“დღემდე, როცა თვალებს ვხუჭავ, ისევ ჩემს დაკარგულ ქალაქში ვბრუნდები…” – ანი ნადარეიშვილი

აფხაზეთის უზენაესი საბჭოს ყოფილი თავჯდომარის, თამაზ ნადარეიშვილის შვილის, ანი ნადარეიშვილის ემოციური ისტორიები, მოგონებები:

“გაგრაში დავიბადე და გავიზარდე, საქართველოს იმ ქალაქში, საიდანაც ჩვენი ლამაზი ქვეყანა იწყება და ქალაქში, რომელიც ყველაზე ახლოსაა ევროპასთან. დღემდე მახსოვს მისი ულამაზესი ზღვის სანაპიროს, მანდარინების და ევკალიპტის შერეული სურნელი.

1993 წლის 27 სექტემბერი ჩემთვის არის დღე, როცა ბავშვობა, სახლი და სამშობლოს ნაწილი რუსმა ოკუპანტებმა წამართვეს. ეს ბრაზი და ტკივილი 32 წელია ჩემს გულშია, და დღემდე, როცა თვალებს ვხუჭავ, ისევ ჩემს დაკარგულ ქალაქში ვბრუნდები.

უკვე 13 წელია „ქართული ოცნება“ ხელისუფლებაშია და ამ დროში აფხაზეთის დაბრუნებისთვის აბსოლუტურად არაფერი გაკეთებულა. მათთვის ეს თემა თითქოს საერთოდ აღარ არსებობს — არც პოლიტიკურ დღის წესრიგშია, არც ხალხთან საუბრის საგანია. ოკუპირებული აფხაზეთი მათი მმართველობის წლებში დავიწყებას მიეცა, თითქოს არც არსებობდეს ჩვენი ტკივილი, ჩვენი მიწა.
მაგრამ, 4 ოქტომბრიდან იწყება საქართველოს გამარჯვებები, რადგან ქართველი ხალხი რუსულ რეჟიმს მშვიდობიანად გავისტუმრებთ და ქვეყანას თავისუფლებას დავუბრუნებთ.

… და მჯერა, რომ ერთ დღეს ტკივილი გადაიქცევა ზეიმად, და მონატრება — დაბრუნებად“, – წერს ანი ნადარეიშვილი ფეისბუქის პირად გვერდზე.