ქვეყანაში შექმნილი რეალობიდან გამომდინარე, დედაქალაქში ეკოლოგიური მდგომარეობის გაუმჯობესების შესახებ საუბრობს თბილისის მერი, კახა კალაძე და მიაჩნია, რომ ამას სჭირდება მოფრთხილება, რისთვისაც საზოგადოებას განსახილველად სთავაზობს წინადადებას, – კვირაში 2 დღით კერძო ტრანსპორტის მოძრაობის აკრძალვის თაობაზე:
“ჩვენ როდესაც ვართ ამ მდგომარეობაში, გაჩერებულია ყველაფერი, არ მუშაობს საზოგადოებრივი ტრანსპორტი, არ მოძრაობს კერძო ავტომობილები, რა თქმა უნდა, ამ ყველაფერმა ძალიან დიდი გავლენა იქონია არსებული ეკოლოგიურ მდგომარეობაზე.
ბოლო პერიოდის განმავლობაში დედაქალაქში, ისევე როგორც საქართველოს მთელ ტერიტორიაზე, ატმოსფერული ჰაერის დაბინძურების მაჩვენებელი, ძალიან მკვეთრადაა შემცირებული და რა თქმა უნდა, ეს ყველაფერი, განპირობებულია იმით, რომ შემცირებულია ტრანსპორტის გადაადგილება, არ მუშაობს საზოგადოებრივი ტრანსპორტი და ზოგადად აქტივობები არის დაბალი.
მე ვფიქრობ, რომ ეს მონაცემები, რომლებიც დღეს ჩვენ გვაქვს, არის მნიშვნელოვანი. თქვენ იცით, რომ ქალაქის სხვადასხვა რაიონებში, სხვადასხვა ცენტრალურ ქუჩაზე განთავსებულია სპეციალური სტაციონარები, რომლებიც ზომავს ჰაერში დაბინძურების ინდექსს, დაბინძურების მაჩვენებელს და ეს მაჩვენებლები არის მკვეთრად განსხვავებული. ჩვენ თუ შევადარებთ 2019 წლის მარტის მაჩვენებელს 2020 წლის მაჩვენებელთან, არის ძალიან დიდი სხვაობა და განსაკუთრებით ჰაერში აზოტის დიოქსიდის შემცველობა არის შემცირებული, რაც პრობლემური იყო.
დარგის სპეციალისტები ხუმრობდნენ, რომ თბილისში, როგორც ბახმაროში, ისეთი ჰაერია, დღეის მდგომარეობით, რაც მართლაც მნიშვნელოვანია და ალბათ ყველა ადამიანი ამჩნევს ამ არსებულ რეალობას, რასას სჭირდება მოფრთხილება.
როდესაც უკვე დავიწყებთ ნორმალურ ცხოვრებას და დავიწყებთ მუშაობას, კვირაში 2 დღის განმავლობაში, მაგალითად შაბათი-კვირა, ხომ არ გავაკეთოთ კერძო ავტომობილების მოძრაობის აკრძალვა და დავტოვოთ მხოლოდ საზოგადოებრივი, რომ შესაძლებელი იყოს აუცილებელი გადაადგილება, როგორც ავტობუსებით, ასევე მეტროთი? ცხადია ამ იდეას დახვეწა დაჭირდება, რაღაცეების გათვალისწინება მოგვიწევს ისე, რომ პრობლემა არ შევქმნათ,” – განაცხადა კახა კალაძემ.
