“26 ოქტომბერი არ არის არჩევნები ცრუ დაპირებებზე, ქართული ოცნების პროპაგანდისტულ გზავნილებზე, ეს არის არჩევნები იმაზე, ვიცხოვრებთ თუ არა ისე, როგორც ევროპის კავშირის ქვეყნები ცხოვრობენ, სადაც, მათ შორის, უამრავი ქუთაისელია გახიზნული“, – განაცხადა გია ჯაფარიძემ, საარჩევნო ტურნეს ფარგლებში, ქუთაისში მოსახლეობასთან შეხვედრისას.
“ერთიანობა-ნაციონალური მოძრაობის” ლიდერმა გია ჯაფარიძემ, რომელმაც ქუთაისში ბრიფინგი ხატია დეკანოიძესთან ერთად გამართა, ქუთაისელებს მადლობა გადაუხადა მოსვლისთვის და აღნიშნა, რომ ამ ქალაქში არ უშინდებიან წვიმას და არ გრძნობენ დაღლას, ამასთან, ხაზი გაუსვა 26 ოქტომბრის არჩევნების მნიშვნელობას:
“ჩვენ არ გვეშინია წვიმის, ჩვენ არ გვეშინია არაფრის, ჩვენ არ ვიღლებით, ჩვენ ქედს არ ვიხრით, ჩვენ ბოდიშს არ ვიხდით, ქუთაისიდანაც ეს უნდა ვთქვათ რომ ჩვენ არ მოვიხდით ბოდიშს, იმიტომ რომ ჩვენ ბოდიში მოსახდელი არ გვაქვს, ბოდიშის მოხდას საერთაშორისო პოლიტიკაში ნიშნავს დანაშაულის აღიარებას, ჩვენ დანაშაული არ ჩაგვიდენია, ჩვენს წინააღმდეგ ჩაიდინეს დანაშაული.
ჩვენ არ ვაპირებთ ბოდიში მოვუხადოთ ოკუპანტს, რასაც გვთავაზობს ქართული ოცნება; ჩვენ არ ვაპირებთ ვაღიაროთ აფხაზეთის დამოუკიდებლობა, რასაც აპირებს ქართული ოცნება, ჩვენ ამას არ დავუშვებთ, 26 ოქტომბერს ის დღეა, როცა ჩვენ უნდა გადავწყვიტოთ როგორ ქვეყანაში გვინდა ცხოვრება.
26 ოქტომბერი არ არის არჩევნები ცრუ პირობებზე, იმ პროპაგანდისტულ გზავნილებზე, რასაც გვთავაზობს ქართული ოცნება, არა – 26 ოქტომბერი არის იმაზე, როგორ ქვეყანაში ვიცხოვრებთ ჩვენ, ვიცხოვრეთ ისეთ ქვეყანაში როგორიც არის ევროპის კავშირის წევრის სახელმწიფოები სადაც უამრავი ქუთაისელია გახიზნული ქართული ოცნების პოლიტიკის გამო და დაცლილია მთელი ქალაქი, უამრავი ქუთაისელი შემხვედრია სხვადასხვა ქვეყანაში მუშაობის დროს.
26 ოქტომბერს ჩვენ ვიქნებით ისეთი ქვეყანა, როგორებიც არიან ევროპის წევრი სახელმწიფოების ქვეყნები, სადაც არის ხელმისაწვდომი ჯანდაცვა, მაღალი ხარისხის განათლება, სოციალური დაცულობა, სამართლიანობა, უსაფრთხოება, კეთილდღეობა, მაღალი შემოსავლები.
ჩვენ გვყავს სანქცირებული მთავრობა, მთავრობა, რომელსაც ცივილიზებული სამყარო ხელს არ ართმევს, რომელსაც ვახშამზე არ პატიჟებენ, ამ მთავრობით ჩვენ ევროპის კავშირში ვერ შევალთ. “ქართული ოცნება” დღეს ერთადერთ წინაღობას წარმოადგენს ევროპის კავშირში გაწევრიანების გზაზე, ამიტომ ყველას გთხოვთ 26 ოქტომბერს არავინ არ დავიზაროთ არჩევნებზე მისვლა და უარი ვუთხრათ ქართულ ოცნებას, ვუთხრათ კი ევროპის კავშირს, კეთილდღეობას და უსაფრთხოებას”, – განაცხადა გია ჯაფარიძემ.
ინფორმაციას “ერთიანობა – ნაციონალური მოძრაობის” პრესსამსახური ავრცელებს
