საქართველოს პრეზიდენტმა სალომე ზურაბიშვილმა სოციალურ ქსელში განცხადება გაავრცელა, სადაც 1991 წლის 31 მარტს ჩატარებულ რეფერენდუმსა და ზვიად გამსახურდიას წვლილზე საქართველოსთვის თავისუფლებისა და დამოუკიდებლობის აღდგენის მიღწევაზე ისაუბრა.
„რაც არ უნდა მძიმე და დამაფიქრებელი იყოს დღევანდელი ვითარება და ყველა საკუთარ ბედზე, თუ ახლობლებზე ღელავდეს, არ გვაქვს უფლება დავივიწყოთ, რომ დღეს, 29 წლის წინ, რეფერენდუმის გზით, ქართველმა ერმა დამოუკიდებელი სახელმწიფო აღადგინა.
საოცარი ის არის, რომ იმ დროს ხალხმა, 70 წლიან საბჭოთა ციხეგამოვლილმა, გაიაზრა თავისუფლების და ერთიანობის ფასი და ერთსულოვნად დამოუკიდებლობას მისცა ხმა.
ამ სასწაულის ინიციატორის, საქართველოს პირველი პრეზიდენტის დაბადების დღეც არის დღეს.
ნათელში იყოს მისი სული!
ქართველმა ერმა კი, არ დაივიწყოს ერთობის ძალა, რომელიც ყველაფერს გადაგვატანინებს და დაგვაძლევინებს!“ – აცხადებს საქართველოს პრეზიდენტი სალომე ზურაბიშვილი.
29 წლის წინ 1991 წლის 31 მარტს საქართველოში ჩატარდა რეფერენდუმი, დამოუკიდებლობის აღდგენის თაობაზე, რომელიც ეფუძნებოდა 1918 წლის 26 მაისის დამოუკიდებლობის აქტს. რეფერენდუმში მონაწილეობა მიიღო მოსახლეობის საერთო რაოდენობის 90,3 %-მა, რომელთაგან 98,9 %-მა დამოუკიდებლობის აღდგენას დაუჭირა მხარი.
31 მარტს საქართველოს პირველი პრეზიდენტის ზვიად გამსახურდიას დაბადების დღეა.
ავტორი
თამთა ასლანიშვილი
