„სტრატეგია აღმაშენებლის“ ლიდერი გიორგი ვაშაძე პრემიერ-მინისტრის გიორგი გახარიას განცხადებას აბსურდულს უწოდებს და აცხადებს, რომ ის ვერ დაადანაშაულებს მედიასა და ოპოზიციას ზუგდიდის წარუმატებელ ოპერაციაში და ვერც უარყოფს იმ კატასტროფულ მდგომარეობას, რაც „ქართული ოცნების“ რეჟიმმა მოუტანა ქვეყანას. ვაშაძის განცხადებით, არჩევნების შემდეგ აღარ მოუსმენენ პრემიერის ტყუილებს, ქართველი ხალხი აღსდგება „დამსხვრეული ოცნებების“ და „ქართული ოცნების“ ტყუილების წინააღმდეგ და ხმას უკეთეს მომავალსა და კეთილსინდისიერ პოლიტიკოსებს მისცემს:

„პრემიერ-მინისტრის დღევანდელი განცხადება აბსურდზე მეტია – ის მედიასა და ოპოზიციას ადანაშაულებს ზუგდიდის წარუმატებელ ოპერაციაში და კიდევ ერთხელ უარყოფს იმ კატასტროფულ მდგომარეობას, რაც მისმა რეჟიმმა მოუტანა საქართველოს. არცერთ სხვა ქვეყანაში ხელისუფლებას ვერ გაექცეოდა დამნაშავე, ასე იოლად, ნახევარი მილიონი დოლარით ხელში და არცერთ სხვა ქვეყანაში არ დადის ყოველი სამი დამნაშავიდან ორი ასე თავისუფლად ქუჩებში, როგორც ეს საქართველოში ხდება. ეს „ნორმალურად“ ითვლება მას შემდეგ, რაც „ქართული ოცნება“ მოვიდა ხელისუფლებაში.

გასული 4 წლის განმავლობაში კრიმინალი გაორმაგდა ქვეყანაში. მხოლოდ შარშანდელი წელი რომ ავიღოთ, 40000 დამნაშავე ვერ დაიჭირა ამ მთავრობამ. მას შემდეგ, რაც „ქართული ოცნება“ ხელისუფლებაშია, კანონის უზენაესობა კრიმინალურმა კანონებმა ჩაანაცვლეს. გახარიას მორიგი აბსურდული განცხადება რა იქნება? ისევ ოპოზიციას დაადანაშაულებს იმაში, რომ მილიონზე მეტი ადამიანი ცხოვრობს სიღარიბეში? მედიის ბრალია, რომ პენსიონერებს საჭმლისა და წამლის საყიდლად საბანკო სესხის აღება უწევს? „ქართული ოცნების“ პარტიის ყველაზე დიდ შემომწირველს სანტა კლაუსმა მისცა 45 მილიონი კორონა კრიზისის დროს გამარტივებული შესყიდვის წესით? შაბათს, არჩევნების შემდეგ ჩვენ, ამ ქვეყნის მოქალაქეები, მის ტყულებს აღარ მოვისმენთ.

ჩვენ ჩავანაცვლებთ ამ ფულის მკეთებლების გუნდს ჩვენი, საქმის-მკეთებლების გუნდით და შემდეგ საკუთარ თავზე ავიღებთ პასუხისმგებლობას: ჩვენ დავალაგებთ ამ არეულ-დარეულობას, რაც „ქართულმა ოცნებამ“ დატოვა. ჩვენ დავამარცხებთ სიღარიბესა და კრიმინალს და ქვეყნის აღმშენებლობას დავიწყებთ. ცვლილებები ახლოს არის. ქართველი ხალხი აღსდგება დამსხვრეული ოცნებების და „ქართული ოცნების“ ტყუილების წინააღმდეგ და ხმას უკეთეს მომავალსა და კეთილსინდისიერ პოლიტიკოსებს მისცემს. ჩვენ ერთად ხელახლა ავაშენებთ საქართველოს,” – განაცხადა გიორგი ვაშაძემ.

საქართველოს პრემიერ-მინისტრმა ჟურნალისტებთან კომენტარში მედია გააკრიტიკა, კერძოდ ზუგდიდის ბანკში მომხდარ მძიმე დანაშაულთან დაკავშირებით და განაცხადა, რომ ძებნილი პირის ფოტოების და მისი ვინაობის მედის მხრიდან გასაჯაროვებამ, ოპერატიულ-სამძებრო ღონისძიებებს ხელი შეუშალა:

„ეს იყო ქმედება, რომელმაც ობიექტურად, აქტიურ ფაზაში მყოფ ოპერატიულ-სამძებრო ღონისძიებას ხელი შეუშალა. როგორც ჩანს ინტერესია, რაც შეიძლება გახანგრძლივდეს, ამ ღონისძიების წარმატებით დასრულება და ოპოზიციას, რომელსაც საერთოდ არ აქვს არანაირი შინაარსობრივი დღის წესრიგი, არ შეუძლია პროგრამის კომპონენტებზე საუბარი, მას სჭირდება ასეთი თემები, იმისთვის, რომ რაღაც აჟიოტაჟი შექმნას და პანიკის დათესვის მცდელობები იყოს“, – განაცხადა გიორგი გახარიამ.

ავტორი
ემილი ფეიქრიშვილი

ბოლო დღეების განმავლობაში გამოიკვეთა კამპანიური ხასიათის მქონე მცდელობები საარჩევნო ადმინისტრაციის დისკრედიტაციისა და საარჩევნო გარემოს დაზიანების მიზნით. კერძოდ, დაუზუსტებელი და არასწორი ინფორმაციის გავრცელებით და საარჩევნო ადმინისტრაციაზე ზეწოლით, ზოგიერთი პოლიტიკურად დაინტერესებული მხარე ცდილობს საარჩევნო ადმინისტრაციის საქმიანობის ხელშეშლას და დისკრედიტაციას.

გაცნობებთ, რომ საარჩევნო ადმინისტრაციისთვის მნიშვნელოვანია, საქართველოს თითოეულ მოქალაქეს და არჩევნებში ჩართულ ყველა მხარეს ჰქონდეს შესაძლებლობა განახორციელოს კონსტიტუციით მინიჭებული უფლება ჯანმრთელობისთვის უსაფრთხო საარჩევნო გარემოში.

სწორედ აღნიშნული უფლების რეალიზების მიზნით, ცენტრალურმა საარჩევნო კომისიამ, არჩევნებში ჩართულ მხარეებთან მჭიდრო თანამშრომლობით შეიმუშავა და დადგენილებით მიიღო სტაციონარულ სამკურნალო დაწესებულებებსა და იზოლაციაში მყოფი ამომრჩევლების ყველა ჯგუფის არჩევნებში მონაწილეობის უზრუნველსაყოფად ზოგიერთი საარჩევნო პროცედურა და სანიტარიულ-ჰიგიენური მოთხოვნები. დადგენილების შემუშავების პროცესი გამჭვირვალედ, პოლიტიკური პარტიების და არასამთავრობო ორგანიზაციების მონაწილეობით მიმდინარეობდა და მისაღებ გადაწყვეტილებაზე მხოლოდ 3-მა არასამთავრობო ორგანიზაციამ გამოთქვა შენიშვნები, რომელთა დიდი ნაწილი აისახა საბოლოო გადაწყვეტილებაში.

დადგენილების თანახმად, თვითიზოლაციაში მყოფ პირებს მიეცათ შესაძლებლობა, ესარგებლათ გადასატანი საარჩევნო ყუთით, იმ შემთხვევაში თუ ისინი იქნებოდნენ შესაბამისი უწყების მიერ მოწოდებულ სიებში და იმავდროულად კენჭისყრის დღისთვის იქნებოდნენ თვითიზოლაციაში. აღსანიშნავია, რომ ცესკოს გადაწყვეტილებით, თვითიზოლაციაში მყოფი პირებისთვის, გადასატანი ყუთის მოთხოვნის ვადა გახანგრძლივდა, 27 ოქტომბრის 14:00 საათამდე, ხოლო მოქალაქეთა აქტიური მომართვიანობის გამო, სატელეფონო-საინფორმაციო ცენტრი ზარებს იღებდა 18:00 საათამდე. გამოყენებულ იქნა ყველა ის საინფორმაციო საშუალება, რომლითაც ცესკომ უზრუნველყო ამომრჩევლების მაქსიმალური ინფორმირება, მაგრამ მიუხედავად ამ დაუღალავი შრომისა და საქმიანობისა, არ წყდება ამ საკითხთან დაკავშირებით საარჩევნო ადმინისტრაციაზე ზეწოლა და ამას აქვს კამპანიური ხელშეშლის სახე.

მნიშვნელოვანია აღინიშნოს, რომ ზუსტად მაშინ, როდესაც არჩევნებამდე პრაქტიკულად 3 დღე არის დარჩენილი და საარჩევნო კომისიები 24 საათიან რეჟიმში ჩართული ვართ არჩევნების ორგანიზებაში, ადმინისტრირებაში და გვიწევს უამრავი ლოგისტიკური თუ სხვა პროცესის კოორდინირება, მათ შორის პანდემიით გამოწვეულის, შეიძლება ითქვას, რომ ასეთი კონკრეტული დღის წესრიგის მქონე სუბიექტების მიერ დაგეგმილი აქტივობები არის მცდელობა განხორციელდეს ზეწოლა საარჩევნო ადმინისტრაციაზე, მოხდეს მისი დისკრედიტაცია და ხელი შეეშალოს მის საქმიანობას.

ზემოთ აღნიშნულიდან გამომდინარე, მივმართავთ არჩევნებში ჩართულ ყველა მხარეს, ადგილობრივ და საერთაშორისო სადამკვირვებლო ორგანიზაციებს, მედიას, ყველა ჩართულ მხარეს ვინც მიუკერძოებლობის პრინციპის, პროფესიული სტანდარტისა და ეთიკის ნორმების დაცვით ახორციელებენ საკუთარ საქმიანობას, აქტიურად დააკვირდნენ მიმდინარე საარჩევნო პროცესებს, რაც ხელს შეუწყობს პროცესის გამჭვირვალობას და სანდოობას, და აგვარიდებს არაზუსტი, საარჩევნო პროცესის დამაზიანებელი ინფორმაციის გავრცელებას საზოგადოებაში.

ამასთან, აღსანიშნავია, რომ ამ წუთებში ცესკოსთან მიმდინარე აქციის მონაწილეებს, ერთ-ერთი პოლიტიკური პარტიის ახალგაზრდული ორგანიზაციის წარმომადგენლებს ცესკომ შესთავაზა სამუშაო რეჟიმში შეხვედრა, თუმცა მათ შეხვედრაზე უარი განაცხადეს.

ინფორმაციას ცენტრალური საარჩევნო კომისიის საზოგადოებასთან ურთიერთობის დეპარტამენტი ავრცელებს

“ქართული ოცნების” ოფისში გამართულ ბრიფინგზე, თეა წულუკიანმა სხვა თემებთან ერთად ზუგდიდის სპეცოპერაციაზეც ისაუბრა და მას წარმატებული უწოდა, რისთვისაც საჯაროდ გადაუხადა მადლობა ყველა იმ პირს, ვინც მძევლების მშვიდობიანად გამოყვანაში მონაწილდეობდა. ამასთანავე, იუსტიციის ყოფილმა მინისტრმა, ცალკეული ტელეარხები გააკრიტიკა და განაცხადა, რომ მათ ხელი შეუშალეს გამოძიებას:

“ზუგდიდში ჩვენ არ ვიხილეთ სისხლისღვრა, რაც არის მთლიანად იმ სახელმწიფო სტრუქტურებისა და პოლიციის დამსახურება, რომელსაც თქვენ სამწუხაროდ ჩამოშლილს უწოდებთ. თუ ეს ჩამოშლად მიგაჩნიათ, ალბათ არჩამოშლად იმას მიიჩნევდით, რომ გაგვღვიძებოდა ისეთ ზუგდიდში, სადაც ტროტუარი მოფენილი იქნებოდა გვამებით, ალბათ ეს უფრო იქნებოდა მავანისთვის სასიხარულო.

ჩვენ გუშინ ვნახეთ, რომ ზოგიერთმა პარტიულმა ტელეარხმა გამოძიებას პირდაპირ შეუშალეთ ხელი და შინაგან საქმეთა სამინისტროს მოწოდების მიუხედავად ზოგიერთმა თქვენგანმა მაინც გაავრცელეთ დამნაშავის ვინაობის შესახებ ინფორომაცია.

მინდა საჯაროდ გადავახუდო მადლობა შინაგან საქმეთა სამინსიტოს მთლინად სისტემას, უფრო კონკრეტულად ბატონ შინაგან საქმეთა მინისტრს, ვახტანგ გომელაურს და სამეგრელო-ზემო სვანეთის მთლიან შემადგენლობას,’’ – განაცხადა თეა წულუკიანმა.

ავტორი
ანა რობაქიძე

ცესკომ საკუთარ ოფიციალურ გვერდზე განცხადება გააკეთა, თვითოზოლაციაში მყოფი ამომრჩევლის მაღალი აქტივობიდან გამომდინარე გადასატან ყუთებზე რეგისტრაცია დღეს, 27 ოქტომრის 18:00 საათამდე დასრულდება:

“ვინაიდან ფიქსირდება თვითიზოლაციაში მყოფი ამომრჩევლების მაღალი აქტივობა, ცესკოს სატელეფონო–საინფორმაციო ცენტრი ზარებს, გადასატანი ყუთის მოთხოვნით, მიიღებს 27 ოქტომბრის 18:00 სთ–მდე. დარეკეთ ტელეფონის ნომერზე 2 51 00 51 (0).

შეგახსენებთ, რომ ცესკოს სატელეფონო-საინფორმაციო ცენტრისთვის მომართვისა და ოფიციალური მოთხოვნის დაფიქსირების შემთხვევაში, გადასატანი საარჩევნო ყუთით სარგებლობას შეძლებენ თვითიზოლაციაში მყოფი ის ამომრჩევლები, რომელთა მონაცემებიც ოფიციალურად ფიქსირდება შესაბამისი უწყების მონაცემთა ბაზაში,’’ – ნათქვამია განცხადებაში.

ავტორი
ანა რობაქიძე

სპეციალური ბრიფინგი გამართა შინაგან საქმეთა მინისტრის მოადგილემ, ვლადიმერ ბორცვაძემ და საზოგადოებას ზუგდიდში “საქართველოს ბანკის” ფილიალში მძევლების აყვანაში დამნაშავე პირის, ამჟამად ძებნაში მყოფის შესახებ ინფორმაცია მიაწოდა:

“შინაგან საქმეთა სამინისტროს მიერ მიმდინარე წლის 25 ოქტომბერს გავრცელებული განცხადების და მასში აღნიშნული მოწოდების მიუხედავად, გარკვეულმა მედიასაშუალებებმა ზუგდიდში, “საქართველოს ბანკის” ფილიალზე მომხდარ თავდასხმაში იდენტიფიცირებული პირის ფოტოების და ვინაობის შესახებ ინფორმაცია გაავრცელეს იმაზე ადრე, ვიდრე ამას სამინისტრო დაადასტურებდა.

კიდევ ერთხელ გვინდა ყველას მივმართოთ, რომ მსგავსი სიმძიმის დანაშაულზე ინფორმაციის მიზანმიმართული გავრცელება, ინტენსიური ოპერატიული ღონისძიებების პარალელურად, ხელს უშლის გამოძიების პროცესს, მიმდინარე და დაგეგმილ საპოლიციო ღონისძიებებს.

ვინაიდან საზოგადოების ნაწილისთვის უკვე ცნობილია იდენტიფიცირებული პირის ვინაობა, შინაგან საქმეთა სამინისტრო მის შესახებ ინფორმაციას ასაჯაროებს.

პოლიციის მიერ ჩატარებული კომპლექსური საგამოძიებო-ოპერატიული და სამძებრო ღონისძიებების შედეგად, თავდასხმაში მონაწილე, იდენტიფიცირებული პირია: 1988 წელს დაბადებული ბადრი ესებუა. მისი ადგილსამყოფელის დადგენისა და დაკავების მიზნით, პოლიცია სპეციალურ ოპერატიულ, საგამოძიებო და სამძებრო მოქმედებებს აქტიურად განაგრძობს.

გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონო შეძენა-შენახვა- ტარებას გულისხმობს.

შინაგან საქმეთა სამინისტრო ფაქტთან დაკავშირებით დამატებით ინფორმაციას ეტაპობრივად გაავრცელებს,” – განაცხადა ვლადიმერ ბორცვაძემ.

შს მინისტრის მოადგილემ ჟურნალისტებს ასევე განუმარტა მიზეზები, თუ რატომ შეიკავა თავი სამინისტრომ თავდასხმაში მონაწილე პირის ფოტოების გავრცელებისგან:

“ჩვენ, ამ თავდასხმაში მონაწილე პირის ფოტოების გავრცელებისგან, მიზანმიმართულად შევიკავეთ თავი, გამოძიების პირველ ეტაპზე, იმიტომ რომ მისი ადგილსამყოფელის დადგენის პროცესში, გარკვეულწილად, ვაწყდებოდით პრობლემებს და ეს ადამიანი, თავდასხმის შემდგომ, იმალებოდა და დღესაც იმალება. შესაბამისად, ჩვენს მიერ, ამ ფოტოების საჯაროდ, მედიის საშუალებებით გავრცელება იქნებოდა კიდევ ერთი მესიჯი მისთვის, რომ უფრო მეტად ლატენტური გამხდარიყო და უფრო მეტად გართულებულიყო მისი დაძებნა. შესაბამისად, ჩვენ მედიასაშუალებებს მოვუწოდეთ გუშინ, რომ არ გაევრცელებინათ ინფორმაცია, იმ შემთხვევაში, თუ ისინი მიიღებდნენ პიროვნების მაიდენტიფიცირებელ მონაცემებს, ვინაიდან ვვარაუდობდით, რომ შესაძლებელია მსგავსი ინფორმაცია მისულიყო მედიასაშუალებებამდე.

სამწუხაროდ, გარკვეული მედიის წარმომადგენლებმა ჩვენს მოწოდებას ყურადღება არ მაიქციეს და უპასუხისმგებლოდ, მიზანმიმართულად, ისევ და ისევ საპოლიციო დანაყოფების დისკრედიტაციის მიზნით, გაავრცელეს თავდასხმაში მონაწილე ტერორისტული აქტის ჩამდენი პირის ეჭვმიტანილი პირის მონაცემები, რაც გარკვეულწილად საპოლიციო ძალების დისკრედიტაციის მიზნით კეთდება და ხელს უშლის როგორც გამოძიებას, ისე საპოლიციო ღონისძიებებს“, – აღნიშნავს ვლადიმერ ბორცვაძე.

„სტრატეგია აღმაშენებელმა“ 27-საათიანი უწყვეტი ტურნეს ფარგლებში, რომელიც საქართველოს მასშტაბით ბათუმიდან დაიწყო, 17-ზე მეტი ლოკაცია მოიარა, ასობით მხარდამჭერს შეხვდა და საქართველოს აღმშენებლობის გეგმა გააცნო. პარტიის ლიდერის გიორგი ვაშაძის განცხადებით, ყველა ქალაქს განვითარების თანაბარი შესაძლებლობა ექნება. ქუთაისი კი, სადაც შემაჯამებელი შეხვედრა გაიმართა, საპარლამენტო დედაქალაქის სტატუსს დაიბრუნებს, რასაც მისი განვითარებისთვის საკვანძო მნიშვნელობა გააჩნია.

“სტრატეგია აღმაშენებლის” პრემიერობის კანდიდატის მთავარ მესიჯს მოსახლეობასთან შეხვედრისას არჩევნებზე მისვლა და „დამსხვრეული ოცნებების“ პარტიისთვის საკადრისი პასუხის გაცემა წარმოადგენდა. ვაშაძეს მიაჩნია, რომ ერთხელ და სამუდამოდ უარი უნდა ეთქვას სიღარიბეს, უმუშევრობას, გაჭირვებას, კრიმინალს და დაიწყოს ქვეყნის აღმშენებლობა საქმის მკეთებელ გუნდთან ერთად:

„ჩვენ გუშინ, დილით 09:00 საათზე ბათუმიდან 27-საათიანი უწყვეტი ტურნე დავიწყეთ. მოვიარეთ 17-ზე მეტი ლოკაცია და ასობით ადამიანს შევხვდით მთელი საქართველოს მასშტაბით. სამწუხაროდ, ქვეყნის ყველა რეგიონში უკიდურესი გაჭირვებაა. პენსიონერები, რომლებიც უსამართლოდ მაღალი სესხის პროცენტის გადახდას ვეღარ აუდიან, სოციალურად დაუცველები, რომლებიც  ვეღარანაირ საკვებს ვეღარ ყიდულობენ, იმისთვის რომ ელემენტარულად გამოკვებონ საკუთარი ოჯახი.

სოფლად თუ ქალაქად, ადამიანების ცხოვრების პირობები ნამდვილად არ შეესაბამება იმ რეალობას რასაც „ქართული ოცნება“ გვიხატავს. არის უმძიმესი მდგომარეობა, სადამდეც „დამსხვრეული ოცნებების“ პარტიამ მიგვიყვანა, მაგრამ ამასთან ერთად ჩვენ ამ ადამიანებში ვნახეთ ის რწმენა, რომ საქართველოს მომავალი გააჩნია.

მე მინდა საქართველოს თითოეულ მოქალაქეს კიდევ ერთხელ მოვუწოდო, რომ ეს სიღარიბე, ეს გაჭირვება, ეს უმძიმესი ვითარება დავამარცხოთ ქვეყანაში, რისთვისაც აუცილებელია 31 ოქტომბერს ყველანი მივიდეთ არჩევნებზე, მივიდეთ და ხმა მივცეთ ცვლილებებს, სიახლეს და უარი ვუთხრათ მათ, ვინც ამდენი  წლის განმავლობაში გატყუებდათ, ვინც დამნაშავეა თქვენს მძიმე სოციალური პირობების შექმნაში.

მთავარი საკითხი, რაზეც ხალხი საუბრობს, ეს – სიღარიბე, შიმშილი და გაჭირვებაა. მათ ფული არ აქვთ საკვების შესაძენად, შრომისუნარიან ადამიანებს სამუშაო ადგილი არ აქვთ, პენსიონერებს არჩევანის გაკეთება უწევთ წამალსა და საკვებს შორის, უსამართლოდ მაღალია წამლების ფასი. სწორედ ამიტომ თითოეულ ადამიანს ვპირდებით, გამარჯვების პირველ 30 დღეში პენსიონერებს სესხის უსამართლოდ მაღალ 36-40%-ს ჩამოვაწერთ, 30%-ით გავაიაფებთ წამლებს, ყველას ვინც სამუშაო ადგილი დაკარგა, მცირე და საშუალო ბიზნესის წარმომადგენლებს, ვისაც შეუმცირდათ ბიზნესი 6 თვის მანძილზე სესხის პროცენტს დავუსუბსიდირებთ და რაც მთავარია გავასამმაგებთ კორონა ვირუსის ტესტების რაოდენობას, რომ რაც შეიძლება სწრაფად მოვახდინოთ ლოკალიზება და არ ხდებოდეს კორონა ვირუსის მასობრივი გავრცელება. დავიწყებთ აღმშენებლობას თქვენთან ერთად და  აუცილებლად დავამარცხებთ სიღარიბეს.

დიდი მადლობა ჩვენს თანაგუნდელებს, ვინც მთელი 27 საათის მანძილზე დაუზარელად, აქტიურად, ენერგიულად დადიოდა რეგიონებში, მადლობა ჩვენს წარმომადგენლებს რეგიონებში და მათ მინდა ვუთხრა, რომ სწორედ „სტრატეგია აღმაშენებლის“ ენერგია არის ის ენერგეტიკა, რომელიც ახლა სჭირდება საქართველოს. ჩვენი უშრეტი და დაუღალავი ენერგია, 24/7-ზე შრომა საჭიროა იმისათვის, რომ თითოეულ ქართულ ოჯახში მოვიტანოთ სიკეთე და კონკრეტული შედეგი.

ჩვენი მიზანია საქართველოს თითოეული მოქალაქე საკუთარ თავზე გრძნობდეს ქვეყნის განვითარებასა და წინსვლას. ყველა იმ ადამიანს, რომელსაც ხელი ჩამოგართვით და  დაგპირდით, რომ  უსამართლობას შევცვლით, აუცილებლად გავაკეთებთ. პოლიტიკოსების მიმართ ნდობას დავაბრუნებთ ქვეყანაში,“ – განაცხადა გიორგი ვაშაძემ.

ინფორმაციას “სტრატეგია აღმაშენებლის” პრესსამსახური ავრცელებს