დღეს, საგარეჯოში ,,ერთიანი ნაციონალური მოძრაობის” წარმომადგენლები მოსახლეობას შეხვდნენ, რასაც მოქალაქეების გარკვეული ჯგუფისგან ფიზიკური დაპირისპირება მოჰყვა. თემასთან დაკავშირებით მწვავე და კრიტიკული განცხადება გააკეთა პარტიის თავმჯდომარემ, ლევან ხაბეიშვილმა:
,,ამ ქვებს, დღეს, პენსიონერებს, ვინ ესროდა? ვინ იყვნენ? მერე უნდა წარმოაჩინონ, რომ ,,აი, ხალხი”… რა ხალხი?! ესენი არიან ბიძინა ივანიშვილის დაქირავებული ,,ტიტუშკები”.
თქვენ ნახეთ, რომ იქ იყო ფიზიკური ანგარიშსწორება. ჩვენ არაფრის არ გვეშინია!
მოვუწოდებ საზოგადოებას, კარგად დაფიქრდნენ, რა ძალასთან გვაქვს საქმე. ეს ადამიანები არ გვაცდიან მოქალაქეებთან, პენსიონერებთან, ახალგაზრდებთან შეხვედრას. ეს ხალხი გადასულია ძალადობაზე. ეს არის ბოლო ჟამი! ეს ბოლო ჟამი დადგა მას შემდეგ, რაც მთავარმა ანტიპუტინისტმა, პრეზიდენტმა სააკაშვილმა გააკეთა განცხადება, რომ ის ერთვება პოლიტიკაში.
დიახ, პრეზიდენტ სააკაშვილთან და ჩვენს მოსახლეობასთან ერთად ვაპირებთ, ამ ქვასროლია პუტინისტებს კუდით ქვა ვასროლინოთ, ცხადია, პოლიტიკურად და მოვაშოროთ საქართველოს ხელისუფლებას”, – განაცხადა ლევან ხაბეიშვილმა.
ავტორი
ნინი ხიჯაკაძე
