ქუთაისის საკრებულოს ფრაქცია „ერთიანი ნაციონალური მოძრაობის“ თავჯდომარემ, გიგა შუშანიამ ბრიფინგი გამართა, სადაც ქუთაისის ტორპედოს გარშემო არსებულ პრობლემებზე ისაუბრა. შუშანიას თქმით, ქუთაისის ტორპედო დღემდე ფინასურ კრიზისშია, რადგან სახელმწიფომ ნაკისრი ვალდებულებები არ შეასრულა:
„ქუთაისის ტორპედოს იტალიელი ინვესტორის მფლობელობაში გადასვლის და ფინანსური პრობლემების მოგვარების შესახებ, 5 თვის თავზეც ვერ მოხერხდა „ქუთაისის ტორპედოს“ ინვესტორისათვის გადაცემა და ის კვლავ ქუთაისის მერიის საკუთრებაშია. გუნდის რამოდენიმე მილიონიანი დავალიანება კი ისევ დაუფარავია.
სახელმწიფომ ნაკისრი ვალდებულებები არ შეასრულა, რაც დავალიანების ნაწილის დაფარვას გულისხმობდა, რის გამოც ვერ ხერხდება კლუბის იტალიელ ინვესტორზე გადაცემა. აღნიშნული მიზეზით მან კლუბის დაფინანსება შეწყვიტა. ჩვენ მიგვაჩნია, რომ მთელი ეს კორუფციული სქემა, გუნდის და ქუთაისის ტორპედოს გულშემატკივართა შეცდომაში შეყვანა ემსახურებოდა ერთადერთ მიზანს, რომ რამოდენიმე მილიონიანი დავალიანება ჩამოწეროდა გუნდის წინა მფლობელს, ზაზა ჩაჩავას, რომელიც ლევამ კობიაშვილის მფარველობით სარგებლობს. მისი კომპანია „კრისტალბეთი“ კი ფეხბურთის ფედერაციის მთავარი სპონსორია. შედეგად მივიღეთ ის, რომ ქუთაისის ტორპედო კვლავ მფლობელის გარეშე და ფინანსურ კრიზისშია, ხოლო მხარეები კი ერთმანეთისკენ იშვერენ ხელს.
ჩვენ ფეხბურთის ფედერაციისაგან მოვითხოვთ, სასწრაფოდ მოხდეს სახელმწიფოს მიერ აღებული ვალდებულების შესრულება, რათა დროულად მოხდეს ინვესტორისათვის კლუბის გადაცემა და ფეხბურთელთა დავალიანების გასტუმრება, მით უფრო რომ სახელმწიფო ბიუჯეტიდან 211 მილიონი ლარია გამოყოფილი სწორედ კლუბების დასახმარებლად და არა კობიაშვილის და მისი მეგობრების ფინანსური ინტერესების დასაკმაყოფილებლად,“ – განაცხადა გიგა შუშანიამ.
ავტორი
ლიკა დევდარიანი
სააგენტო “პარალელის”
რეგიონალური კორესპონდენტი
