“ისევე უნდა გაერთიანდეს მთელი ჩვენი საზოგადოება, როგორც პოლიტიკური სპექტრი ერთიანდება დღეს: ეს იქნება წარმატების მთავარი წინაპირობა და ის გამარჯვება, რომელიც იქნება ოქტომბერში, იქნება მთელი საქართველოს გამარჯვება”, – განაცხადა “ერთიანობა-ნაციონალური მოძრაობის” ლიდერმა, “ევროპული საქართველოდან” გიგი წერეთელმა.
მისი თქმით, საზოგადოებას გადასაწყვეტი აქვს მთავარი და სასიცოცხლო ამოცანა, შეძლებს თუ არა ჩვენი ქვეყანა არჩევნების შემდეგ, მიაღწიოს კეთილდღეობას ევროპაში:
“მივესალმები საზოგადოებას, რომელმაც ორი თვის შემდეგ უნდა მიიღოს სასიცოცხლოდ მნიშვნელოვანი გადაწყვეტილება და ეს გადაწყვეტილება არის შეძლებს თუ არა ჩვენი ქვეყანა არჩევნების შემდეგ, მიაღწიოს კეთილდღეობას ევროპაში. ევროპასთან, დასავლეთთან, ცივილიზებულ სამყაროსთან ერთად იცხოვროს დაცულ გარემოში, ახალგაზრდებს ჰქონდეთ ძალიან დიდი პერსპექტივა, იყოს ინვესტიციები, სამუშაო ადგილები მაღალი ანაზღაურებით, ღირსეული სიბერე ასაკოვანი ადამიანებისთვის, სამოქალაქო თანხმობა და პირობები შეიქმნას ქვეყნის გამთლიანებისთვის და გაერთიანებისთვის.
და რას ვისმენთ ჩვენ ხელისუფლებისგან, რა დევს სასწორის მეორე პინაზე:
რომ ჩვენ აღარ გვეყოლება სამოქალაქო საზოგადოება, პოლიტიკური პარტიები, პრაქტიკულად გვიცხადებენ, რომ იქნება ავტორიტარიზმი, პრაქტიკულად დიქტატურა, რაც არის საფუძველი იმისა, რომ სამწუხაროდ, ქვეყანა აღმოჩნდება იზოლაციაში, იზოლაცია კი მოიტანს რეგრესს, ქვეყნის დაცემასა და სახელმწიფოებრიობის დაკნინებას, ყველაზე დიდ გასაჭირსა და სიღატაკეს.
სწორედ ეს არის გადასაწყვეტი, ეს არის ყველაზე დიდი ამოცანა. და მე ღრმად ვარ დარწმუნებული, რომ ერთიანობა არის მთავარი – სწორედ ამ სულისკვეთებით შემოუერთდა “ევროპული საქართველო” კოალიცია ერთიანობას და მე დარწმუნებული ვარ, ისევე უნდა გაერთიანდეს მთელი ჩვენი საზოგადოება, როგორც პოლიტიკური სპექტრი ერთიანდება დღეს. ეს იქნება წარმატების მთავარი წინაპირობა და ის გამარჯვება, რომელიც იქნება ოქტომბერში, იქნება მთელი საქართველოს გამარჯვება, ეს იქნება საქართველოს ყველა მოქალაქის გამარჯვება”, – განაცხადა გიგი წერეთელმა.
ინფორმაციას “ერთიანობა – ნაციონალური მოძრაობის” პრესსამსახური ავრცელებს
