ცხოველთა უფლებადამცველებმა დღეს შეხვედრა გამართეს მედიასთან და განცხადება გააცნეს, სადაც მწვავე შეფასებებია კონკრეტულ ფაქტებთან დაკავშირებით:
“26 აგვისტოს საინფორმაციო საშუალებებმა გაავრცელეს ინფორმაცია გურჯაანის სოფლებში მელაანში და ჩალაუბანში ცოფის ეპიდემიის შესახებ, რაც სურსათის უვნებლობის სააგენტოს წყაროზე დაყრდნობით იყო დეზინფორმაცია, რადგან ადგილი ჰქონდა მხოლოდ ორ დადასტურებულ ფაქტს 8 მიმართვიდან.
მიუსაფარი შინაური ცხოველების მართვის კახეთის ინტერმუნიციპალური სააგენტოს დირექტორი თეიმურაზ ზავრაშვილი სხვადასხვა საინფორმაციო საშუალებებში ურთიერთგამომრიცხავ ინფორმაციებს აჟღერებდა ცოფის ფაქტების დადასტურების, ცოფის შედეგად გარდაცვლილი ცხოველების და მის მიერ კანონდარღვევით სააგენტოში გადაყვანილი 90 ძაღლის და რაღაც რაოდენობა კატების შესახებ იმ ფონზე, როდესაც ცოფის ფაქტის დაფიქსირების მომენტიდან, სურსათის ეროვნული სააგენტოს წარმომადგენლებმა ადგილზე მყისიერად გადაცრეს 800 ცხოველი, მათ შორის ჩლიქოსანი.
ზავრაშვილის მიერ გაჟღერებული კარანტინი, რომელიც ხან 30 აგვისტოს და ხან 4 სექტემბერს უნდა დასრულებულიყო სააგენტოში და რომლის ფარგლებში გურჯაანის ორი სოფლიდან პირწმინდად წაიყვანეს ძაღლები და კატები, მათ შორის და პანიკის ფონზე იძულებით დაწერილი ხელწერილებით პატრონიანი ცხოველები, არის სრული უკანონობა. ამას მოწმობს საქართველოს მთავრობის 2023 წლის 20 მარტის დადგენილება №116, რომლის მიხედვით საკარანტინო შეზღუდვები ცოფით დაავადების ბოლო შემთხვევის გამოვლენიდან 30 დღის განმავლობაში გრძელდება და ის გულისხმობს ქუჩაში და სხვა ადგილებში ცხოველების გაყვანის აკრძალვას და არა უმეტეს.
“რადიო თავისუფლებისთვის” მიცემულ ინტერვიუში ზავრაშვილმა განაცხადა, რომ სააგენტოში გადაყვანილ ცხოველებს რამდენიმედღიანი ინტერვალით ჩაუტარდათ ცოფის აცრა, რომლის შედეგად კიდევ 6 ძაღლი გარდაიცვალა, რაც სრული ნონსენსია, რადგან ვეტერინარულად დაუშვებელია დღეების ინტერვალით ერთი და იგივე ცხოველებს ჩაუტარდეთ ანტირაბიული ვაქცინაცია.
გურჯაანის დირექტორის კანონსაწინააღმდეგო ქმედებები არ არის პირველი და ზავრაშვილი არის თვალნათელი მაგალითი ხელისუფლების ორგანიზებული სისტემური დანაშაულისა. წლების განმავლობაში ცხოველთა უფლებადამცველებმა არაერთხელ მივმართეთ პროკურატურას ზავრაშვილის მიერ მიუსაფარი ცხოველების განსაკუთრებული სისასტიკით მკვლელობებთან დაკავშირებით, კუსტარული კრემატორიუმის ფუნქციონირების შესახებ, კუსტარული საინექციო სასროლ აპარატზე, ზავრაშვილის ცნობილ ,,სისხლიან“ ბლოკნოტზე და არაერთ გამქრალ ცხოველზე.
ზავრაშვილის წინააღმდეგ დაიწყო გამოძიება, თუმცა არ დასრულებულა, რადგან საქმის პროკურორად დანიშნეს თეიმურაზ ზავრაშვილის ოჯახის წევრი, მისი რძალი – თინათინ ზუბაშვილი.
ზავრაშვილის კანონსაწინააღმდეგო ქმედებებზე დახმარების თხოვნით წერილობით მივმართეთ კახეთის მხარეში სახელმწიფო რწმუნებულს გიორგი ალადაშვილს და საქართველოს პარლამენტის მოქმედ დეპუტატს მმართველი გუნდიდან – კახი კახიშვილს, თუმცა კვლავ უშედეგოდ.
2021 წლის 24 ნოემბრის #14 დადგენილებით მიუსაფარი შინაური ცხოველების მართვის კახეთის ინტერმუნიციპალური სააგენტოს სრული კონტროლი და ზედამხედველება აკისრია გურჯაანის საკრებულოს. შესაბამისად, ზავრაშვილის კანონსაწინააღმდეგო ქმედებებზე სრული პასუხისმგებლობა ეკისრება, როგორც გურჯაანის საკრებულოს და სურსათის უვნებლობის სააგენტოს, ასევე კახეთის რეგიონის რვავე თვითმმართველი ერთეულის მერს, რომლებმაც 2021 წელს ერთობლივად დააფუძნეს ააიპ ,,მიუსაფარი შინაური ცხოველების მართვის კახეთის ინტერმუნიციპალური სააგენტო“ რომლის დირექტორად ჯერ დანიშნეს ზავრაშვილი, ხოლო 2022 წელს ერთპიროვნული მართვით გადასცეს.
ყოველივედან გამომდინარე ვგმობთ ცოფის არარსებულ, მიზანმიმართულ დეზინფორმაციას, გურჯაანის თავშესაფრის სისასტიკეს, უდანაშაულოდ დახოცილ ცხოველებს, არსებულ კანონდარღვევებს და ვითხოვთ თეიმურაზ ზავრაშვილის და ყველა პასუხისმგებელი, საქმესთან შემხებლობაში მყოფი პირის წინააღმდეგ სისხლის სამართლის საქმის აღძვრას, უკვე არსებული საქმეების გაერთიანებას და კანონის უზენაესობას“, – ნათქვამია გავრცელებულ განცხადებაში, რომელიც ქვემოჩამოთვლილმა ცხოველთა უფლებადამცველებმა წარმოადგინეს:
ცხოველთა უფლებების დაცვის ორგანიზაციის ,,დოგმენის” დამფუძნებელი და დირექტორი – დავით ზანდუკელი
ცხოველთამოყვარული – ნანა ხომასურიძე
ცხოველთამოყვარული – ქეთა ხვიჩია
,,გლობალური მართვის ინსტიტუტი” დამფუძნებელი – ნინო კერესელიძე
ცხოველთა მოყვარული – ნათელა შანყულაშვილი
ცხოველთა უფლებადამცველი – შორენა ლობჟანიძე
ცხოველთადაცვის ორგანიზაციის ,,საქართველოს ცხოველთა დაცვის ორგანიზაცია” დირექტორი – ნინო გვალია
