“2021 წელს თბილისის მერიის პრიორიტეტებს შორის სოციალურ-ეკონომიკური და ინფრასტრუქტურული პროექტების განხორციელება იქნება“, – ამის შესახებ თბილისის მერმა, კახა კალაძემ დედაქალაქის მუნიციპალიტეტის მთავრობის დღევანდელ სხდომაზე განაცხადა.

როგორც მან აღნიშნა, ასევე, იგეგმება პროექტების განხორციელება ეკოლოგიური და სატრანსპორტო პოლიტიკის მიმართულებით:

„დაიწყო ახალი სამუშაო წელი და რასაც ბოლო წლების განმავლობაში ვაკეთებდით, უნდა გავაათმაგოთ და გავაასმაგოთ.

2020 იყო ძალიან რთული წელი ყველანაირი თვალსაზრისით. მსოფლიო იდგა სერიოზული გამოწვევის წინაშე და ეს ბრძოლა ჯერ კიდევ არ დასრულებულა. საქართველოც არ არის გამონაკლისი, ვებრძვით უხილავ მტერს – Covid-19-ს.

პანდემიის გამო, 2020 წელს ძალიან ბევრი პრობლემა შეგვექმნა, პროექტების გადავადება მოგვიწია სხვა პრიორიტეტების გამო, თუმცა დარწმუნებული ვარ, 2021 წელს ერთიანი ძალისხმევით, ბევრი კარგი და მნიშვნელოვანი საქმის გაკეთებას შევძლებთ“, – აღნიშნა კახა კალაძემ.

მისივე თქმით, მიმდინარე წლის პრიორიტეტი ასევე, დედაქალაქში არსებული ეკოლოგიური მდგომარეობის გაუმჯობესება იქნება:

„მიმდინარე წლის ბიუჯეტში ძირითადი პრიორიტეტები სოციალურ-ეკონომიკური სფეროს მხარდაჭერაა, რისთვისაც 350 მილიონი ლარი იქნება გამოყოფილი. დაახლოებით, 440 მილიონი ლარი ინფრასტრუქტურული მიმართულებით დაიხარჯება.

იცით, რომ დაწყებული გვაქვს სატრანსპორტო პოლიტიკის რეფორმა, რომელიც ბევრი კომპონენტისგან შედგება. ეს იქნება მიმდინარე წელს ერთ-ერთი პრიორიტეტი. ასევე, ეკოლოგიური მდგომარეობის გამოსწორება.

გასულ წელს ამ მიმართულებით არაერთი პროექტი განხორციელა, მათ შორის, სკვერებისა და პარკების განახლება-რეაბილიტაცია, რაც მომავალშიც გაგრძელდება.

არსებულმა პანდემიამ კიდევ ერთხელ დაგვანახა, თუ რამდენად დიდი მნიშვნელობა აქვს მსგავსი სივრცეების არსებობას. სასიხარულოა ის, რომ უკვე საპარკე კულტურა შემოვიდა ქალაქში. ჩვენ რეაბილიტირებულ რეკრეაციულ სივრცეებში ყველა თაობის ადამიანი მიდის – ზოგი ვარჯიშობს, ზოგი სეირნობს, ზოგი შვილებს და შვილიშვილებს ასეირნებს. შესაბამისად, გვაქვს მეტი მოტივაცია, რომ ასეთი სივრცეები კიდევ შევქმნათ“, – აღნიშნა დედაქალაქის მერმა.

კახა კალაძემ ასევე აღნიშნა,  რომ გასული წლის ბიუჯეტი თბილისის მერიამ 96%-ზე მეტი ოდენობით შეასრულა:

„რაც შეეხება გასული წლის ბიუჯეტს, თბილისის მერიამ ბიუჯეტი 96%-ზე მეტი ოდენობით შეასრულა. 440 მილიონი ლარი დაიხარჯა ინფრასტრუქტურული მიმართულებით. განსაზღვრული გვქონდა, რომ 500 მილიონზე მეტი დახარჯულიყო, თუმცა პანდემიამ სერიოზული პრობლემა შეგვიქმნა.

320 მილიონი ლარი დაიხარჯა ჯანდაცვისა და სოციალური მიმართულებით. კარგად გვესმის ადამიანების სოციალურ-ეკონომიკური მდგომარეობა და ძალიან ბევრ მათგანს დავეხმარეთ, ბევრ ოჯახს დავუდექით გვერდით, ბევრი სიცოცხლე გადავრჩინეთ, შეჭირვებულ ოჯახებს ხელი შევუწყვეთ.

რა თქმა უნდა, ჩვენ ამით არ ვტრაბახობთ. ეს ჩვენი მოვალეობაა, მაგრამ მთავარი საზრუნავი იქნება ის, რომ მომდევნო წლებში, რაც შეიძლება ნაკლები სოციალურად შეჭირვებული ოჯახი გვყავდეს“, – განაცხადა თბილისის მერმა.

ამასთან, კახა კალაძემ დედაქალაქის 2021 წლის ბიუჯეტის შესახებაც ისაუბრა და აღნიშნა, რომ ნაცვლად დაგეგმილი მილიარდ 100 მილიონი ლარისა, ბიუჯეტი მილიარდ 150 მილიონი ლარი იქნება.

„საუბარი იყო, რომ 2021 წლის ბიუჯეტი 1 მლრდ 100 მლნ ლარამდე გაიზრდებოდა, თუმცა 2020 წლის ბიუჯეტის საშემოსავლო ნაწილი მუნიციპალიტეტის ეფექტური მუშაობის შედეგად, გადაჭარბებით არის შესრულებული და ამის გამო, 2021 წლის ბიუჯეტი იქნება 1 მლრდ 150 მლნ ლარამდე, რაც მოგვცემს იმის შესაძლებლობას, რომ არაერთი მნიშვნელოვანი პროექტი განვახორციელოთ ჩვენი ქალაქისა და თბილისელებისთვის“, – აღნიშნა დედაქალაქის მერმა.

ინფორმაციას თბილისის მერიის პრესცენტრი ავრცელებს

“ვიდრე პოლიტიკაზე ან რამე საქმეზე დავიწყებთ საუბარს და გეგმებს დავაწყობთ, ჯერ წესებზე უნდა შევთანხმდეთ” – აცხადებს “ლელოს” ლიდერი მამუკა ხაზარაძე და ფეისბუქის საკუთარ გვერდზე გამოქვეყნებულ პოსტში ამახვილებს ყურადღებას პოლიტიკაში მაღალი სტანდარტისა და პასუხისმგებლობის აუცილებლობაზე:

“არჩევნების გაყალბება პოლიტიკის გაყალბების ბრალია, პოლიტიკაში დამკვიდრებული სიცრუის, სიტყვის გატეხვის და ღალატის ბრალი. ამიტომ ვიდრე პოლიტიკაზე ან რამე საქმეზე დავიწყებთ საუბარს და გეგმებს დავაწყობთ, ჯერ წესებზე უნდა შევთანხმდეთ. „ჯერ წესია საქმე და მერე საქმეა საქმეო,“ – ყველას გვახსოვს ეს სიტყვები ჭაბუა ამირეჯიბის რომანიდან. ჯერ საერთო წესზე შევთანხმდეთ – იმ მორალური, ეთიკური და ღირსების პრინციპების დაცვაზე, რომელიც ქართველ კაცს ისტორიულად მოსდევს. უნდა დავაწესოთ, რომ არცერთი საქმე არ გამოვა თუ არ გვეცოდინება სიტყვის ფასი, თავისუფლების ფასი, თვალებში ჩახედვის და ხელის ჩამორთმევის ფასი, თუ უარს არ ვეტყვით ღალატს, სიცრუეს, მონობას, საქვეყნო ინტერესზე წინ პირადის დაყენებას.

პოლიტიკა ბინძური საქმეაო, ამბობენ, ყველა საქმე ბინძურია, თუ მას ჭუჭყიანი ხელით, ღვარძლით, ცილისწამებით და პირადი გამორჩენით აკეთებ. და პოლიტიკა ბინძური იქნება იქამდე, ვიდრე ეს არ დამთავრდება, ვიდრე ეს ველი არ გაიწმინდება. ერთი წელია პოლიტიკაში ვარ და მივხვდი – ყველას, ვისაც პასუხისმგებლობა აქვს ამ ქვეყნის წინაშე, საკუთარი ამომრჩევლის წინაშე, ჯერ ამ მარტივ წესებზე უნდა შეთანხმდეს და ბოლომდე დაიცვას. მე მჯერა, რომ „ლელო“ ამ სტანდარტს შექმნის და დაამკვიდრებს ქართულ პოლიტიკაში,” – აღნიშნავს მამუკა ხაზარაძე.

უხვთოვლიანობის გამო მოძრაობის შეზღუდვათან დაკავშირებით, საავტომობილო გზის გუდაური-კობის მონაკვეთზე, ინტენსიურ რეჟიმში მიმდინარე გაწმენდითი სამუშაოების თაობაზე ავრცელებს ინფორმაციას საავტომობილო გზების დეპარტამენტი:

“მცხეთა-სტეფანწმინდა-ლარსის საავტომობილო გზის გუდაური-კობის მონაკვეთზე, როგორც გუდაურიდან, ასევე კობიდან გზის გაწმენდითი სამუშაოები მეორე დღეა ინტენსიურ რეჟიმში გრძელდება.

გზის ძირითადი ნაწილი უკვე გაწმენდილია, რჩება მხოლოდ 3 კილომეტრი (კმ99-კმ101), საიდანაც 101-ე კილომეტრზე ზვავსაშიშროება ნარჩუნდება და გაწმენდითი სამუშაოების დაწყება, აღნიშნულ 1 კილომეტრზე, ჯერ ვერ ხერხდება. გარემოს ეროვნული სააგენტოს მიერ ზვავსაშიშროების რეჟიმის მოხსნისთანავე, ამ მონაკვეთზეც დაიწყება გაწმენდითი სამუშაოები და ავტოტრანსპორტის მოძრაობა უმოკლეს ვადებში აღდგება,” – ნათქვამია გავრცელებულ ინფორმაციაში.

ტაქსის ნებისმიერი კატეგორიის მძღოლის სავალდებულო PCR ტესტირებასთან დაკავშირებით ისაუბრა დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე. როგორც მან აღნიშნა, უწყებათაშორისი საკოორდინაციო საბჭოს გადაწყვეტილებით, „თბილისის ტაქსის“, როგორც A, ისე B კატეგორიის მძღოლების ტექსტირება მოხდება.

„ვირუსის გავრცელების რისკების თავიდან აცილების მიზნით, მუდმივად მიმდინარეობს რისკ-ჯგუფების დადგენა და მათი PCR ტესტირება. ერთ-ერთ ასეთ რისკ-ჯგუფს მიეკუთვნებიან „თბილისის ტაქსის“ მძღოლები, როგორც A, ასევე B კატეგორიის. ძალიან მნიშვნელოვანია, რომ მაქსიმალურად ვიყოთ დაზღვეული, გავუფრთხილდეთ ადამიანების ჯანმრთელობას და სიცოცხლის უსაფრთხოებას. როგორც თავად ტაქსის მძღოლების ჯანმრთელობის უსაფრთხოებაა მნიშვნელოვანი, ასევე იმ კონკრეტული ადამიანების, რომლებიც ტაქსის სერვისით სარგებლობენ. შესაბამისად, საკოორდინაციო საბჭოს გადაწყვეტილებით, უნდა განხორციელდეს „თბილისის ტაქსის“, როგორც A, ისე B კატეგორიის მძღოლების სავალდებულო PCR ტესტირება“, – განაცხადა კახა კალაძემ.

მისივე თქმით, დედაქალაქში დაფიქსირდა სამწუხარო შემთხვევები, როდესაც ტაქსის დაინფიცირებული მძღოლები მუშაობას განაგრძობდნენ.

„იმისთვის, რომ ვიყოთ დაზღვეული, მნიშვნელოვანია, რომ ტაქსის მძღოლების PCR ტექსტირება მოხდეს ორ კვირაში ერთხელ“, – აღნიშნა თბილისის მერმა.

შესაბამის სამართლებრივ ცვლილებებს თბილისის მერია დასამტკიცებლად საკრებულოში წარადგენს. პროცესზე მონიტორინგს დედაქალაქის მერია და ცენტრალური ხელისუფლება ერთობლივად განახორციელებენ.

საქართველოს სასკოლო დაწესებულებებში სწავლის განახლების პარალელურად განახლდა პოზიცია-შეფასებებიც განათლების სისტემაში არსებულ მდგომარეობასთან თუ კოვიდ პანგემიის პირობებში სასწავლო პროცესის ეფექტურად მართვასთან მიმართებაში. აღნიშნულ საკითხებთან მიმართებაში სააგენტო “პარალელი” ესაუბრა სასწავლო ცენტრ “ცოდნის სახლი”-ს დამფუძნებელს და დირექტორს მიხეილ მეტეევს, რომელმაც, სააგენტოს მიერ დასმულ აქტუალურ შეკითხვებზე, დააფიქსირა თავისი პოზიცია-მოსაზრებები:

• საქართველო, ისევე როგორც მსოფლიო, ებრძვის COVID-19-ით გამოწვეულ პრობლემებს. ამან დიდწილად საგანმანათლებლო სტრუქტურაზეც იმოქმედა. თქვენი, როგორც ამ დარგში მოღვაწე ადამიანისთვის, რა არის 2020-2021 წლის საგანმანათლებლო პროცესის მთავარი გამოწვევა?

– დიახ, COVID-19-ის პანდემიის გამო, მსოფლიო და მათ შორის ჩვენი ქვეყანაც, განათლების კუთხით, რთულ მდგომარეობაში აღმოჩნდა. მასწავლებლებმა და მოსწავლეებმა, ასევე მშობლებმა, შექმნილი სიტუაციის მიმართ ემოციური მზაობა ვერ გამოაჩინეს, რაც თავის მხრივ სასწავლო პროცესზე აისახა. ერთია, უთხრა ბავშვს, რომ სულ სხვა რეალობაში – ონლაინ სწავლებაზე გადადის, და მეორე, თუ როგორი მომზადებული ხვდება ის ამ სინამდვილეს. როგორც ცნობილია წინა სასწავლო წლის მეორე სემესტრი საკარანტინე პერიოდს დაემთხვა და მაშინ განათლების სამინისტროს მიერ მიღებულმა გადაწყვეტილებამ – ,,მოსწავლის 2019-2020 სასწავლო წლის წლიურ ქულად განისაზღვრება მოსწავლის მიერ I სემესტრში მიღებული ქულა“, ფაქტიურად ცხადყო, რომ სისტემამ გამართულად მუშაობა ვერ შეძლო და ეს წლიურ შეფასებაზეც აისახა. რამაც, თავისთავად, დისტანციური სწავლების მიმართ, მოსწავლეთა ერთგვარი დემოტივირება მოახდინა. აღსანიშნავია, ის ფაქტიც, რომ სკოლის დირექტორატი, რთული და დატვირთული გრაფიკის გამო, ნაკლებად პროდუქტიული გახდა და ამ მხრივადაც ბევრი რამაა დასახვეწი, სახელმწიფოს მხრიდან მეტ ჩართულობას მოითხოვს. იმის გათვალისწინებით, რომ დისტანციური სწავლება ინტერნეტით სარგებლობაზეა დამყარებული, ესეც განათლების სისტემის მთავარი გამოწვევაა.

• თქვენი აზრით, რა სახის პოზიტიურ და ნეგატიურ გავლენას ახდენს განათლებაზე ონლაინ სწავლება? რა დადებით და უარყოფით მხარეებს გამოყოფდით?

– მინდა ხაზი გავუსვა, რომ ყველაფერს აქვს თავისი დადებითი და უარყოფითი მხარე, არც ონლაინ სწავლებაა გამონაკლისი. თუმცა, პრაქტიკიდან გამომდინარე დროდადრო ხდება არსებული ლაფსუსების აღმოფხვრა. როდესაც ჩვენ დისტანციურ სწავლებაზე ვსაუბრობთ, მნიშვნელოვანია ერთმანეთისგან გაიმიჯნოს მოსწავლისა და სტუდენტის სწავლება. უფრო მეტიც, სკოლის საფეხურიდან გამომდინარე განათლების დონეც იცვლება. მაგალითად: არ შეიძლება პირველ და ბოლო საფეხურზე მყოფი ბავშვის ცოდნის შეფასება ერთი და იმავე საზომი ერთეულით. მათი შედეგი სრულიად განსხვავებული შეიძლება აღმოჩნდეს. თუ ჩვენ ასაკობრივ-ფსიქოლოგიურ თავისებურებებს გავითვალისწინებთ, ყველაზე რთული პროცესი მაინც პირველ და მეორე კლასელთა შორის გვხვდება. ამ საფეხურზე ბავშვის აზროვნებას თვალსაჩინო საყრდენი სჭირდება. მისთვის მნიშვნელოვანია ხედავდეს მასწავლებელს და ეხებოდეს მას. მართალია ამ ფაქტორს გვერდს ვერ ავუვლით, მაგრამ სხვადასხვა მეთოდებით უნდა შევძლოთ შექმნილი სიტუაციიდან გამოსავალი ვიპოვოთ.

• როგორ უმკლავდება ამ მოცემულობას თქვენი საგანმანათლებლო ცენტრი ,,ცოდნის სახლი“?

– ჩვენი საგანმანათლებლო ცენტრი ,,ცოდნის სახლი“, როგორც ყველა სხვა დანარჩენი მსგავსი სასწავლო დაწესებულება, პანდემიის პირველ ეტაპზე დილემის წინაშე აღმოჩნდა. თუმცა ევროპისა და ამერიკის შეერთებული შტატების სკოლებში ონლაინ განათლების პრაქტიკის შესწავლამ გვიბიძგა დაგვენერგა უკვე აპრობირებული – ბავშვზე მორგებული, ინდივიდუალური სწავლება. ვცდილობთ არსებულ რეალობასთან შეგუებას და შესაბამისად ჩვენი ყველა რესურსი მიმართულია ბავშვების, და არა მხოლოდ, სრულფასოვანი განათლებისკენ. ვფიქრობთ, რომ ჩვენი სასწავლო ცენტრი ამ ეტაპისთვის თავს კარგად ართმევს არსებულ რეალობას, თუმცა უკეთესის მოლოდინის რეჟიმში ვრჩებით.

• როგორ ხდება პროგრამის შერჩევა? საწყის ეტაპზე საპილოტე პროგრამით ხელმძღვანელობთ, თუ უკვე აპრობირებულ მეთოდებს იყენებთ?

– როდესაც მშობელი მოგვმართავს, საწყის ეტაპზე განვსაზღვრავთ მოსწავლის განათლების დონეს. ეს ხდება სხვადასხვა მეთოდების გამოყენებით. საპილოტე სისტემას რაც შეეხება, ვიყენებთ, თუმცა მაინც ვცდილობთ უკვე პრაქტიკაში დამკვიდრებულ, ტრადიციულ მეთოდებს დავეყრდნოთ და პარალელურად სიახლე შევიტანოთ მასში. მოსწავლის დონის დადგენის შემდეგ, უკვე ინდივიდუალური პროგრამის შერჩევა იწყება და სილაბუსის მიხედვით მოსწავლეს უტარდება ონლაინ გაკვეთილები.

• საზოგადოების რომელ სეგმენტს მოიცავს თქვენი ცენტრი? რამდენად ხშირია მომართვიანობა? როგორ იღებს იმ რეალობას მშობელი, რომ აუცილებელია ონლაინ სწავლების პროცესთან შეგუება?

– ,,ცოდნის სახლი“ მოიცავს, როგორც სკოლის მოსწავლეებს, აბიტურიენტებს, ასევე კონკრეტულ საგანში გადამზადების მსურველებს, უცხო ენის ცოდნის დონის ამაღლებას ან საბაზისოს მიცემას. შესაბამისად სეგმენტი საკმაოდ ფართოდ გვაქვს გაშლილი, რაც ნებისმიერი ასაკისა თუ განათლების მქონე ადამიანს აძლევს საშუალებას, მისთვის საინტერესო საგანი/ენა ძირეულად შეისწავლოს. რაც შეეხება მომართვიანობას, მინდა ხაზი გავუსვა, რომ სკოლების დახურვის შემდეგ, მაჩვენებელი საგრძნობლად არის გაზრდილი და ვფიქრობ, მშობლებმაც გაითავისეს შექმნილი სიტუაცია. ჩვენმა ცენტრმა აღმოუჩინა ის დახმარება, რომელიც მათ შვილებს განვითარებასა და წინსვლაში დაეხმარება.

საქართველოს პარლამენტის ყოფილი დეპუტატი, ხათუნა ხოფერია ამერიკის შეერთებულ შტატებში ხელისუფლების ცვლილებას ეხმიანება და თავისი კონკრეტულ მოსაზრებებს გამოთქვამს:

“ვნერვიანობ ამერიკაზე და მოვიფიქრე!
ჭიაკოკონობა რომ მოვაწყოთ ყველამ. თავისი გიზგიზა ცეცხლით, ცეცხლზე გადახტომებით და შეძახილით:

არული კუდიანებს!
არული ლიბერასტებს!
არული გლობალისტებს!

არ გადაშენდებიან ეს ლიბერასტ -გლობალისტ-პედოფილ-ღმერთისმგმობელები?” – წერს ხათუნა ხოფერია ფეისბუქის პირად გვერდზე.

რამდენიმე საათით ადრე კი ყოფილი პარლამენტარი, ასევე სოციალური ქსელის მეშვეობით, მოსაზრებას გამოთქვამდა აშშ პრეზიდენტის, ჯო ბაიდენის ინაგურაციის ჩატარების ადგილთან დაკავშირებით:

“ამდენ წვალებას ხომ სჯობდა, არლინგტონის ნაციონალურ სასაფლაოზე ჩაეტარებინათ ინაუგურაცია?!

ინტერნეტგამოცემა “ტაბულას“ დამფუძნებელი თამარ ჩერგოლეიშვილი ოპოზიციის კონკრეტულ ნაწილთან მიმართებაში თავის შეფასებებს აფიქსირებს და მიაჩნია, რომ ალეკო ელისაშვილი, გაყოფილი “გირჩის” იაგო ხვიჩიას გუნდის წევრებთან ერთად, ივანიშვილისთვის ერთგვარი “ჰედლაინის” გაკეთებას ცდილობენ:

“ოპოზიციაში დაპირისპირებაა” – აი ამ ჰედლაინისთვის ჭმუჭნის ბიძინა ელისაშვილს და იაგოებს.

არანაირი დაპირისპირება ოპოზიციაში ბოიკოტის თემაზე არაა (სხვა თემებზე, ცხადია, განსხვავებები არის).

სამი მწერი ჭიჭყინებს ივანიშვილისთვის ჰედლაინის გასაკეთებლად.
ეგაა და ეგ“, – წერს ფეისბუქის პირად გვერდზე თამარ ჩერგოლეიშვილი.