“ერთადერთი რაც შერჩათ “ნაცებს” – დასავლეთის ჯერ კიდევ შემორჩენილი მხარდაჭერა, რომელიც ნელნელა ილევა” – ზაალ ანჯაფარიძე

ანალიტიკოსი ზაალ ანჯაფარიძე მძიმე შეფასებებს აფიქსირებს “ნაციონალურ მოძრაობასთან” დაკავშირებით და კონკრეტულ ვარაუდებს გამოთქვამს:

“14 წელია “ნაცმოძრაობა” ოპოზიციაშია, და ერთხანს, მათ შორის “ქ/ოცნების” იძულებითი კოჰაბიტაციის წყალობით, ინარჩუნებდა მთავარი ოპოზიციური ძალის სტატუსს, რაც მისთვის ერთგვარი “კომფორტის ზონაც” იყო.

თუმცა, ამ ხნის მანძილზე ნაცმოძრაობამ განვითარების ნაცვლად დეგრადაცია განიცადა, მოჩვენებითი პოლიტიკური რებრენდინგი და ახალი სახეების მოყვანა სრული კრახით დასრულდა. ახლები ძველებს არაფრით სჯობდნენ, ხშირად მათზე უარესებიც აღმოჩნდნენ.

სააკაშვილის საქართველოში დაბრუნებამ და შემდეგ ციხეში მისმა ტყლარჭვებმა და სამარცხვინო სიმულაცია-აგრავაციებმა, მიწასთან გაასწორეს მისი პოლიტიკური იმიჯი, მორალურზე, რომ არაფერი ვთქვათ.

შესაბამისად, მისი “ლიდერობა” რომლის რეანიმაციასაც ცდილობს, დასრულებულია. ახალი ლიდერი კი ნაცებს არ და ვერ ეყოლებათ, და ვერც ნანულა გამოდგება ამ როლზე.

ერთადერთი რაც შერჩათ “ნაცებს” – დასავლეთის ჯერ კიდევ შემორჩენილი მხარდაჭერა, რომელიც ნელნელა ილევა, რადგანაც დასავლეთი საქართველოს პოლიტიკურ ველზე მათ ნაცვლად ახალი მოთამაშეების შემოყვანას გეგმავს“, – წერს ფეისბუქის პირად გვერდზე ზაალ ანჯაფარიძე.