NDI-ის ბოლო კვლევის შედეგებს ეხმიანება “ლეიბორისტული პარტიის” თავმჯდომარე. შალვა ნათელაშვილს მიაჩნია, რომ რამდენიმე თვეში მმართველი პოლიტიკური ძალა ხელისუფლებიდან წავა:
“ენდიაის” კვლევებიდან შეიძლება ერთადერთი დასკვნა გავაკეთოთ: ივანიშვილისა და მისი რეჟიმისთვის დადგა უკანასკნელი პოლიტიკური ახალი წელიწადი, იწყება მათი გედის სიმღერა, რაც გარდაუვლად, რამდენიმე თვეში დამთავრდება მათი ხელისუფლებიდან წასვლით და ყოველგავრი მცდელობა, მანიპულაციებით, ძალადობით, რეპრესიებით , ყალბი გამოკითხვებით, ფულით, საერთაშორისო ლობიზმით გააჩერონ ეს პროცესი, უაზრობას წარმოადგენს და ჩასაფუშადაა განწირული.
პოლიტიკური ძალები უნდა გავემზადოთ პოლიტიკური პასუხისმგებლობის აღებისთვის, ქვეყნის გადარჩენაზე. დგება საქართველოს კოალიციური მართვის ეტაპი. ეს არის ჟამი, როდესაც განუზომლად იზრდება თვითეული პოლიტიკოსის და პოლიტიკური პარტიის პასუხისმგებლობა ხალხის, ქვეყნის, დღევანდელობის და მომავლის წინაშე და ჩვენ ამისთვის ღირსეულად უნდა მოვემზადოთ.
ეს შედეგები არის არა გამოკითხულთა ან ,,ენდიაის“ ბრალი, არამედ ამ ხელისუფლების პოლიტიკის შედეგი, რომელმაც ქვეყანა ამ პოლიტიკურ ქაოსამდე მიიყვანა. ეს არის კარგი ჭკუის სასწავლებელი დღევანდელი და მომავალი პოლიტიკოსებისთვის იმის თაობაზე, თუ როგორი არ უნდა იყოს პოლიტიკა და როგორი არ უნდა იყოს პოლიტიკოსი“, – აცხადებს შალვა ნათელაშვილი.
