“ოლიგარქისგან ერთი სკამის მოშორებით გადაჯდება ირაკლი ღარიბაშვილი და ერთი სკამით ახლოს დაჯდება ირაკლი კობახიძე, ამით არაფერი იცვლება” – სერგო ჩიხლაძე

„ბატონი კობახიძე არ არის ის ფიგურა, რომელიც ან ინვესტიციებს მოიზიდავს ქვეყანაში, ან დამატებით სამუშაო ადგილებს შექმნის ან ევროკავშირში გაწევრიანების პროცესს დააჩქარებს“, – ასე აფასებს „სტრატეგია აღმაშენებლის“ საერთაშორისო მდივანი, სერგო ჩიხლაძე დაანონსებულ სამთავრობო ცვლილებებს.

როგორც ჩიხლაძე აღნიშნავს, ღარიბაშვილის კობახიძით ჩანაცვლებით არაფერი იცვლება, რადგან კობახიძის ინტერესებს არა ინვესტიციების მოზიდვა და სამუშაო ადგილების შექმნა, არამედ ივანიშვილის ფულის დაცვა წარმოადგენს.

„სტრატეგია აღმაშენებლის“ ერთ-ერთი ლიდერის თქმით, არჩევნებში გამარჯვების შემდეგ „გამარჯვების კოალიცია“ ხელისუფლების მიერ ხელიდან გაშვებულ შესაძლებლობებს აუცილებლად გამოიყენებს და საქართველოს ინვესტორებისთვის მიმზიდველ ადგილად აქცევს:

“იმ გარემოებით, რომ ოლიგარქისგან ერთი სკამის მოშორებით გადაჯდება ირაკლი ღარიბაშვილი და ერთი სკამით ახლოს დაჯდება ირაკლი კობახიძე, ამით არაფერი იცვლება. ბატონი კობახიძე არ არის ის ფიგურა, რომელიც ან ინვესტიციებს მოიზიდავს ქვეყანაში, ან დამატებით სამუშაო ადგილებს შექმნის ან ევროკავშირში გაწევრიანების პროცესს დააჩქარებს.

ირაკლი კობახიძე ყოველთვის ბევრს საუბრობდა ოლიგარქის ფულზე, ოლიგარქის ინტერესებსა და საზღვარგარეთის ბანკებში მოთავსებულ მის ფულზე, მაგრამ სიტყვაც კი არ უთქვამს საქართველოში მოსახლეობის სიღარიბიდან ამოყვანაზე, ახალი სამუშაო ადგილების შექმნაზე, ღირსეული სამუშაო და ცხოვრების პირობების შექმნაზე, ბავშვთა შიმშილობაზე, ასობით ათასი ადამიანის ქვეყნიდან გადინებაზე. ასე, რომ მისი ინტერესის სფერო უკვე ცნობილია. ეს არის მდიდარი ოლიგარქის მსახურება და არა სახელმწიფოს ან ხალხის ინტერესების დაცვა.

ირაკლი ღარიბაშვილს, ირაკლი კობახიძის და ზოგადად “ქართულ ოცნების” ინტერესი რომ იყოს საქართველოს მოქალაქე და მისი კეთილდღეობა, მარტო ბოლო 2 წელიწადში რეალური შანსი იყო, რომ შექმნილიყო ათობით ათასი მაღალანაზრაურებადი სამუშაო ადგილი, იყო შანსი, რომ შემოსულიყო დამატებით მილიარდობით დოლარის ინვესტიცია, რომელიც მიაღწევდა საქართველოს თითოეულ მოქალაქემდე და ასობით ათასი საქართველოს მკვიდრი არ დატოვებდა სამშობლოს ლუკმა-პურის ძიებაში.

ოქტომბრის არჩევნებში გამარჯვების შემდეგ ამ ხელიდან გაშვებულ შანსებს და შესაძლებლობებს დღის წესრიგში აუცილებლად დავაბრუნებთ და გამოვიყენებთ. ინვესტიციების ქვეყანაში შემოტანა, ინვესტორებისთვის მიმზიდველი გარემოს შექმნა, მაღალანაზღაურებადი სამუშაო ადგილები, ახალი ტექნოლოგიების დანერგვა და მეგა ინფრასტრუქტურული პროექტები იქნება ის, რაზეც “გამარჯვების კოალიცია” არჩევნებში გამარჯვების შემდეგ იზრუნებს“, – განაცხადა ჩიხლაძემ.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს