორმა „ახალი საქართველოს“ თავმჯდომარემ გიორგი ვაშაძემ, თეონა ჭალიძესთან და სოციალური მიმართულების სამსახურის გუნდთან ერთად დევნილების დასახლებაში სოციალურად დაუცველები მოინახულეს და ამ ადამიანების უმძიმესი ცხოვრების პირობებს გაეცნენ. გიორგი ვაშაძემ მოუწოდა პრემიერ-მინისტრს, რომ სახელმწიფომ ყურადღება მიაქციოს ასეთ ადამიანებს.
ოპოზიციონერი ლიდერის განცხადებით უმძიმეს პირობებში მცხოვრებმა ადამიანებმა ვერ ისარგებლეს კომუნალურებზე არსებული სახელმწიფო შეღავათით, გამომდინარე იქიდან, რომ ამ დევნილების კომპაქტურად ჩასახლებულ კორპუსში ბუნებრივი აირი საერთოდ არ არის შეყვანილი და ამიტომ დანახარჯები ელექტრო ენერგიაზე მეტი აქვთ:
„ვიმყოფები, დევნილების კომპაქტურად დასახლებულ კორპუსთან და ასევე სოციალურად დაუცველებთან ვაგზლის ტერიტორიაზე, ყოფილი რიკინიგზის საავადმყოფოს ეზოში. მთავარი პრობლემა აქვთ, რომ ყველამ ისარგებლა კომუნალური ვაუჩერებით, ამ ოჯახების გარდა, მაგალითად ბუნებრივი აირი არ არის შეყვანილი და შესაბამისად ელექტრო ენერგიაზე მეტი დანახარჯია, სწორედ, ამიტომ ამ შეღავათებით ვერ ისარგებლეს.
ამ ეტაპზე მიმდინარეობს განცხადებების დაწერა და 25-ზე მეტი განცხადება უკვე დაიწერა.
დაწმუნებული ვარ, რომ გვიყურებს გახარია და მიაქციეთ ამ ადამიანებს ყურადღება, მობრძანდით და ნახეთ რა პირობებში ცხოვრობენ ეს ადამიანები, ხალხი არის გამწარებული,“ – აცხადებს გიორგი ვაშაძე.
მოსახელობა გიორგი ვაშაძესთან საუბარში აღნიშნავს, რომ მათ ბევრი პრობლემა აქვთ, გარდა იმისა, რომ საცხოვრებელი პირობები ძალიან მძიმე აქვთ, ავარიული შენობაა და ბავშვების უსაფრთხოება, სადაც დაახლოებით 200 ბავშვი ცხოვრობს, არ არის დაცული. შენობაში არ არის ბუნებრივი აირი და შესაბამისად გადააჭარბეს დადგენილ ზღვარს და კომუნალური შეღავათებით მათ შორის ელექტროენერგიის შეღავათითაც ვერ ისარგებლეს.
„ახალი საქართველოს“ სოციალური მიმართულების ხელმძღვანელი თეონა ჭალიძე აღნიშნავს, რომ ადამიანებმა, რომლებმაც ვერ ისარგებლეს კომუნალური შეღავათებით, შეაგროვებენ შესაბამის განცხადებებზე ხელმოწერებს და მთავრობის კანცელარიაში მიიტანენ:
„ვინც ვერ ისარგებლა კომუნალური შეღავათით იმ სოციალურად დაუცველ და გაჭირვებულ ოჯახებს ვაწერინებთ და განცხადებებს შევიტანთ მთავრობის კანცელარიაში, რომ გაიგოს პრემიერ-მინისტრმა ასობით ოჯახი დარჩა ამ დახმარების გარეშე, იმიტომ რომ მხოლოდ დენი აქვთ და ბუნებრივი აირი არა, შესაბამისად გადააჭარბეს იმ ზღვარს რაც დადგენილი იყო.
ასევე ბევრი ოჯახია, რომელსაც ინდივიდუალური მრიცხველი საერთოდ არ აქვს და ლოგიკური იქნებოდა ეს შეღავათი ოჯახებზეც ყოფილიყო მიბმული და არა მხოლოდ მრიცხველებზე.
მოვითხოვთ ამ ოჯახებისთვისაც დახმარების გასაწევად ქმედითი ნაბიჯების გადადგმას.
ჩვენი მოძრავი ოფისი დღეს კიდევ რამდენიმე მისამართზე მივა,“ – აცხადებს თეონა ჭალიძე.
ავტორი
თამთა ასლანიშვილი
