თბილისის მერიისა და საქართველოს განათლების, მეცნიერების, კულტურისა და სპორტის სამინისტროს მხარდაჭერით, დედაქალაქი, 28 თებერვლიდან 2 მარტის ჩათვლით, თბილისის 22-ე ჯაზფესტივალს უმასპინძლებს. ამასთან დაკავშირებით, “თიბისი გალერეაში” თბილისის პრესკონფერენცია გაიმართა, რომელსაც თბილისის მერის მოადგილე სოფიო ხუნწარია, საქართველოს განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი, კომპანია “ისთერნ პრომოუშენსის” დირექტორი გიორგი კერესელიძე და “თიბისი ბანკის” მარკეტინგის დირექტორი ნინო ეგაძე უძღვებოდნენ.

სოფიო ხუნწარიამ ჯაზფესტივალის ფარგლებში დაგეგმილ პროექტებზე ისაუბრა.

“თბილისი არის საფესტივალო ქალაქი და ის აუცილებლად გახდება რეგიონში კულტურის დედაქალაქი. ამას ცხადყოფს ის მნიშვნელოვანი ფაქტი, რომ თბილისში ჩამოდის ლეგენდარული მუსიკოსი და გიტარისტი პეტ მეთინი. გულშემატკივრები 15 წელი ელოდნენ, რომ პეტ მეთინი ჩამოსულიყო თბილისში და ღია ცის ქვეშ დაეკრა. ასევე, ხაზი უნდა გავუსვა მნიშვნელოვან ტრადიციას, რომელსაც წელს ჩაეყრება საფუძველი: თბილისის ბიგ ბენდთან ერთად დაუკრავენ კონსერვატორიის სტუდენტები და სწორედ ისინი გახსნიან თბილისის ჯაზფესტივალს. ეს ტრადიცია მომდევნო წლების განმავლობაშიც გაგრძელდება” – განაცხადა თბილისის მერის მოადგილემ.

წლევანდელი ფესტივალის წამყვანი მონაწილეა 20 გრემის ჯილდოს მფლობელი, ლეგენდარული ამერიკელი ჯაზ გიტარისტი პეტ მეთინი. ფესტივალში, ასევე, მონაწილეობას მიიღებენ თბილისის სიმფონიური ორკესტრი, ვახტანგ კახიძის დირიჟორობით, თბილისის მერიის ბიგ ბენდი და კონსერვატორიის ჯაზის ფაკულტეტის სტუდენტები, რევაზ კიკნაძის ხელმძღვანელობით.

თბილისის 22-ე ჯაზ ფესტივალი 28 თებერვალს, კონსერვატორიის დიდ დარბაზში ახალი პროექტით Tbilisi Big Band & New Jazz Generation გაიხსნება. ეს იქნება კონცერტი, სადაც ძველი თაობა შეხვდება ახალს და სხვადასხვა თაობის მუსიკოსები მსმენელს ჯაზურ კომპოზიციებს შესთავაზებენ.

1 მარტს კი “ივენთ ჰოლის” სცენას, ლეგენდარული პეტ მეთინის ტრიო დაიკავებს, რომლის შემადგენლობაში, ცნობილ ჯაზგიტარისტთან ერთად, მუსიკოსები დერეკ ოლეჟკიევიჩი და ჯონათან ბარბერი არიან.

ფესტივალი 2 მარტს, თბილისის საკონცერტო დარბაზში, პეტ მეთინისა და თბილისის სიმფონიური ორკესტრის ერთობლივი კონცერტით დაიხურება.

უნიკალური პროექტის ფარგლებში, ლეგენდარული პეტ მეთინი მსმენელის წინაშე პროექტით – Missouri Skies and More წარდგება.

“ახალი საქართველოს” განათლების მიმართულების ხელმძღვანელი განცხადებას ავრცელებს. ნანა ტოხვაძეს მიაჩნია, რომ განათლების სისტემაში მიმდინარე ცვლილებები პოლიტიკური ბლეფია, რომელიც “ქართული ოცნების” ელექტორატის გაზრდას ემსახურება და არ არის გათვლილი მომავალი თაობის ინტერესებზე:

“განათლების სისტემაში მიმდინარე ცვლილებები 2 ძირითად მიზანს ემსახურება, ერთის მხრივ “ქართული ოცნების” ელექტორატის გაზრდას და მხარდამჭერთა მოხვეჭას 2020 წლის არჩევნებისთვის, ხოლო მეორე მხრივ დაბალკვალიფიციური უნივერსიტეტების წისქვილზე წყლის დასხმას, სადაც კერძო ფინანსურ ინტერესებს და ადგილების შევსებას უნდა ემსხვერპლოს მომავალი თაობა და მათი ოჯახების შემოსავლები.

ჩვენი საზოგადოება გზადაგზა მოფიქრებული და გაუაზრებელი ცვლილებების მომსწრეა, რომელიც ამოქმედებას ვერ ასწრებს, რომ უკვე გაუქმებულია. ასეთია, მაგალითისთვის, ე.წ. “ანონიმური ყუთები”, რომლის გაუქმებაც თავისთავად სასიხარულო ფაქტია. საქართველოს საკანონმდებლო მაცნეზე 30 იანვარს გამოქვეყნდა განათლების მინისტრის, მიხეილ ბატიაშვილის ბრძანება 06/ნ საგანმანათლებლო დაწესებულებაში უსაფრთხოების წესის დამტკიცების შესახებ, რომლის მე-6 მუხლით გაწერილი დირექციების ვალდებულება “ანონიმური ყუთით” სკოლის უზრუნველყოფის თაობაზე უკვე მოხსნილია, როგორც ამას მანდატურის სამსახურის ხელმძღვანელი, გელა გელაძე ადასტურებს.

იმედს ვიტოვებთ, მინისტრის ბრძანება ნამდვილად გაუქმდება და შევძლებთ ანონიმური ყუთების, როგორც საბჭოთა გადმონაშთის, თავიდან აცილებას. თანამედროვე სკოლა მოზარდს უნდა ასწავლიდეს საკუთარი და სხვისი უფლებების გამჭვირვალედ, ღიად და თამამად დაცვას“ – განაცხადა ნანა ტოხვაძემ.

დავიწყებ იმით, რომ უკრაინაში მიმდინარე სოციალურ-პოლიტიკურ პროცესებს გარკვეულწილად ყოველთვის ჰქონდა გავლენა საქართველოს სახელმწიფოზე. გამონაკლისი არც უკრაინის მართლმადიდებლური ეკლესიისთვის ავტოკეფალიის მინიჭებაა. პოლიტიკურმა ლიდერებმა უკვე გამოთქვეს მოსაზრებები ამ საკითხზე, რასაც აზრთა სხვადასხვაობა მოჰყვა.
საქართველოს პრემიერ-მინისტრმა და პრეზიდენტმა ერთხმად გადაწყვიტეს, რომ, საპატრიარქოსთან შეთანხმების გარეშე, თავი შეეკავებინათ რაიმე სახის განცხადებების გაკეთებისგან.

აქვე გასათვალისწინებელია შემდეგი გარემოებები:

• მნიშვნელოვანია გავითვალისწინოთ საქართველოს კონსტიტუცია, სადაც ერთი თავი სწორედ მართლმადიდებლური ეკლესიის ღვაწლს და მის დამოუკიდებლობას ეხება. გარდა ამისა, კონსტიტუციურად გარანტირებულია რელიგიური თავისუფლება. სწორედ ამიტომ, პოლიტიკურად მნიშვნელოვანი ბერკეტი არ აქვს საქართველოს საპატრიარქოს, რომ მისმა გადაწყვეტილებამ რაიმე სახით გავლენა მოახდინოს ამ ორი ქვეყნის ურთიერთობაზე;
• მაგრამ, თუ საქმე შეეხება უშუალოდ საპატრიარქოს და მის მრევლს, უნდა ითქვას, რომ ამ მხრივ ძალიან დიდი გამოწვევა ექნება მართლმადიდებელ ეკლესიას. მიუხედავად იმისა, რომ პოლიტიკური ძალა არ გააჩნია საპატრიაქოს, უნდა გავითვალისწინოთ მისი მრევლი, რომელიც ამასთან ერთად ამომრჩეველთა უდიდესი ნაწილია და რომელიც მძაფრად რეაგირებს ამგვარ საკითხებზე.

ამიტომაც, აღნიშნულ საკითხთან მიმართებაში აუცილებელია, რომ დროულად მოხდეს კონკრეტული პოზიციის დაფიქსირება, მით უფრო ხელისუფლების მხრიდან.

ნიკა ჩაბაიძე

ტვ “პირველზე” თოქ-შოუ “რეაქციაში” პარლამენტის თავმჯდომარე, ირაკლი კობახიძემ ე.წ. “კაბელების საქმეზე” საუბრისას განაცხადა: “რაც შეეხება “კაბელებს”, მაგ დროისათვის ვიყავი უკვე აღმასრულებელი მდივანი, პოლიტიკურად აწეული იყო ეს თემა, დავინტერესდი, ჩავიხედე ბოლომდე და იქ იყო დანაშაულის არა თუ ნიშნები, მკაფიოდ გამოხატული დანაშაული იყო, საუბარი იყო მილიონების მითვისებაზე“.

პარლამენტის თავმჯდომარის ამ განცხადებაში აღნიშნულ ქმედებაში დანაშაულის ნიშნები დაინახა პარტია “თავისუფალი დემოკრატების” წევრმა, ადვოკატმა ლევან სამუშიამ:

“ირაკლი კობახიძემ პირდაპირ ეთერში აღიარა ის დანაშაული, რომელიც მისმა გუნდმა ჩაიდინა. ეს არის ძალიან მძიმე დანაშაული, სახელმწიფო საიდუმლოების შესახებ ინფორმაციის გატანა.

სამოქალაქო პლატფორმა “ახალი საქართველოს” სოციალური სამსახურის ხელმძღვანელი, თეონა ჭალიძე ეხმიანება სოციალური მომსახურების სააგენტოში დამკვიდრებულ პრაქტიკას, ოჯახის წევრის დაპატიმრების გამო ოჯახის სხვა წევრებს საარსებო შემწეობას რომ უხსნიან, ასაჯაროვებს კონკრეტულ ფაქტს და მიმართავს ხელისუფლებას და საზოგადოებას:

“უკვე მესამე წელია, “ახალი საქართველოს” სოციალური სამსახური ვითხოვთ მინისტრისგან დავით სერგეენკოსგან ამ მავნებლობის შეცვლას. ბავშვებმა რა დააშავეს რამდენიმე თვით რომ ულუკმაპუროდ ტოვებთ?!

რამდენიმე ასეული ბავშვი მსგავსი პრობლემის წინაშე დგება ყოველ წელს.

დღეს ოთხი ბავშვი შიმშილობს აბასთუმანში, იმის გამო, რომ სახელმწიფომ მამის დაპატიმრების გამო ისინი დასაჯა. დიახ, დედასთან ერთად გაუსაძლის პირობებში ოთხი ბავშვი სიცივეში ცხოვრობს აბასთუმანში და მშიერია. მათ შორის 5 თვის პატარაცაა. ოჯახს სჭირდება საკვები, შეშა“.

თეონა ჭალიძე ხელისუფლებას პასუხისმგებლობის გრძნობის ამაღლების მხრივ მიმართავს, ხოლო საზოგადოებას – ქველმოქმედების გაწევის თხოვნით, რომ უკიდურესად გაჭირვებული ოჯახი არ დადგეს უკვე ტრაგიკული განსაცდელის წინაშე:

“ვისაც შეგიძლიათ შეეხმიანეთ დედას 574086096 (ნესტანი). პოსტი კი გააზიარეთ, რომ შეიგნოს დავით სერგეენკომ, არ შეიძლება ოჯახის წევრის დაპატიმრება, ოჯახის სხვა წევრებისთვის საარსებო შემწეობის შეჩერების მიზეზი გახდეს!! მარტამდე ამ ბავშვებს რამე რომ დაემართოთ ვინ აგებს პასუხს???!!“

თითქმის ხუთი თვეა, რუსთაველის გამზირზე საქართველოს პარლამენტის წინ, უწყვეტ რეჟიმში, პროტესტის სხვადასხვა ფორმას მიმართავენ შვილმოკლული მამები, რათა ხმა მიაწვდინონ ხელისუფლებას და დაისაჯონ დამნაშავეები, მკვლელები, თუმცა ამ ხნის განმავლობაში პრაქტიკულად არაფერი გაკეთებულა სიმართლის დასადგენად. თვეებია იბრძვიან სიმართლისთვის ზაზა სარალიძე და მალხაზ მაჩალიკაშვილი, თვეების განმავლობაში მათთან ერთად ელოდებიან კანონის აღსრულებას შვილმოკლული მამების თანამებრძოლები და სრულიად საქართველო. ამ ხნის განმავლობაში არაერთი დამცირება და შეურცხყოფა მიუყენებიათ ამ გაუბედურებული ოჯახებისთვის, მათი მოკლული შვილების სახელისთვის, იყო დევნაც და პროვოკაციაც, კარვების დადგმაში უკანონოდ ხელის შეშლა და არც თუ იშვიათად ცინიკური დამოკიდებულებაც…

დღეს კიდევ ერთხელ გამოხატეს პროტესტი შვილმოკლულმა მამებმა და მდუმარე აქციით შეეცადნენ პარლამენტარების ყურადღების მიპყრობა, რომლებმაც, მოქმედი ხელისუფლების პირობებში, თითქმის 7 წლის შემდეგ პირველად გახსნეს სესია თბილისში მდებარე სასახლეში.

ამ საპროტესტო აქციის მიზანი იყო პარლამენტის როლის გააქტიურება თემირლან მაჩალიკაშვილის მკვლელობის გამოძიების მიმართულებით და პარლამენტარებისგან მოითხოვეს დროებითი საგამოძიებო კომისიის შექმნა.

IX მოწვევის საქართველოს პარლამენტის 2019 წლის საგაზაფხულო სესია, რეგლამენტით დადგენილი წესით (შეტანილი ცვლილებების შესაბამისად), ხელისუფლებაში “ქართული ოცნების” მოსვლის შემდეგ პირველად ჩატარდა (გაიხსნა) თბილისში მდებარე სასახლეში.

“პარლამენტის ახალი რეგლამენტის თანახმად, დღეს საქართველოს მოსახლეობის წინაშე წარვდგები პარლამენტის 2018 წლის ანგარიშით და ვისაუბრებ 2019 წლის გეგმებზე. ამ ტრადიციით, რომელსაც ჩავუყარეთ საფუძველი, საზოგადოებას ექნება შესაძლებლობა უკეთ გაეცნოს უმაღლესი საკანონმდებლო ორგანოს საქმიანობას” – პარლამენტის საქმიანობის ყოველწლიური ანგარიშისა და სამომავლო გეგმების წარდგენისას განაცხადა პარლამენტის თავმჯდომარემ, ირაკლი კობახიძემ.

საქართველოს პარლამენტის თავმჯდომარემ სიტყვით გამოსვლისას, უმაღლესი საკანონმდებლო ორგანოს მიერ განხორციელებული კანონშემოქმედებითი საქმიანობა შეაჯამა და სამომავლო გეგმებზე ისაუბრა. მისი შეფასებით, ამ მიმართულებით, 2018 წელი ნაყოფიერი იყო.

“ამ პერიოდში საქართველოს პარლამენტის მიერ მიღებულ იქნა 705 კანონი, მათ შორის, 294 ინიცირებული იყო პარლამენტის შესაბამისი სუბიექტების მიერ. თუმცა, დღეს ამ დარბაზში არ აქვს გადამწყვეტი მნიშვნელობა ვინ იყო ამა თუ იმ კანონპროექტის წარმდგენი, მთავარია, რომ თითოეული კანონი იქმნებოდა ქვეყანაზე, საქართველოს მოქალაქეებზე ზრუნვის, თითოეულ ოჯახში კეთილდღეობის შეტანის სულისკვეთებით” – განაცხადა ირაკლი კობახიძემ.

„ტერიტორიული მთლიანობის აღდგენა, სამშვიდობო პოლიტიკის განხორციელების კვალდაკვალ, უწინდებურად რჩება ქართული სახელმწიფოს უმთავრეს პრიორიტეტად“ – აღნიშნა პარლამენტის თავმჯდომარემ

ირაკლი კობახიძის თქმით, სწორედ ამ გამოწვევის გათვალისწინებით, მიღებულ იქნა საკანონმდებლო ცვლილებათა პაკეტი, „ნაბიჯი უკეთესი მომავლისკენ“, რომელიც აფხაზეთისა და ცხინვალის რეგიონის ტერიტორიებზე მცხოვრებ პირთათვის საქართველოს სახელმწიფო სერვისებისა და განათლების პროგრამების ხელმისაწვდომობის გაუმჯობესებას, ასევე, საქართველოს დანარჩენ ტერიტორიაზე მცხოვრებ საზოგადოებასთან მათ ეკონომიკურ და სოციალურ ინტეგრაციას ემსახურება.

საქმიანობის ანგარიშის წარდგენისას, პარლამენტის თავმჯდომარემ ყურადღება გაამახვილა განათლების სფეროში განხორციელებულ საკანონმდებლო ცვლილებზე და აღნიშნა, რომ ამ მიმართულებით, პარლამენტი, ტრადიციულად, განსაკუთრებულ ყურადღებას იჩენს.

საპარლამენტო უმცირესობის წევრმა, პარლამენტის თავმჯდომარის მოადგილემ, სერგი კაპანაძემ კი ისაუბრა სკოლის დამამთავრებელი გამოცდების გაუქმებასა და ზოგადი უნარების გამოცდის არჩევითობაზე.

მისი განცხადებით, აღნიშნული ნაბიჯით დარტყმა მიადგა განათლების რეფორმის, ბოლო წლებში ერთ-ერთი ყველაზე წარმატებული რეფორმის მნიშვნელოვან ფუნდამენტს, რომელსაც თავისი ხარვეზები ჰქონდა, თუმცა ეს გადაწყვეტილება არ ემსახურება არსებული ხარვეზების გამოსწორებას. როგორც საპარლამენტო უმცირესობის წევრმა აღნიშნა, უახლოეს დღეებში იგი აპირებს საკანონმდებლო ინიციატივის ინიცირებას, რომლითაც ზოგადი უნარების ტესტი სავალდებულო გახდება კანონის დონეზე.

ფრაქცია “საქართველოს პატრიოტების” წევრი, პარლამენტი თავმჯდომარის მოადგილე ირმა ინაშვილი, თავის განცხადებაში, პირადი ცხოვრების ამსახველი ჩანაწერების გავრცელების ფაქტს შეეხო და აღნიშნა, რომ პარლამენტში უნდა შეიქმნას ჯგუფი, რომელიც შესაბამისი კანონმდებლობის გამკაცრებაზე იმუშავებს.

საქართველოს პარლამენტის საგაზაფხულო სესიის პირველივე სხდომაზე ერთიანი ნაციონალური მოძრაობა გამოვიდა ინიციატივით, რომ თემირლან მაჩალიკაშვილის მკვლელობის საქმეზე პარლამენტში შეიქმნას დროებითი საგამოძიებო კომისია. ფრაქციამ აღნიშნული მოთხოვნა უკვე დაარეგისტრირა პარლამენტში.

– პროფესიული განათლების რეფორმის მომდევნო, სამწლიანი, ფაზის პერიოდში გათვალისწინებულია ახალი საგანმანათლებლო სერვისების შეთავაზება, როგორც ახალგაზრდების ასევე ზრდასრული მოსახლეობისათვის.

– ზოგადი განათლების ინტეგრაციის ხელშეწყობა, საბაზო განათლების მქონე ახალგაზრდებს (9 კლასი) საშუალებას მიეცემათ, პროფესიის შესწავლის პარალელურად, სრული ზოგადი განათლება მიიღონ.

საფერავის პირველი საერთაშორისო კონკურსის დაჯილდოების ცერემონია წინანდალში, სასტუმრო „რადისონ ქოლექშენში“ გაიმართა. კონკურსში გამარჯვებულ კომპანებსა და მცირე მარნებს ოქროს, ვერცხლის და ბრინჯაოს დიპლომები გადაეცათ.

ღონისძიების სტუმრებს საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა მიმართა. მინისტრის განცხადებით, საფერავის საერთაშორისო კონკურსის მიზანი საფერავის, როგორც წამყვანი ქართული ვაზის ჯიშის და მისგან წარმოებული მრავალფეროვანი ღვინოების ცნობადობის ამაღლება მთელ მსოფლიოში.

“ეს არის ძალიან მნიშვნელოვანი ტრადიციის დასაწყისი. საფერავი განსაკუთრებულ ადგილს იკავებს ქართულ მეღვინეობაში. ჩვენ ვფიქრობთ, რომ საფერავი გახდება ლიდერი ქართული ღვინის ახალ ბაზრებზე. სწორედ ამ ჯიშის და მისგან დამზადებული ღვინოების პოპულარიზაცია არის ჩვენი მთავარი ამოცანა, რაშიც საფერავის საერთაშორისო კონკურსი დიდ წვლილს შეიტანს” – აღნიშნა ლევან დავითაშვილმა.

კონკურსის ფარგლებში მინისტრმა დამსახურებული მეღვინეებიც დააჯილდოვა. წელს ეს წოდება მერაბ მიქაშავიძემ, თეიმურაზ გონჯილაშვილმა, დავით მაისურაძემ, გიორგი დაქიშვილმა და დავით მაღრაძემ მიიღეს. 

შეგახსენებთ, რომ ასოციაცია „ქართული ღვინო“-ს, გარემოს დაცვისა და სოფლის მეურნეობის სამინისტროს და ღვინის ეროვნული სააგენტოს ორგანიზებით, საფერავის პირველი საერთაშორისო კონკურსი გასული წლის 15-16 დეკემბერს თბილისში გაიმართა. კონკურსში მონაწილეობას ადგილობრივი და უცხოელი მწარმოებლები იღებდნენ. გამარჯვებულები უცხოელი და ქართველი ღვინის ექსპერტებისგან დაკომპლექტებულმა ჟიურიმ გამოავლინა. კონკურსზე 87 კომპანიის 200-მდე ნიმუში იყო წარმოდგენილი. ჟიურის თავმჯდომარე ცნობილი ბრიტანელი ჟურნალისტი და ღვინის მწერალი, ენდრიუ ჯეფორდი იყო.

ოქროს მედალოსანი ღვინოები

ვერცხლის მედალოსანი ღვინოები

ბრინჯაოს მედალოსანი ღვინოები

პირადი ცხოვრების ამსახველი ვიდეოჩანაწერების გავრცელებასთან დაკავშირებით ბრიფინგი გამართა შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორმა ვლადიმერ ბორცვაძემ:

შინაგან საქმეთა სამინისტროს ცენტრალური კრიმინალური პოლიციის დეპარტამენტში მიმდინარეობს გამოძიება პირადი ცხოვრების ამსახველი ვიდეოჩანაწერის გავრცელების ფაქტზე.

ჩატარებული ოპერატიულ-საგამოძიებო მოქმედებების შედეგად, აღნიშნული ვიდეოჩანაწერის შენახვის და გავრცელების ბრალდებით, საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით დაკავებულია 16 პირი.

გამოძიებით დადგინდა, რომ აღნიშნული პირები სოციალური ქსელის და მობილური ინტერნეტაპლიკაციის მეშვეობით ინახავდნენ და მასობრივად ავრცელებდნენ პირადი ცხოვრების ამსახველ ვიდეოჩანაწერს.

საზოგადოებას შევახსენებთ, რომ ადამიანების პირადი ცხოვრების ამსახველი მასალის უკანონო მოპოვება, შენახვა და გავრცელება სისხლის სამართლის დანაშაულია. სისხლის სამართლის წესით ისჯება პირადი ცხოვრების ამსახველი მასალის როგორც ნებისმიერი საშუალებით გავრცელება (მათ შორის მობილური აპლიკაციის მეშვეობით გადაგზავნა), ასევე, მისი შენახვა, რაც ისჯება 4-დან 8 წლამდე ვადით თავისუფლების აღკვეთით.

მოვუწოდებთ საზოგადოებას, არ ჩაერთონ დანაშაულებრივ საქმიანობაში და შეწყვიტონ მსგავსი ვიდეოჩანაწერის ნებისმიერი სახით გავრცელება. წინააღმდეგ შემთხვევაში, სამართალდამცავი ორგანოების მხრიდან მიღებული იქნება კანონით გათვალისწინებული ზომები.

გამოძიება გრძელდება პირადი ცხოვრების ამსახველი ვიდეოჩანაწერის გამავრცელებელი სხვა პირების დასადგენად.

ყველა იმ პირის მიმართ, ვინც გამიზნულად ან სხვაგვარად ახდენს პირადი ცხოვრების ამსახველი მასალების გავრცელებას, შინაგან საქმეთა სამინისტრო იძულებული იქნება გაატაროს საქართველოს კანონმდებლობით გათვალისწინებული ზომები.