“პარლამენტს არ სჭირდება ოპოზიციის ლეგიტიმაცია, ეს შემიძლია გითხრათ ძალიან მკაფიოდ“, – ასე უპასუხა პრემიერ-მინისტრმა ირაკლი კობახიძემ, მედიის მხრიდან დასმულ შეკითხვას იმის თაობაზე, რომ ოპოზიცია არ აპირებს ახალი მოწვევის პარლამენტი ლეგიტიმურად აღიაროს:
მთავრობის მეთაურის თქმით ოპოზიცია თავისი ქმედებებით კიდევ უფრო მეტად იფუჭებს რეპუტაციას:
“პარლამენტს სჭირდება ქართველი ხალხის ლეგიტიმაცია. ქართველმა ხალხმა საქართველოს პარლამენტსა და საპარლამენტო უმრავლესობას მიანიჭა შესაბამისი ლეგიტიმაცია.
რაც შეეხება ოპოზიციას, თუ უარს იტყვის იმ მანდატებზე, რომელიც მას მიანიჭა საზოგადოების შესაბამისმა ნაწილმა, ამით ისინი მათ მხარდამჭერებს მიაყენებენ შეურაცხყოფას, თუმცა ეს მათი საქმეა.
თქვენ ხედავთ, რომ ოპოზიცია დღითიდღე კიდევ უფრო მეტად იფუჭებს საკუთარ რეპუტაციას და მდგომარეობას. ამას აკეთებენ ისინი საკუთარი ხელით“, – განაცხადა ირაკლი კობახიძემ.
