„ახალი საქართველოს“ თავმჯდომარე გიორგი ვაშაძე დღეს გამართულ სამთავრობო ბრიფინგზე არასწორად გავრცელებულ ინფორმაციას ეხმაურება და კიდევ ერთხელ სთავაზობს გამოსავალს მთავრობას, რომ შეუძლიათ დაუკავშირდნენ უკრაინას და ჩინეთიდან საქართველოსთვის განკუთვნილი კორონავირუსზე სწრაფი დიაგნოსტირების საშუალებების წამოღება სთხოვონ.
„მინდა გამოვეხმაურო ჩემი და ჩვენი გუნდის მიერ გაკეთებული შეთავაზების სანაცვლოდ სამთავრობო ბრიფინგზე დილიდან გაკეთებულ განცხადებებს და სამწუხაროდ არასწორ ინფორმაციას, რომელიც ამასთან დაკავშირებით ვრცელდება.
პირველი: დიახ მე გამოვედი ინიციატივით კრიზისიდან გამოსავლის საშუალებად საქართველოში სწრაფი დიაგნოსტიკის მექანიზმების, სწრაფი ტესტების დანერგვასთან დაკავშირებით, რაც მგონია, რომ მართლაც გადაუდებელი აუცილებლობაა.
გულწრფელად ვამბობ, ნამდვილად არ მინდოდა საუბარი, მაგრამ ვხსნი ბრჭყალებს და ვამბობ: ის, რომ ერთი თვის მანძილზე ჩვენ დღემდე არ გვაქვს სწრაფი დიაგნოსტირების შესაძლებლობა საქართველოში, ეს ნამდვილად არასწორი მენეჯმენტის ბრალია, მხოლოდ 1000 პაცინტის მონაცემი და დიაგნოზი არის გამოკვლეული, როცა 2000-მდე ადამიანი არის კარანტინში და თითოეული ეს ადამიანი უნდა იყოს გამოკვლეული. ამაზე პასუხისმგებლობა ეკისრება მთავრობას და პირადად გახარიას.
მეორე მნიშვნელოვანი საკითხი: დღესაც გამოვთქვამ მზად ყოფნას, რომ 48 საათში საქართველოში ჩამოვიტანოთ იმ რაოდენობის ტესტები, რაც დღეს ქვეყანას სჭირდება. მე არ ვიცი თქვენ რა „ფეიკ“ ტესტებზე საუბრობთ, მაგრამ მაგალითისთვის მიჭირავს ერთ-ერთი ჩინური კომპანიის მიერ ნაწარმოები ტესტები, რომელსაც სრული შემოწმება აქვს გავლილი.
გერმანია, ჩვენი მეზობელი აზერბაიჯანი, უკრაინა, ბრაზილია და სხვა ქვეყნები უკვეთავენ სწორედ ასეთი ტიპის ტესტებს და მასიურად ხდება ამის გავრცელება ქვეყანაში. ეს არის როგორც სწრაფი ტესტის შესაძლებლობა, ასე ვთქვათ, მანქანებით ტესტირების შესაძლებლობა და საზოგადოებამ არაერთი კადრი ნახა ამასთან დაკავშირებით.
მსოფლიოში ვირუსთან ბრძოლისას ორი სტრატეგია: პირველი ეს არის იტალიის გზა, რომელმაც დააგვიანა დიაგნოზირების კუთხით და ამის გამო მოედო ეს ვირუსი ყველას და პირველი გავრცელების წყარო იყო სამედიცინო დაწესებულებები, სადაც ძალიან ბევრი სავარაუდო საეჭვო ინფიცირების მქონე პაციენტები შევიდნენ და ნამდვილად არ გვინდა, რომ ეს მოხდეს საქართველოში.
მეორე კი არის სამხრეთ კორეის გზა, რომელმაც აირჩია სწრაფი დიაგნოსტირების და სწრაფი ტესტირების გზა. ერთ თვეზე მეტია ქვეყანაში ეს პრობლემა გვაქვს და ფაქტია, რომ დღემდე ჩვენ არ გვაქვს სწრაფი დიაგნოზის საშუალება. მე რომ მინდოდეს, ან ნებისმიერ ჩვენგანს, რომ უნდოდეს სწრაფი დიაგნოსტირების საშუალება ამას ჩვენ ვერ შევძლებთ.
კიდევ ერთი გზა შემიძლია შემოგთავაზოთ ხვალ დილით 11 საათზე უკრაინიდან სატვირთო თვითმფრინავი მიფრინავს ჩინეთში, რომელმაც უკრაინისათვის უნდა ჩამოიტანოს ტესტები, დიაგნოსტირების საშუალებები, აპარატურა. მე შემიძლია ჩავერთო, თქვენც შეგიძლიათ ჩაერთოთ და დაუკავშირდეთ უკრაინის მთავრობას და ნამდვილად არ დაგვზარდებიან ამ თვითმფრინავში ჩაიდოს ჩვენთვისაც იგივე საშუალებები,” – განაცხადა გიორგი ვაშაძემ.
ავტორი
თამთა ასლანიშვილი
