საქართველოს პრეზიდენტის ადმინისტრაცია განცხადებას ავრცელებს იმასთან დაკავშირებით, რომ სალომე ზურაბიშვილი ვეტოს დაადებს პარლამენტის მიერ მიღებულ „შეკრებებისა და მანიფესტაციების შესახებ“ კანონს:
“საპარლამენტო უმრავლესობის არასერიოზული და ცინიკური განცხადებები საზოგადოების უპატივცემულობაა.
როგორც 2022 წლის 22 ივნისს საქართველოს პრეზიდენტმა განაცხადა, ის გამოიყენებს ვეტოს უფლებას, ყველა იმ კანონთან მიმართებით, რომელიც ეწინააღმდეგება ქვეყნის დემოკრატიულ მშენებლობას და ევროკავშირის რეკომენდაციების სულისკვეთებას.
შესაბამისად, პრეზიდენტი „შეკრებებისა და მანიფესტაციების შესახებ“ კანონს, რომელიც ზღუდავს შეკრებისა და გამოხატვის თავისუფლებას, ვეტოს დაადებს,” – ნათქვამია გავრცელებულ განცხადებაში.
ინფორმაციისთვის: საპარლამენტო უმრავლესობის ლიდერმა, ირაკლი კობახიძემ ბრიფინგზე განაცხადა, რომ პარლამენტი „შეკრებებისა და მანიფესტაციების შესახებ“ კანონს პრეზიდენტთან ხელისმოსაწერად არ გააგზავნიან, რადგანაც საპარლამენტო რესპუბლიკაში კანონების გამოცემა პარლამენტის პრეროგატივაა. შემდგომში, მმართველი პარტიის ლიდერმა განმარტებები გააკეთა და აღნიშნა, რომ მისი განცხადება ე.წ. “სატესტო” ხუმრობა იყო, რითიც მინიშნება გააკეთა პრეზიდენტის უფლებამოსილებაზე.
