საქართველოს პრემიერ-მინისტრი, ირაკლი ღარიბაშვილი ჟურნალისტებთან კომენტარს აკეთებს ევროკავშირის კანდიდატის სტატუსის საქართველოსთვის მინიჭების მოლოდინებთან დაკავშირებით:
,,ჩვენ ვიყავით გრანადაში, ესპანეთში. მე მქონდა არაერთი შეხვედრა ჩვენს ევროპელ ლიდერებთან. ჩვენ საკმაოდ დიდი პროგრესი გვაქვს. უნდა ითქვას, მოლოდინები არის საკმაოდ პოზიტიური. მე არ მინდა ახლა იმაზე მეტი ვთქვა, რაც ამ ეტაპისთვის არის მიზანშეწონილი. მე მექნება შეხვედრები ბრიუსელში. ჩვენ ახლა აქტიურად ვმუშაობთ კომისიასთან, აქტიურ კომუნიკაციაში ვართ კომისიის შესაბამის სტრუქტურებთან.
ახლა ბოლო დაზუსტებები მიმდინარეობს. ნოემბრის დასაწყისში, მე ასე მინდა ვთქვა, იქნება კომისიის გადაწყვეტილება, რეკომენდაცია. ვფიქრობ, რომ საქართველომ მაქსიმუმი გააკეთა ჩვენმა ხელისუფლებამ. მიუხედავად არაერთი მცდელობისა, დესტრუქციისა და საბოტაჟისა ოპოზიციის მხრიდან, სხვა შიდა თუ გარე მტრების მონდომებისა, რომ ეს პროცესი რამენაირად შეფერხებულიყო, შეიძლება ითქვას, რომ ჩვენ ბოლოში გავედით. ამ ბოლოში გასვლას ჩვენ იმედიანად ველოდებით. კიდევ ვიმეორებ, ჩვენი ქვეყანა, ჩვენი ხელისუფლების დამსახურებით, ჩვენი ხალხის მობილიზებით, მათი ნების გამოხატულებით, კანდიდატის სტატუსს იმსახურებს.
მიუღებელი იქნებოდა სხვა გადაწყვეტილება, ისე როგორც შარშან ეს იყო აბსოლუტურად მიუღებელი, გაუმართლებელი და უფრო მეტიც, ევროპის მხრიდან იყო უხეში შეცდომა დაშვებული. მე აღარ მინდა წარსულზე გავაკეთო კომენტარები, უნდა ვიფიქროთ მომავალზე. ბოსნია-ჰერცოგოვინასთან მე ამას წინად ფართოდ ვისაუბრე. ბოსნიას, მოლდოვას, უკრაინას აქვს სტატუსი. ყველას მადლობა მინდა ვუთხრა, ვინც მიანიჭა სტატუსი. ამ ქვეყნებს მინდა წარმატება ვუსურვო, მაგრამ მე ჩემს, ჩვენს ქვეყანაზე მაქვს მთავარი ფოკუსირება და მთავარი ყურადღება გამახვილებული, ამ დამსახურებასა და ყველაფერზე, რაც ჩვენ გავაკეთეთ“, – განაცხადა ირაკლი ღარიბაშვილმა.
ავტორი
მარიამ ხაჩირაშვილი
