“ცდილობენ ამ ყველაფრის ეჭვქვეშ დაყენებას, რათა საბოლოოდ სააკაშვილი ნელი სიკვდილისთვის გაწირონ” – მალგოჟატა გოშიევსკა ინციდენტზე პოლონელ ექიმთან დაკავშირებით

პოლონეთის სეიმის ვიცე-სპიკერი, მალგოჟატა გოშიევსკა პოლონურ მედიაში ინტერვიუს აკეთებს საქართველოს მე-3 პრეზიდენტთან პოლონელი ექიმების ვიზიტთან დაკავშირებულ სკანდალზე. მისი განცხადებით, პოლონურმა მხარემ უზრუნველყო პროცესის გამჭვირვალობა, ხოლო მომხდარი ფაქტით ცდილობენ, რომ სანდოობა დაუკარგონ უცხოელი ექიმების დასკვნას:

,,ქართული მხარე ნიმუშების აღების მთელ პროცესს აფიქსირებდა, რის შესახებაც პოლონელმა ექიმებმა შესანიშნავად იცოდნენ. ამიტომ, ვერ წარმომიდგენია, რომ ამ ყველაფრის ფონზე ისინი შეეცადნენ ასეთი ფორმით წაეღოთ რაღაც ნიმუში.

აშკარაა, რომ ეს შეკერილი საქმეა. მიზანი კი არის ის, რომ ექიმების მუშაობის შედეგებს სანდოობა დაუკარგონ და არა ის, რომ სააკაშვილმა მიიღოს ის სამედიცინო დახმარება, რომელიც მას ნორმალურ მდგომარეობაში დააბრუნებს.

ქართველი ექიმებიც მონაწილეობდნენ ნიმუშების აღებაში. ნიმუშები აიღეს 2-ჯერ – ერთი ნაწილი საქართველოში დარჩა, მეორე კი პოლონეთში ჩამოიტანეს.
პოლონურმა მხარემ უზრუნველყო გამჭვირვალობა. ეს ნიმუშები დაილუქა, როგორც საჭიროა ისე. ამიტომ ცდილობენ ამ ყველაფრის ეჭვქვეშ დაყენებას, რათა საბოლოოდ სააკაშვილი ნელი სიკვდილისთვის გაწირონ”, – განაცხადა მალგოჟატა გოშიევსკამ.

ავტორი
ნინი ხიჯაკაძე