“საქართველოში პოლიტიკური ვითარების გაუარესების შესახებ” რეზოლუცია მიიღო ევროპარლამენტმა, რომელიც საკმაოდ კრიტიკულია, ეხება არაერთ მნიშვნელოვან საკითხს, მათ შორის, დემონსტრანტების წინააღმდეგ ძალადობას, პოლიტპატიმრების, ახალი არჩევნების და ა.შ. რეზოლუციაში ყურადღებაა გამახვილებული აგრეთვე “ქართულ ოცნებასთან” დაკავშირებული კონკრეტული პირებისთვის სანქციების დაწესებაზე.
რეზოლუციას 400 ევროპარლამენტარმა დაუჭირა მხარი, 63 წინააღმდეგი წავიდა, 81-მა კი თავი შეიკავა.
რეზოლუცია მოამზადეს ევროპარლამენტის 5 პოლიტიკურმა ჯგუფმა – “ევროპის სახალხო პარტია”, “სოციალ-დემოკრატები” “კონსერვატორები და რეფორმისტები”, “განახლება” და “მწვანეები”.
აღნიშნული რეზოლუციით, ევროპარლამენტი, ევროკავშირის საბჭოსა და წევრ სახელმწიფოებს (კონკრეტული მინიშნებით U-25-ს ანუ ქვეყნებს ინდივიდუალურად, უნგრეთისა და სლოვაკეთის გარდა), სთავაზობს სანქციები დაუწესონ ბიძინა ივანიშვილს, მის ოჯახსა და მის კომპანიებს, საქართველოს ოფიციალურ პირებსა თუ მმართველი პარტიის ლიდერებს, კერძოდ ირაკლი კობახიძეს, შალვა პაპუაშვილს, ვახტანგ გომელაურს, კახა კალაძეს, ირაკლი ღარიბაშვილს.
ასევე ეროვნული ბანკის პრეზიდენტს, ნათია თურნავას, ცალკეულ ბიზნესმენებს, მოსამართლეებს… სია საკმაოდ გრძელია და მოიცავს სხვადასხვა სფეროს წარმომადგენლებს, მათ შორის, ირაკლი რუხაძეს, ვასილ მაღლაფერიძეს, თინათინ ბერძენიშვილს, თამაზ გაიაშვილს, ილია წულაიას და სხვებს.
ამასთან, მოუწოდებს “ქართულ ოცნებას” გაათავისუფლოს ჟურნალისტი მზია ამაღლობელი და სხვა პოლიტპატიმრები, მათ შორის, მოითხოვს, კონკრეტულად საზღვარგარეთ მკურნალობის მიზნით, ჰუმანიტარული ნიშნით მიხეილ სააკაშვილის დაუყოვნებლივ გათავისუფლების შესახებ.
