რუსეთსა და უკრაინას შორის მოლაპარაკებები ტყვეების გაცვლის თაობაზე წარმატებით დასრულდა. უკრაინამ რუსეთს გადასცა 248 ტყვე, ხოლო რუსეთმა 230 ტყვე დააბრუნა უკრაინაში. ტყვეების ამ რაოდენობის გაცვლა ყველაზე მასშტაბურია 2022 წელს რუსეთის მიერ უკრაინაში ფართომასშტაბიანი შეჭრის შემდეგ:
ასევე, ტყვეების გაცვლასთან დაკავშირებით ვიდეო მიმართვა ჩაწერა უკრაინის პრეზიდენტმა, ვოლოდიმირ ზელენსკიმ. მისი განცხადებით, რაც უფრო მეტ რუს სამხედროს აიყვანენ, მით უფრო ეფექტური იქნება უკრაინელი ტყვეების ქვეყანაში დაბრუნება:
,,მიუხედავად ყველა გამოწვევისა, დიდი ხნის ნანატრი კარგი ამბავია. დიდი პაუზა იყო, თუმცა პაუზა არ ყოფილა ტყვეების გაცვლებთან დაკავშირებით მოლაპარაკებებში. ჩვენ ვიყენებთ ყველა შესაძლებლობას, ვცდილობთ მედიაციის ყველა ვარიანტს. ყველა საერთაშორისო შეხვედრაზე, რომელსაც შეუძლია დაეხმაროს საქმეს, ჩვენ ვაყენებთ ჩვენი ტყვეების დაბრუნების საკითხს და ასე გავაგრძელებთ ყველა ჩვენი მოქალაქის დასაბრუნებლად.
მადლობას ვუხდით თითოეულ ჩვენს მეომარს ფრონტის ხაზზე, რომელსაც ტყვედ ჰყავს ოკუპანტები და ავსებს ჩვენს გაცვლით ფონდს. რაც უფრო მეტ რუსს ავიყვანთ ტყვედ, მით უფრო ეფექტური იქნება მოლაპარაკებები გაცვლაზე“, – განაცხადა ვოლოდიმირ ზელენსკიმ.
თემასთან დაკავშირებით, ასევე, კომენტარი გააკეთა უკრაინის თავდაცვის სამინისტროს დაზვერვის მთავარი სამმართველოს ხელმძღვანელმა, კირილო ბუდანოვმა:
,,გაცვლის პროცესის ორგანიზებაში დახმარება არაბთა გაერთიანებულმა საემიროებმა გაგვიწიეს. მათი დახმარებით ჩვენ ეს ერთად შევძელით. დიდი ხნის შემდეგ უკრაინამ მოახერხა ტყვეების გამოხსნა.
ეს არის სრულიად განსხვავებული კატეგორიის ხალხი – მარიუპოლის, ჩერნობილის ატომური ელექტროსადგურის დამცველები, სამხედრო მედიკოსები, კუნძულ “Зміїний”-ს დამცველები, მესაზღვრეები, პოლიციელები და ეროვნული გვარდიელები“, – განაცხადა კირილო ბუდანოვმა.
ავტორი
ნინი ხიჯაკაძე
