„სტრატეგია აღმაშენებლის“ პოლიტიკური საბჭოს წევრმა და სოციალური მიმართულების ხელმძღვანელმა, თეონა ჭალიძემ „ლიბერთი ბანკის“ მხრიდან განხორციელებულ სავარაუდო მეორე თაღლითობის ფაქტზე საქართველოს პროკურატურას მიმართა და გამოძიებასთან დაკავშირებით კიდევ ერთი წერილობითი მოთხოვნა ჩააბარა.
ჭალიძე „ლიბერთი ბანკის“ „ოვერდრაფტით” დაზარალებულ პენსიონერებს, დევნილებს, შშმ პირებს და მარჩენალდაკარგულებს მოუწოდებს, რომ თაღლითობის ფაქტებთან დაკავშირებით მოქალაქეებმა პროკურატურაში თავადვე განაცხადონ:
„ვისაც ჯანმრთელობა გიწყობთ ხელს და შეგწევთ ძალა, იბრძოლეთ თქვენი უფლებებისთვის და სხვების უფლებებისთვისაც, სამართლიანობისთვის.
ვინც ხართ „ლიბერთი ბანკის“ მხრიდან სავარაუდო მეორე თაღლითობის სქემით, ე.წ. „ოვერდრაფტით“ დაზარალებული, გთხოვთ, რომ შემოიტანოთ ინდივიდუალური განცხადებები პროკურატურაში, რათა დაიწყოს გამოძიება, დაინახონ, რამდენი ადამიანი არის დაზარალებული ისეთი, რომელსაც არაინფორმირებული თანხმობით, მათთვის სრულყოფილი ინფორმაციის მიწოდების გარეშე შეაჩეჩეს ისეთი საბანკო პროდუქტი, რომლის ფარგლებშიც მათი ყოველთვიური გადახდილი თანხებიდან იფარებოდა მხოლოდ პროცენტი, ანუ ბანკი იღებდა მხოლოდ სარგებელს და ძირი თანხა არ იფარებოდა“, – განაცხადა თეონა ჭალიძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
