“ეს ყველაფერი რაც ხდება, კრემლსა და ივანიშვილს შორის მიღწეული შეთანხმების შედეგია” – შალვა ნათელაშვილი ოჩამჩირეში რუსეთის სამხედრო-საზღვაო ძალების ბაზის შექმნაზე

ოკუპირებული აფხაზეთის დე ფაქტო პრეზიდენტის ასლან ბჟანიას ციტატა რუსულმა გაზეთმა ,,ИЗВЕСТИЯ”-მ გამოაქვეყნა: „ჩვენ გავაფორმეთ ხელშეკრულება და უახლოეს მომავალში, ოჩამჩირის რაიონში, რუსეთის სამხედრო-საზღვაო ძალების მუდმივი ბაზა იქნება“, – განაცხადა ასლან ბჟანიამ

თემასთან დაკავშირებით საგანგებო ბრიფინგზე მწვავე და კრიტიკული განცხადება გააკეთა ,,ლეიბორისტული პარტიის” თავმჯდომარემ, შალვა ნათელაშვილმა:

,,სანამ ოლიგარქიული რეჟიმი და მასთან შეამხანაგებული პოლიტიკური სპექტრი დაკავებულია ხალხის მოსატყუებელი სპექტაკლის იმპიჩმენტიადის ჩვენებით, ამასობაში საქართველო აგრძელებს განლევას. რუსეთის პრეზიდენტ ვლადიმირ პუტინის გადაწყვეტილებით აფხაზეთში, საქართველოში იხსნება ოჩამჩირის სამხედრო-საზღვაო ბაზა, რაც წარმოადგენს გეოპოლიტიკურ კატასტროფას არა მარტო საქართველოსთვის, არამედ ქმნის გლობალურ საფრთხეებს მთლიანად შავი და ხმელთაშუა ზღვის რეგიონში მთლიანად, ატლანტიკის ოკეანემდე.

ამ ფონზე სრული მდუმარება და პოლიტიკური იმპოტენციაა ხელისუფლებიდან. არავითარი მიმართვა გაეროს უშიშროების საბჭოს საგანგებო სხდომის მოწვევაზე, არავითარი აპელაცია საერთაშორისო სისხლის სამართლის სასამართლოსა და ტრიბუნალებში, არავითარი მითხოვნა ევროკავშირზე და ეუთოზე, საგანგებო სხდომების ჩატარების შესახებ.

პრემიერ-მინისტრი დამალულია. როგორც ჩანს, მოსკოვიდან არ აქვს ნებართვა მასზე, განცხადება გააკეთოს. სამაგიეროდ, თუ ამერიკა და ევროპაა სალანძღი, იქ პირველი გამოდის. პარლამენტი ამ წუთში დაკავებულია როგორმე მიტინგებზე კარვები არ დაიდგას. თურმე კარავი უფრო დიდი გეოპოლიტიკური საფრთხე ყოფილა, ვიდრე ოჩამჩირეში სამხედრო-საზღვაო ბაზის გახსნა, რაც წარმოუდგენლად გვაშორებს აფხაზეთის დაბრუნების პერსპექტივებსაც, საერთოდ აღარ არის საუბარი საბრძოლო მოქმედებების გადმოტანაზე, რადგანაც უკრაინიდან, ეჭვიც არ შეგეპაროთ, აუცილებლად წამოვა შესაბამისი სარაკეტო საშუალებები ამ ბაზის გასანეიტრალებლად. ყველაფერ აი, ამ ფონზე ხელისუფლების მოღალატეობრივი მდუმარება და თანხმობა, ეს ყველაფერი რაც ხდება, კრემლსა და ივანიშვილს შორის მიღწეული შეთანხმების შედეგია“, – განაცხადა შალვა ნათელაშვილმა.

ავტორი
ნინი ხიჯაკაძე